Bakı küçələrinin işıqlandırılması məsələsi zaman-zaman müzakirə obyekti olub. Şəhərin bəzi yerlərində küçələr yaxşı işıqlandırılsa da, elə küçələr var ki, gecələr işıqlandırılımir.
Hətta Prezident İlham Əliyevin yanında sosial-iqtisadi sahə ilə bağlı keçirilən son müşavirədə ölkə başçısı paytaxt küçələrinin zəif işıqlandırılması ilə bağlı tənqidi fikirlər söyləyib. Dövlət başçısı bu sahədə ciddi problemlərin olmasına diqqət çəkib, xüsusilə şəhər ətrafının işıqlandırmadan kənarda qaldığını vurğulayıb: “Bakıda küçə işıqlandırılması hələ də lazımi səviyyədə deyil. Şəhərin mərkəzi təbii ki, işıqlandırılır, ancaq bəzi yerlərdə küçə işıqlandırılması yoxdur. Bu məsələyə çox ciddi diqqət göstərilməlidir”.
Ancaq son vaxtlar bu sahədə başqa bir problem özünü daha çox göstərməkdədir. Problem ondadır ki, son zamanlar gecə vaxtı bəzi küçələrin işıqlandırılması və mərkəzi yolları işıqlandıran dayaqlarda lampaların gündüzlər söndürülməməsi müşahidə edilir. Görürsən ki, gündüz saatlarında elektrik enerjisinin boşuna sərfi müşahidə olunur. Məsələn, dəfələrlə müşahidə edilib ki, saat 11-dir, amma küçə işıqları boşu-boşuna yanır. Hansı ki, səhər saat altı tamamda küçə və magistrallarda işıqlar söndürülməlidir. Nəzərə alsaq ki, yay fəslində hava tez işıqlanır, o zaman küçə işıqlarının bu qədər gec söndürülməsi dövlətə zərərdən başqa bir şey deyil. İstər şəhərin mərkəzində, istərsə də şəhərkənarı küçə və prospektlərdə belə hallar tez-tez yaşanır. Məsələn, Maştağa, Zabrat qəsəbələrində, Nərimanov heykəli ətrafındakı küçələrdə işıqların gündüzlər yanması tez-tez müşahidə edilir. Elə olur ki, gündüz saat 12 radələrinə qədər işıqlar yanılı vəziyyətdə olur. Küçələrin gündüz işıqlandırılmasının iqtisadi ziyanı ilə yanaşı, ekoloji zərəri də var. Ekoloqlar ehtiyac olmadığı halda küçə işıqlarının yandırılmasını məsləhət görmürlər. Çünki bu işıqlar ətrafa yüksək istilik verir.
Bakının elə küçələri var ki, işıqlandırılmasına ehtiyac olduğu halda, işıqlandırılmır.
“Azərişıq” ASC bəyan edir ki, küçələrin işıqlandırılması Səhmdar Cəmiyyətin səlahiyyətində deyil. Belə olan halda, problemin kökündə nə dayanır? Ekspertlər çıxış yolunu nədə görürlər?
Rəsul Cahangirli: “İzahat yoxdursa, o zaman müvafiq ölçü götürülməli və bununla bağlı sərt tədbirlər görülməlidir”
Məsələyə münasibət bildirən ekspert Rəsul Cahangirlinin sözlərinə görə, küçələrin işıqlandırılmasına cavabdeh olan qurum konkret müəyyən edilməli, bu qurumun məsuliyyəti artırılmalıdır: “Problem ondadır ki, küçələrin işıqlandırılmasına görə birbaşa cavabdehlik daşıyan strukturu müəyyənləşdirmək mümkün deyil. “Azərişıq” ASC deyir ki, bu onların səlahiyyətində deyil. Bakı Şəhər İcra Hakimiyyəti bəyan edir ki, işıqlandırılma infrastrukturunun qurulması Azərbaycan Avtomobil Yolları Dövlət Agentliyinə aiddir. Yəni qurumlar bu məsələdə məsuliyyəti bir-birinin üstünə atırlar. Hesab edirəm ki, başlıca olaraq bu məsələ yoluna qoyulmalıdır. Aidiyyəti qurumlar, əsasən də yerli icra hakimiyyəti orqanları bunu xüsusi nəzarətə götürməlidirlər. Günün günorta çağı küçə işıqları yanırsa, buna cavabdeh qurum izahat verməlidir. İzahat yoxdursa, o zaman müvafiq ölçü götürülməli və bununla bağlı sərt tədbirlər görülməlidir. Həqiqətən də gündüz vaxtı küçələrin saatlarla işıqlandırılması problemi var. Ona görə də küçələrdə monitorinq aparılmalı və bununla bağlı zəruri işlər həyata keçirilməlidir. Çünki bu sahədə bir sıra problemlər qalmaqdadır. “Azərbaycan Respublikasında yol hərəkətinin təhlükəsizliyinə dair 2019-2023-cü illər üçün Dövlət Proqramı” təsdiq edilib. Orada göstərilir ki, sutkanın qaranlıq vaxtı, məhdud görünmə şəraitində avtomobil yollarında müasir standartlara cavab verən süni işıqlandırma sistemləri, qurğu və vasitələri quraşdırılmalı, habelə yolların işıqlandırılmasında alternetiv enerji mənbələrindən istifadə təmin edilməlidir. Görünən odur ki, bəzi qurumlar proqramdan irəli gələn məsələlərin həllinə laqeyd yanaşırlar. Hesab edirəm ki, bu problemin həllinə nəzarət artırılmalıdır”.
Vidadi ORDAHALLI
