“Din xadimlərimiz bu kimi mənfi halların qarşısının alınması üçün Azərbaycanın mənəvi mühitində bir informasiya istehkamı yaratmalıdır”
“Komitənin din xadimlərinin sosial şəbəkələrdə aktiv olması ilə bağlı çağırışını birmənalı olaraq təqdir edir, dəstəkləyirəm”
Sosial şəbəkələrin açıq platforma olmasından müxtəlif müstəvilərdə sui-istifadə halları mövcuddur. Dini radikal qruplaşmalar, xurafat, cəhalət yayan qüvvələrin sosial şəbəkələrdə aktiv zərərli fəaliyyət göstərməsi birbaşa həm dinə, həm də cəmiyyətə zərbə vurur. Gizli deyil ki, ayrı-ayrı dini qruplaşmaların üzvləri facebook və digər sosial şəbəkələr üzərindən dinimizlə heç bir bağlılığı olmayan, insanları qaranlığa, cəhalətə sürükləyən video çağırışlar, mesajlar, statuslar paylaşırlar. Cəmiyyətə bölücülük yaratmağa hesablanan bu kimi hallar sosial şəbəkələrdən istifadə edən sağlam fikirli, düşüncəli insanları ciddi şəkildə narahat edir. Zərərli təmayüllərin üzvüləri, xüsusən də islam tarixi, dünyası üçün əhəmiyyətli olan müqəddəs bayramlar, hüzn günləri ərəfəsində daha da aktivləşir və xurafat, cəhalət yayan fikirləri ilə sosial şəbəkələrin gündəmini zəbt edirlər. Sözsüz ki, islami dəyərlərlə, bütövlükdə islam fəlsəfəsi ilə daban-dabana ziddiyyət təşkil edən bu paylaşımlar, çağırışlar sağlam təfəkkürlü din xadimləri tərəfindən əsaslandırılmış şəkildə cavablandırılmalıdır.
Sosial şəbəkələrdə bu kimi halların qarşısının alınması, şübhəsiz ki, hələlik mümkün deyil, lakin din xadimlərinin bu məsələdə aktivliyi onların zərərli fəaliyyətinin zəifləməsinə səbəb ola bilər.
Dini Qurumlarla İş üzrə Dövlət Komitəsi din xadimlərini bu kimi məsələlərlə barışmaz olmağa və sosial şəbəkələrdə aktiv iştirak etməyə çağırıb. Komitənin sədr müavini Səyyad Salahlı (Aran) Qəbələdə Dini Qurumlarla İş üzrə Dövlət Komitəsi (DQİDK) və Qəbələ Rayon İcra Hakimiyyətinin (RİH) birgə təşkilatçılığı ilə "Azərbaycanda dövlət-din münasibətləri: tarix və müasirlik" mövzusunda ikigünlük seminar-müşavirədə bildirib ki, din pərdəsi altında gizlənmiş, İslamı təhrif edən, xurafatı, cəhaləti yayan, insanlar arasında ixtilafa səbəb olacaq çağırışlar edən, məzhəb ayrıseçkiliyi salan, digər dinlərə münasibətlərə ciddi zərbə vuracaq materialları yayan qüvvələrə qarşı din xadimlərimizin, ilahiyyatçılarımızın, dini icmalarımızın üzərinə də böyük məsuliyyət düşür. Onlar İslamın, dinimizin gözəlliklərini, insanpərvər dəyərlərini, həmrəyliyə və birliyə çağıran xüsusiyyətlərini insanlarımıza sadəcə məsciddən yox, həm də məhz sosial media vasitəsilə çatdırmaqda aktivlik nümayiş etdirməlidirlər.
Sədr müavini nümunəvi dövlət-din münasibətləri, milli-mənəvi dəyərlərimizin qorunması, tolerant və multikultural ənənələrin möhkəmləndirilməsi istiqamətində həyata keçirilən tədbirlərin əhəmiyyətindən, o cümlədən din xadimlərinin sosial şəbəkələrdən aktiv istifadə etməsinin vacibliyindən danışıb.
“Ölkəmizdə hökm sürən multikulturalizm və dinlərarası tolerantlıq mühitinə qarşı əsas təhdidlərdən biri dini radikalizmdir. Bunun yaranma səbəblərindən biri İslam dini haqqında məlumatsızlıq, yad dini ideologiyaların yayılması cəhdləridir. Dini ekstremizm və dini radikalizmlə mübarizədə və bu kimi mənfi halların yayılmasında sosial şəbəkələrin rolu danılmazdır”-deyə bildirən qurum rəsmisi sosial medianın vətəndaş cəmiyyətinin formalaşması üçün başlıca faktorlardan biri olduğunu deyib. Diqqətə çatdırıb ki, din pərdəsi altında gizlənmiş, İslamı gözdən salan qüvvələrin çirkin əməlləri üçün sosial media imkanlarından çox effektli şəkildə istifadə edirlər. Sədrin birinci müavini din xadimlərini sosial medianın gücündən və imkanlarından istifadə edərək respublikamızda sabitliyi pozmaq istəyən, yüksək dini ideyalar uğrunda mübarizə pərdəsi altında fəaliyyət göstərən qrupların əsl simasının ifşa edilməsində prinsipiallıq və aktivlik nümayiş etdirməyə çağırıb.
Tanınmış ilahiyyatçı Hacı Təyyar Hüseynli baki-xeber.com-a bildirdi ki, Azərbaycanda mövcud olan tolerant mühiti, dinlərarası sağlam əlaqələri pozmaq istəyən və dövlətçiliyimizə qarşı təxribat törətməyə cəhd göstərən qüvvələrin apardıqları zərərli təbliğata qarşı sağlam düşüncəli din xadimləri hər zaman barışmaz mövqe sərgiləyib. “Dini komitənin din xadimlərinin sosial şəbəkələrdə aktiv olması ilə bağlı çağırışını birmənalı olaraq təqdir edir, dəstəkləyirəm. Hazırda sosial şəbəkələrdə kütləvi şəkildə insanlara sosial, ictimai-siyasi və digər məsələlərlə bağlı rəsmi müraciətlər olunur və bu müraciətlərə də saysız insanlar dəstək verir. Bu, günümüzün ən aktual məsələlərindən biri kimi daim ictimaiyyətin diqqətindədir. Azərbaycanda mövcud olan sağlam dini mühitdə pozuculuq, çaşqınlıq yaratmaq, dinlərarası əlaqələri pozmaq məqsədilə yanlış nəsnələri təbliğ edən, bu xoşagəlməz missiyanı yerinə yetirən qüvvələr sosial şəbəklərdən də istifadə edirlər. Bütövlükdə, onların bu çağırışı Azərbaycandakı sağlam dini ab-havanı pozmağa hesablanıb. Hesab edirəm ki, onların bu zərərli çağırışlarının qarşısının alınmasında din xadimlərimiz yaxından iştirak etməlidir. Din xadimləri, dini icmalar bu məsələdə fəallaşmalı, ayıq-sayıq olmalıdır. Çünki Azərbaycanda bütün dinlərə böyük qayğı və diqqət var, bütün dinlərin, konfensiyaların təmsilçiləri müsəlmanlarla dostluq, sülh şəraitində yaşayır, bu tolerant mühitdə birgə fəaliyyət göstərirlər. Ölkəmizdəki toleratlıq və multikulturalizm mühiti Azərbaycanı istəməyən qüvvələr üçün qətiyyən sərfəli deyil, onlar bundan çox narahat olurlar. Ona görə də, həmin qüvvələr islama aid olmayan və düşüncələrində kök atan zərərli fikirləri sosial şəbəkələrdə yayır və başqalarını da öz cəhalət torlarına salmaq istəyirlər. Əlbəttə, bu kimi halların qarşısı alınmalıdır. Azərbaycanda kifayət qədər savadlı, əməlli, təməlli, obyektiv və sağlam düşüncə tərzi olan din xadimləri, sivil ilahiyyatçılar var. Din xadimlərimiz bu kimi mənfi halların qarşısının alınması üçün Azərbaycanın mənəvi mühitində bir informasiya istehkamı yaratmalıdır. Mən də bir sivil düşüncəli, Azərbaycan dövlətçiliyinə bağlı ilahiyyatçı kimi mənəvi mühitdə təbliğat aparıram. Çalışıram ki, bütün Azərbaycan cəmiyyəti, sosial kəsimi, bütövlükdə ümumxalq düşüncəsi üçün saflığa, şəffaflığa, ümimxalq, ümumdövlət mənafeyinə xidmət edən təbliğat aparım”.
H.T.Hüseynli qeyd etdi ki, sağlam düşüncəli bir ilahiyyatçı kimi həm sosial şəbəkələrdə, həm də ictimai həyatda islam dininə yad olan təzahürlərə qarşı mübarizə aparır. “Dini komitənin çağırışına cavab olaraq Azərbaycanın din xadimləri, ilahiyyatçıları, eləcə də dini icmaların təmsilçiləri fundamental şəkidlə Azərbaycandakı sağlam mənəvi, dini mühiti, tolerantlıq ab-havasını pozmaq istəyən qüvvələrə qarşı sosial şəbəkələrdə kəsin mövqe nümayiş etdirəcək və güclü bir müdafiə istehkamı quracaqlar”-deyə H.T.Hüseynli vurğuladı.
İradə SARIYEVA
