Dövlət Statistika Komitəsi məktəbəqədər təhsil müəssisələri ilə bağlı rəqəmlər açıqlayıb. Sözügedən rəqəmlərdən məlum olub ki, dövlət bağçalarında işləyən 16099 pedaqoji işçinin 31,8 faizi ali, 61,7 faizi orta ixtisas, 6,3 faizi isə tam orta təhsillidir. 1679 dövlət bağçasının müdirlərindən 69,9 faizi ali, 28,6 faizi orta ixtisas, 1 faizi isə tam orta təhsillidir. Ümumilikdə isə rəsmi statistikaya əsasən, 505 bağça müdirinin ali təhsili yoxdur.
Görünən odur ki, məktəbəqədər təhsil müəssisələrinin kadrlarla təminatında problemlər mövcuddur. Bağça müdirlərinin, tərbiyəçi müəllimlərin böyük hissəsi kollec məzunlarıdır. Belə məlumatlar var ki, onların böyük əksəriyyəti qiyabi təhsil alıb. Bu səbəbdən bağçaların səviyyəsi çox aşağıdır. Məktəbəqədər təhsilin nəinki kadr təminatı, eyni zamanda, tədrisi də yaxşı deyil. Ona görə də məktəbəqədər təhsil müəssisələrinin səviyyəsi artırılmalıdır. Digər tərəfdən, ölkədə məktəbəqədər təhsil müəssisələrinin sayı da azdır. Bu cür müəssisələrin sayı artırılmalıdır.
Bütün bunların fonunda, maraqlıdır, 505 bağça müdirinin ali təhsilinin olmamasına təhsil ekspertləri necə yanaşırlar? Ümumən ali təhsili olmayan şəxslərin bağça müdiri kimi çalışmasına münasibət necədir?
Məhərrəm Zülfüqarlı: “Ali təhsili olan şəxslər orada tərbiyəçi işləsə, daha məqbul olar”
Məsələyə münasibət bildirən təhsil sahəsi üzrə ekspert Məhərrəm Zülfüqarlı buna mənfi prizmadan yanaşdı: “Hesab edirəm ki, bağça müdirləri arasında bu qədər ali təhsili olmayan şəxsin olması düzgün deyil. Məktəbəqədər təhsil müəssisələrinə barmaqarası baxmaq olmaz. Bu cür müəssisələrə ali pedaqoji təhsili, iş təcrübəsi olan şəxslər rəhbər təyin edilməlidirlər. Ali təhsili olan şəxslər orada tərbiyəçi işləsə, daha məqbul olar. Kimi gəldi bağçaya müdir təyin etmək olmaz. Hesab edirəm ki, bu sahəyə nəzarət artırılmalıdır. Çünki elə məktəbəqədər təhsil müəssisələri var ki, orada yaşı keçmiş tərbiyəçilər çalışırlar. Kurrikulumlar, tədris metodiki vəsaitlər çox ciddi ekspertiza olunmalıdır. Bu qurumlar Təhsil Nazirliyinin tabeliyində olsa, daha yaxşı olar. Çünki bütün kurrikulum, tədris metodiki vəsaitlər Təhsil Nazirliyinin tərkibindədir. İcra hakimiyyətləri mütəxəssis baxımından yetərli deyillər. Ona görə də bütün bunlar nəzərə alınmalıdır”.
Vidadi ORDAHALLI
