23/09/2019 12:19
728 x 90

Məhərrəmlikdə Azərbaycanı yad islamçı cərəyanların müdaxiləsindən qorumaq üçün mühüm addım...

img

Məhərrəmlik ayının başlanmasına iki həftəyə yaxın vaxt qalıb. Ölkəmizdə də qeyd edilən Məhərrəmlik cəsarətin, rəşadətin, zülmə qarşı mübarizənin, haqq uğrunda savaşın gerçək bir simvoluna çevrilib. İslam şəhidlik məktəbinin simvolu olan İmam Hüseynin xatirəsinin anıldığı, onun şücaətinin, haqq-ədalət uğrunda verdiyi mücadilənin xatırlandığı bu ay öz özəlliyi ilə diqqəti çəkir.  

Məlum olduğu kimi, sentyabrın 1-də müsəlman dünyasında Məhərrəmlik ayı başlanır.

Dini Qurumlarla İş üzrə Dövlət Komitəsinin sədr müavini Səyavuş Heydərov Astarada “Din və ideoloji təhlükəsizlik” mövzusunda keçirilən seminar-müşavirədə qurumun Məhərrəmlik ayı ilə bağlı mövqeyini açıqlayıb. O qeyd edib ki, Məhərrəmlik ayının başlanması ilə əlaqədar məscidlərdə və digər ibadət yerlərində dini mərasimlərin icrası zamanı Qafqaz Müsəlmanları İdarəsinin verdiyi fətvanın tələblərinə ciddi riayət olunması vacibdir.

Komitə rəsmisi bildirib ki, hazırkı dövrdə dünyanın bir çox dövləti dini ekstremizm və terrordan ciddi əziyyət çəkir, terror hadisələri səbəbindən bölgələrdə ictimai sabitlik pozulur: “Dinin əhalinin dinclik və etibarına təsir edəcək şəkildə terrorçu və ekstremist qruplar tərəfindən istismarı dövlət təhlükəsizliyi üçün böyük təhdid yaradır. Bu baxımdan dinin insan mənəviyyatında, əxlaqında və ictimai şüurunda oynadığı mühüm rolun və təsirin doğru məcraya yönləndirilməsi mühüm məsələdir”.

Sədr müavininin bildirdiyinə  görə, ölkəmizdə din dövlətdən ayrı olsa da, dövlət ölkədəki dini duruma və vətəndaşların təhlükəsizliyinə görə bilavasitə məsuliyyət daşıyır.

Dövlətimizin dini ekstremizmin qarşısının alınması, vətəndaşlarımızın yad dini ideologiyaların təsirindən qorunması, ölkədəki dini durumun sabit saxlanması istiqamətində həyata keçirdiyi tədbirlərin önəminə diqqət çəkən sədr müavini hazırda dünyada, xüsusilə müsəlman ölkələrində sabitliyin pozulmasında din amilinin xüsusi rol oynadığını və beynəlxalq güclərin bu vəziyyətdən məharətlə istifadə etdiyini diqqətə çatdırıb. Cəmiyyətdə dini biliklərin yetərsizliyinin insanpərvərlik prinsipləri ilə ziddiyyət təşkil edən zərərli fikirlərin, məzhəbçilik və təriqətçilik kimi mənfi təzahürlərin yayılmasına səbəb olduğunu nəzərə çatdıran S.Heydərov bu kimi tendensiyalarla mübarizədə ən səmərəli metodlardan birinin maarifləndirmə işinin gücləndirilməsi olduğunu deyib.

Komitə sədrinin müavini çıxışında, həmçinin, ölkəmizin təhlükəsizliyinə mümkün təhdidlərin qarşısının alınmasında ən mühüm vasitə olan vətənpərvərlik, dövlətçilik amallarının, milli-mənəvi irsin, adət-ənənələrin aşılanması, cəmiyyətin, xüsusilə gənc nəslin dini dözümlülük və tolerantlıq mədəniyyətinin inkişaf etdirilməsi ruhunda tərbiyə olunmasının önəmindən danışıb.

Məhərrəmlik ayında yad islamçı qüvvələr dini kəsimləri hansısa bir təhlükəli addım atmağa vadar etməyə cəhd göstərə bilərmi? Söhbət hansı təhlükələrdən gedir?

  • İsmayıl Əhməd: “Ən böyük təhlükələrdən biri Məhərrəmlik mərasimlərində insanlara Məhərrəmlik fəlsəfəsinin deyil, xurafatın çatdırılması ilə bağlı ola bilər”

Tanınmış ilahiyyatçı İsmayıl Əhməd “Bakı-Xəbər”ə bildirdi ki, ola bilsin, bəzi qüvvələr əhali arasında xurafat yaymaqla məşğul olsun. “Ən böyük təhlükələrdən biri Məhərrəmlik mərasimlərində insanlara Məhərrəmlik fəlsəfəsinin deyil, xurafatın çatdırılması ilə bağlı ola bilər. Yaxud xarici ölkələrdən bəzi təbliğatçıların bura gəlib Məhərrəmlik məclislərini aparması məsələsi də istisna deyil. Əgər komitənin bəyanatında bu məsələr nəzərdə tutulursa, bu çox müsbət haldır. Azərbaycanda Məhərrəmlik mərasimlərində məscidlərdə insanlara maarifçilik xidməti göstərəcək kifayət qədər savadlı ruhanilər, insanlar var” - deyə İ.Əhməd bildirdi.

  • Hacı Təyyar Hüseynli: “Azərbaycan dövlətinin əleyhinə təxribatlar törədən, ölkəmizdə ictimai-siyasi sabitliyi pozmağa cəhd göstərən müəyyən qüvvələr bu matəm mərasimlərindən...”

İlahiyyatçı Hacı Təyyar Hüseynli də qeyd etdi ki, ölkəmizin dini kəsimləri, xüsusən də şiə məzhəbinə aid olanlar Məhərrəmliyi iki aylıq matəm kimi keçirirlər. “Əlbəttə, Məhərrəmlik və bu matəm təkcə İslam dünyası üçün deyil, bütün dünya üçün düşündürücü bir məsələdir. Yəni bəşəriyyətin sonuncu elçisinin ailəsinə, nəvəsinə qarşı əsrlər əvvəl 30 min nəfərlik ordu tərəfindən tarixdə misli görünməyən belə bir haqsızlıq baş verib. Bizim özümüz də, Azərbaycan xalqı da 20 Yanvar hadisəsi kimi faciə yaşamışıq, imperiyanın haqsızlığı ilə üzləşmişik. Bir çox işğallara, terror aktlarına məruz qalan bir xalq kimi faciələr yaşamışıq. Biz haqsızlığın nə olduğunu bilən bir xalqıq. Hesab edirəm ki, Kərbəla hadisəsi də insanlıq üçün bir ibrətdir. Bu hadisə baş verməməli idi, özü də müqəddəs ailəyə qarşı. Ancaq baş verdi. Dini Komitədən edilən xəbərdarlığa gəlincə, deyim ki, bu qurum gözlənilən bəzi təhlükələrlə bağlı cəmiyyəti ayıq-sayıq olmağa çağırır. Bilirsiniz ki, dinin içində, müqəddəs amalların içində də məqsədli şəkildə siyasi qatqılar ola bilər. Yəni Azərbaycan dövlətinin əleyhinə təxribatlar törədən, ölkəmizdə ictimai-siyasi sabitliyi pozmağa cəhd göstərən müəyyən qüvvələr bu matəm mərasimlərindən istifadə etməyə cəhd edə bilərlər. Bəzi qüvvələr var ki, onlar bu kimi dini mərasimlərdən yararlanmağa, öz çirkin niyyətlərini, radikal düşüncələrini yaymağa çalışırlar. Bu qara qüvvələr bizim xalqımızı, dövlətçiliyimizi, ölkəmizdə mövcud olan tolerant mühiti sevməyən, qəbul etmək istəməyənlərdir. Bir ilahiyyatçı kimi fikrim belədir ki, heç bir vaxt peyğəmbərlərin, imamların adından, müqəddəs əqidə yolundan sui-istifadə etmək olmaz. Yəni Məhərrəmliyə bir siyasi çalar qatıb və hanısa bir mənfi missiyanı bu müqəddəs bayraq altında reallaşdırmaq nə Allaha xoş gedər, nə də dinimiz üçün qəbul edilən olar. Saflığın altında çirkin məqsəd həyata keçirmək qəbuledilməzdir. Məsələ burasındadır ki, bəzi radikal qüvvələr bu ilahi, mənəvi duyğudan sui-istifadə etmək niyyətinə düşürlər”.

H.T.Hüseynli bildirdi ki, Əhli-Beytə sayğı, məhəbbət bəsləyən insanların reaksiyası şəffaf olmalıdır və heç bir təxribatı əks etdirməməlidir. Azərbaycan Respublikasında dinin dövlətdən ayrı olduğunu vurğulayan H.T.Hüseynlinin sözlərinə görə, bununla belə, milli-mənəvi dəyərlərin təbliğinə dövlət səviyyəsində böyük əhəmiyyət verilir və bu istiqamətə Prezidentin Ehtiyat Fondundan maliyyə dəstəyi verilir. “Respublikamızda mənəvi mühit çox azaddır. Bu azadlıqdan da istifadə etmək istəyən qüvvələr var. Hər şey çərçivəsində olmalıdır, həddi aşmadan. Fikrimi Qurani Kərimdən bir nümunə ilə yekunlaşdırmaq istəyirəm. “Həddi aşmadan, orta həddə”... Biz müqəddəs xalqıq və müqəddəs xalq kimi həmişə zülmə məruz qalmışıq. Allah bu zülmləri bizdən uzaq etsin” - deyə müsahibimiz vurğuladı.

İradə SARIYEVA

Son xəbərlər