Elm və texnologiya inkişaf etdikcə insanların ətrafa və özünə müdaxilə formaları həm genişlənir, həm də inkişaf edir. Yer üzündə insan tükənmədikcə, insan ağlı dayanmadıqca, texnologiya daim irəliləyəcək, insan həmişə öndəki hədəfə çatmağa çalışacaq, təkamül prosesinə nöqtə qoyulmayacaq.
İnsan indi az qala Yaradanla yarışır, oqarnizm üzərində cürbəcür əməliyyatlar aparır. 10 il öncə ürək, beyin cərrahiyyəsi bizə möcüzə kimi görünsə də günümüzdə bu cür əməliyyatlar sıradan hadisə kimi dəyərləndirilir. İndi nəinki daxili orqanların köçürülməsi, hətta insana yeni əl-ayaq, üz köçürülməsi də gerçəkləşdirilir. Təbii ki, bu cür əməliyyatların reallaşdırılması elmin inkişafı, insanlığın başarısıdır.
Statistikaya görə plastik əməliyyatlar daha çox ABŞ-da həyata keçirilir. İl ərzində orta hesabla 14 milyon amerikalı plastik əməliyyat etdirir. Dövrümüzdə daha cox zərif cinsin nümayəndələrinin üstünlük verdiyi bu cür əməliyyatlardan ilk dəfə istifadə edənlər kişilər olub. Müharibə dövründə üzlərində çapıqlar olan kişilər bu üsulla qüsurlarını gizlətməyə çalışıblar. Elə bunun nəticəsində də müasir cərrahiyyənin yeni üsulları yaranıb.
Müasir dövrdə də estetik əməliyyatdan istifadə edən kişiləri sayı qadınlar qədər çoxdur. Güclü cinsin nümayəndələri daha çox burun formalarını dəyişdirmək, artıq piylərdən azad olmaq, üzlərindəki qırışları aradan qaldırmaq üçün estetik əməliyyata müraciət edirlər. Amma bu heç də kişilərin qadınlardan çox əməliyyat etdirdiyi anlamına gəlmir. Gözəllik üçün qadınlar qarşı cinsdən daha çox əməliyyat stoluna uzanırlar. Kişilər daha çox plastik əməliyyatın bir qədər fərqli və nadir növündən istifadə edirlər. Kişilər daha çox burun əyriliyinin düzəldilməsi, artıq piylərin götürülməsi, sifət quruluşunun daha yaxşı formada dəyişdirilməsi və ən maraqlısı cinsini dəyişdirmək üşün müraciət edənlərdə az deyil.
Aynura Həsənova: “Əvvəllər kişilər daha çox burun əyriliyinin düzəldilməsi üçün müraciət edirdilərsə ancaq son zamanlar piylərdən qurtulmaq istəyən bəylərin sayı üstünlük təşkil edir”
Həkim, ekspert Aynura Həsənova “Bakı-Xəbər”ə açıqlamasında qeyd etdi ki, son illə müqayisədə plastik əməliyyat üçün müraciət edənlərin sayı artıb. Qadınlarla yanaşı, kişilərdə plastik əməliyyat etdirməyə maraqlıdır: “Kişilərin estetik əməliyyatlar üçün müraciət sayında vəziyyətə gəldikdə isə, burada da göstəricilər yüksəlib. Onlar daha çox kəpçə qulaqlıq və yaxud da ginikomastiya kimi problemin, eləcə də üzdə olan çapıq və qırışların aradan qaldırılması, burun daxili estetik görünüşün düzəldilməsi, aşırı piylənmədən yaxa qurtarmaq üçün müraciət edirlər. Faizlə müqayisə etsək kişilərin müraciət etmə sayları artıb. Əvvəllər kişilər daha çox burun əyriliyinin düzəldilməsi üçün müraciət edirdilərsə ancaq son zamanlar piylərdən qurtulmaq üçün azad olmaq istəyən bəylərin sayı üstünlük təşkil edir. Hətta süd vəzisi əməliyyatı etdirmək istəyən kişilər də var”
Həmsöhbətimizin sözlərinə görə, qadınlar kimi kişilər də doqaqlarının həcmini böyütmək üçün gellərdən istifadə edirlər. Normal oriyentasiyası olan, yəni cinsi azlığa mənsub olmayan kişilər də dodaqlarını böyüdürlər: “Dodaqların böyüdülməsi üçün müxtəlif gellərdən istifadə olunur. Gellər tez və gec sorulan olur. Təbii gellər bir neçə aydan bir ilə qədər olan müddətdə orqanizmdən tamamilə sorulub xaric edilir. Bununla yanaşı, botoksdan istifadən edən kişilərin sayı az deyil”.
Onun fikrincə, plastik əməliyyat üçün müraciət edən kişilərin sayının artması bu sahədə informasiyanın çoxalması, eləcə də kişilər arasında bununla bağlı psixoloji maneələrin aradan qalxması ilə bağlıdır: “Artıq kimsə, öz üz quruluşundan narazıdırsa, bunu dəyişməkdən utanmır. Bununda səbəbi plastik əməliyyat etdirən kişilərin sayının demək olar ki, qadınlarla bərabar olmasıdır. Düzdür, daha çox şou-biznes sahəsində çalışan kişilər daha çox plastik əməliyyata müraciət edir. Ancaq bununla yanaşı, ciddi sahələrdə çalışanlar da sərbəst şəkildə plastik əməliyyat masasına uzanırlar”.
Günel CƏLİLOVA
