Məlum olduğu kimi, 2018-ci ilin dekabr ayında Nazirlər Kabineti tərəfindən “Qəbiristanlıqların salınması və idarə olunması Qaydaları”nı təsdiqlənib. Təsdiq olunan qaydalara əsasən qəbiristanlıqlar yerli bələdiyyələrin idarəçiliyinə verilib. Bildirək ki, Bakıda 100-ə yaxın qəbiristanlıq var. Onlardan sadəcə 32-si Bakı Əhaliyə Vətəndaşlıq Xidməti Trestinə (BƏVXT) tabedir. Məlumatlara görə, artıq 14 qəbiristanlıq bələdiyyələrin balansına verilib. Qalanlarının da bələdiyyələrin balansına verilməsi istiqamətində işlər davam etdirilir.
Təsdiq olunan qaydalardan biri də qəbiristanlıqlarla bağlı məlumat bazasının yaradılmasıdır. Məlumat bazasında məzar daşı, dəfn olunduğu şəhər və yer qeyd ediləcək. Ölən şəxsin yaxınları dünyanın istənilən yerindən həmin sayta daxil olaraq məzarın harada yerləşdiyini öyrənə biləcək. Proqram təminatında nömrələnmiş qəbirlərin kimə aid olduğu haqqında məlumatlar elektron sistemə qeyd ediləcək.
Artıq bəzi qəbiristanlıqların saytı yaradılıb. Bu qayda zamanla bütün qəbiristanlıqlarda tətbiq olunacaq.
Binəqədi Qəsəbə Bələdiyyəsi - Aytac Əliyeva: “Binəqədi Qəsəbə Bələdiyyəsi də qəbir yerlərinin elektron bazasını yaradır”
Binəqədi Qəsəbə Bələdiyyəsinin sədri Aytac Əliyeva bildirdi ki, qəbiristanlıqlarla bağlı bir sıra yeniliklərə start verilib: “Binəqədi Qəsəbə Bələdiyyəsi də qəbir yerlərinin elektron bazasını yaradır. Bu istiqamətdə aparılan işlərin bir hissəsi yekunlaşıb. Belə ki, qəsəbə ərazisindəki qəbiristanlıqlar bələdiyyənin balansına keçərkən, həmin məzarlıqlarda dəfn edilənlərin arxiv qeydiyyat kitabları da götürülüb. Həmin məlumatların elektron bazası hazırlanıb. Bizim qəsəbə ərazisində qəbiristanlıqlardan ikisi bələdiyyənin balansına verilib. Bunlardan biri 23 hektar ərazisi olan kənd qəbiristanlığı, digəri isə 4 hektar ərazisi olan Keyrəki qəbiristanlığıdır. Amma qəsəbənin ərazisində iki sahibsiz qəbiristanlıq da var. Onlardan biri başqa dinlərə mənsub şəxslərin dəfn edildiyi qəbiristanlıqdır. Digəri isə Keyrəki vulkanının arxa tərəfində yerləşən 2 hektar ərazisi olan qəbiristanlıqdır. Həmin qəbiristanlıq da ərazi hüdudlarına görə əslində Binəqədi Qəsəbə Bələdiyyəsinin ərazisinə düşür".
Yasamal Bələdiyyəsi: “Qəbiristanlığın abadlaşdırılması ilə yanaşı informasiya sisteminin formalaşdırılmasına başlayıb”
Qəbiristanlıqları təhvil alan bələdiyyələrdən biri olan Yasamal Bələdiyyəsi qəbiristanlığın abadlaşdırılması ilə yanaşı informasiya sisteminin formalaşdırılmasına başlayıb. Adıçəkilən bələdiyyə tərəfindən qəbiristanlığın saytı da yaradılıb. Bundan sonra qəbirlərinin şəkilləri çəkiləcək və saytda yerləşdiriləcək.
Yasamal Bələdiyyəsindən verilən məlumata görə, avqustun 13-dən etibarən Yasamal qəbiristanlığında qəbirlərin rəqəmlənməsinə başlanılıb: “Yasamal qəbiristanlığı qəbirlərin nömrələnməsi prosesi üçün portallara bölünüb. Bildiyiniz kimi, digər qəbiristanlıqlardan fərqli olaraq, Yasamal qəbiristanlığı paytaxtın ən böyük məzarlıqlarından biridir. 2018-ci il dekabrın 4-də "Qəbiristanlıqların salınması və idarə olunması Qaydaları" ərazi üzrə bələdiyyələrə həvalə edilib. Qərara əsasən, Yasamal qəbiristanlığında məzarların nömrələnməsi prosesi artıq başlanıb. Məzarlığın bir neçə girişinin olduğunu nəzərə alaraq, avqustun 13-dən etibarən qəbiristanlıq ərazisi doqquz portala ayrılıb. Ümumilikdə daha əvvəldən özünə dəfn üçün yer alan və hasarlanan 231 qəbir yeri (ümumilikdə 1200-dən çox qəbir) nömrələnib. Bu proses bütün qəbirlər nömrələnənə qədər davam edəcək. Nömrələnən qəbirlər haqqında məlumatlar elektron qaydada siyahıya alınacaq. Onu da bildirək ki, bəzi qəbirlər var ki, onlar çox baxımsız haldadır. Üzərindən yazılar belə silinib. Biz həmin qəbirlərin məlumatlarını (ad, soyad, doğum və ölüm tarixləri) bərpa edərək siyahı tərtib edirik. Nömrələnən qəbirlərin yanında vurulan kiçik qara lövhədə portalın nömrəsi, qəbirin nömrəsi, həmin sahədə neçə nəfərin dəfn olunması (ad, soyad, doğum və ölüm tarixləri) və daha neçə dəfn üçün qəbir yerinin mövcud olduğu qeyd ediləcək. Bir portalda birdən 10 minə qədər olan qəbir yerləşdiriləcək. Digər portalda isə 10 mindən 20 minə qədər qəbir yerləşəcək. Bu proses bəzən mərhumlarının harada dəfn olunduğunu unudan insanların da işini asanlaşdıracaq.
Nəzərə almaq lazımdır ki, elə insanlar var ki, ölkədə yaşamır və uzun illər rəhmətə gedən doğmasının məzarını ziyarət edə bilmir, yerini belə unudur. Sistemləşmə bu kimi problemləri həll edəcək. Burada milyonlarla qəbir var. Qarşıya qoyulan işlərin təxminən iki il ərzində yekunlaşmasını planlaşdırırıq".
İsmayıl Əhməd: “Qəbiristanlıqlarla bağlı məlumat bazasının yaradılması müsbət haldır”
İlahiyyatçı alim İsmayıl Əhməd bizimlə söhbətində qeyd etdi ki, qəbiristanlıqlarla bağlı məlumat bazasının yaradılması müsbət haldır: “Həmin məlumat bazasında qəbir yerlərinin hansı tərəfdə olması, nömrəsi və ya hansı rayonda olduğu göstəriləcək. Belə olarsa, müəyyən səbəblərdən uzun müddət yaxınının məzarını ziyarət edən qəbir yerini tapmaqda çətinlik çəkməyəcək. Qəbiristanlığın məlumat bazasına daxil olmaqla rəhmətə gedən şəxsin məzarının hansı tərəfdə olmasını öyrənə biləcək”.
Günel CƏLİLOVA
