Sentyabr ayı kirayə mənzil bazarının aktivləşdiyi dövrdür. Yeni tədris ili başladığından, regionlardan paytaxta oxumağa gələn tələbələr kirayə mənzillərdə yerləşməli olurlar. Bu səbəbdən kirayə mənzil bazarında tələbat yüksəlir,qiymət bahalaşır. Hazırda şəhər kirayə elanları ilə olub-daşır.
Ənənəvi olaraq "yalnız qızlar üçün" başlıqlı elanlarla isə çox qarşılaşırıq. Bu gün bir çox ev sahibləri evini ancaq qızlara, o cümlədən tələbə qızlara kirayə vermək istəyir. Ancaq ev yiyələri mənzillərini oğlnlara vermək istəmir. Əks cinsin nümayəndəsi kirayə mənzil üçün müraciət etsə ona qəti şəkildə "yox" cavabını verirlər.
Mənzil sahiblərinin böyük əksəriyyəti bunun səbəbini qızların daha məsuliyyətli, evə, əşyalara qarşı daha ehtiyatlı, səliqəli davranması ilə əlaqələndirirlər.
Belə olan halda oğlanlar kirayə mənzil tapmaqda çətinlik çəkir. Oğlan tələbələr kirayə mənzil tapmaqda çətinlik çəkdiklərini bildirir. Onlar qeyd edir ki, ildən-ilə kirayə ev tapmaq çətinləşir: “Beş-on nəfər evi səliqəsiz saxlayır deyə, bu, bütün tələbə oğlanlara aid edilməməlidir. Biz müqavilə bağlamağa belə razıyıq, amma ev sahibləri əsassız olaraq evi yalnız qızlara kirayə verəcəklərini deyirlər. Bəs Azərbaycanda oxuyan əcnəbi oğlanlara niyə kirayə ev verirlər? Çünki bizə 200 manata deyilən evi onlara 400-600 manata verirlər. Onlar da qiymətlərdən xəbərsiz olduqları üçün razılaşırlar”.
Tələbə İlkin Məmmədov: “Yaxşı şəraitli evlər ya ailə, ya da qızlara verilir, oğlanlara isə yalnız şəraitsiz evlər təklif olunur”
Kirayə mənzil tapmaqda çətinlik çəkən tələbə İlkin Məmmədov bizimlə söhbətində bildirdi ki, Bakıya ilk gələndə kimə müraciət edirdisə, evini kirayə vermək istəmirdi: “Bizə də ancaq şəraitsiz evlərdə yaşamaq qalırdı. Bütün yaxşı evlər ya ailə, ya da yalnız qız tələbələrə verilirdi. Ona görə qaldığımız bütün evlər demək olar ki, insanlıq üçün təhqir idi. Problemimiz ancaq şəraitsizliklə bağlı olurdu. Həftədə bir dəfə evə usta gəlirdi. Qaz, su xətti və digər bu kimi problemlərlə məşğul olurdu. Amma səliqə-sahman baxımından problem yaranmayıb. Çünki ev sahibi özü də bilirdi ki, verdiyi evi nə qədər səliqəli saxlamağa çalışsaq da, səliqəsiz görünəcək”.
Aytəkin Kamranqızı: “Tələbələrə mənzil kirayə verilərkən mənzilin oğlan-qız üstündə dayanması əsassızdır”
Sosioloq Aytəkin Kamranqızı qeyd etdi ki, ev sahiblərinin əksəriyyəti evlərini oğlan tələbələrə etibar etmək istəmir: “Hazırda Bakıda müşahidə edilən ciddi problemlərdə biri də oğlan tələbələrə ev verilməməsidir. Bu, çox vaxt həmin mənzildən istifadənin keyfiyyətsizliyi baxımından baş verir. Çünki qız uşaqları evdən daha səliqəli istifadə edirlər. Oğlanlar isə bu istiqamətdə xeyli çətinliklərlə üzləşirlər. Təbii ki, mentalitet məsələlərinin də rolu böyükdür. Bəzən ailələr öz həyətlərində olan mənzilləri kirayə verir və istəmirlər ki, burada yad adamlar, xüsusilə də oğlan uşaqları yaşasınlar. Bəzi ailələr evdəki bir otağı kirayə verirlər. Bu, daha çox qızlara əlverişli şərait yaradır. Oğlanlar üçün imkanlar məhdudlaşır. Buna görə də bir sıra proyektlərin həyata keçirilməsinə ehtiyac yaranıb. Belə layihələri həyata keçirərkən oğlan tələbələrin yerləşdirilməsinə fokuslanmaq lazımdır. Bu, onların tərbiyəsi ilə bağlı cəmiyyətdə neqativ halların formalaşmasının da qarşısını alar. Düşünürəm ki, belə olsa, onların təhsilə meyli də artar. Proqramın genişləndirilməsi fonunda növbəti mərhələdə qız uşaqlarının kirayə problemini həll etmək lazımdır”.
Sosioloq onu da vurğuladı ki, tələbələrə mənzil kirayə verilərkən mənzilin oğlan-qız üstündə dayanması əsassızdır.
Günel CƏLİLOVA
