Bakıətrafı kənd və qəsəbələrin əksəriyyətində məhəllədaxili yolların acınacaqlı vəziyyətdə olduğu məlumdur. Yayda bu yollarda toz əlindən tərpənmək olmur. Yollar elə bərbad gündədir ki, inanmaq olmur Bakının bir neçə kilometrliyində belə yollar var. İstənilən fəsildə bu yollarda hərəkət edən avtomobillər ciddi texniki problemlərlə üzləşirlər. Payız-qış aylarında bu kənd və qəsəbələrdə yaşayanlar, o cümlədən, yeni salınmış yaşayış məhəllələrinin sakinləri dərin gölməçələrdən, az qala dizə çıxan palçıqdan əziyyət çəkməli olurlar.
Bakıətrafı kənd və qəsəbələrin çoxunda məhəllədaxili yolların vəziyyəti ötən illərdə xeyli asfalt işlərinin görülməsinə baxmayaraq, əsasən bərbad olaraq qalır. Ya görürsən ki, asfalt örtüyü yaxşı salınmayıb, ya da heç ümumiyyətlə yol asfalt deyil. Sakinlər məhdud imkanları hesabına yola çınqıl tökürlər ki, bunun da ömrü çox olmur. İritonnajlı avtomobillərin intensiv hərəkəti kənd və qəsəbədaxili yolların daha da bərbad günə düşməsinə gətirib çıxarır. Xüsusən də Masazır, Binə, Bülbülə, Buzovna, Hövsan, Ramana və digər qəsəbələrdə məhəllədaxili yollar bərbaddır. Bağ mövsümü ilə əlaqədar Masazırda qalan paytaxt sakinləri yollardan çox əziyyət çəkirlər.
Onu da qeyd edək ki, Prezident İlham Əliyev Bakıətrafı kənd və qəsəbələrin yol infrastrukturunun yaxşılaşdırılmasını Dövlət Proqramına daxil edib. Bir sıra görüşlərdə sözügedən yolların asfaltlaşdırılmasını qaldırıb. Ancaq belə görünür ki, müvafiq qurumlar və buna cavabdeh olan məmurlar bu işləri görməkdə qərarlı deyillər. Nə icra orqanları, nə bələdiyyələr, nə də digər qurumlar bununla məşğul olurlar. Belə olmasaydı, Bakıətrafı kənd və qəsəbələrin yolları bərbad vəziyyətdə olmazdı.
Məsələ ilə əlaqədar Azərbaycan Avtomobil Yolları Dövlət Agentliyi ilə əlaqə saxlamağa çalışsaq da, təəssüf ki, buna cavab verən olmadı.
Məhərrəm Zülfüqarlı: “Təəssüflər olsun ki, icra orqanları və bu sahə ilə məşğul olan digər qurumlar bu işə səhlənkar yanaşırlar”
Sözügedən məsələni dəyərləndirən İctimai Problemlərin Tədqiqi Assosiasiyasının rəhbəri Məhərrəm Zülfüqarlı hesab edir ki, bu, bəzi məmurların məsuliyyətsizliyindən irəli gəlir: “Həqiqətən də bu problem var. Düzdür, son illər ölkədə yol infrastrukturunun inkişaf etdirilməsi ilə bağlı bir sıra işlər görülüb. Paytaxtda və bölgələrdə yeni yollar, yol ötürücüləri salınıb. Müasir yol infrastrukturu qurulub. Bütün bunlar öz yerində. Ancaq bunu Bakıətrafı kənd və qəsəbələrin yollarına aid etmək mümkün deyil. Ona görə ki, bu sahədə vəziyyəd çox acınacaqlıdır. Çünki bu yollara baxan yoxdur. Bələdiyyələrin imkanları məhdud olduğuna görə bu məsələnin öhdəsindən gəlmək gücündə deyillər. Bu ancaq dövlət vəsaiti hesabına həll edilməlidir. Ancaq təəssüflər olsun ki, icra orqanları və bu sahə ilə məşğul olan digər qurumlar bu işə səhlənkar yanaşırlar. Əhalinin artması, qəsəbədaxili yolların düzəldilməməsi bu sahədə problemlərin artmasına rəvac verir. Ona görə də hesab edirəm ki, bununla bağlı nəzarət tədbirləri gücləndirilməlidir. Vəzifəsinin öhdəsindən gələ bilməyənlər işdən azad edilməlidirlər. Məmurlar Prezidentin bununla bağlı tapşırıqlarını icra etməlidirlər. Çünki bu onların borcudur”.
Vidadi ORDAHALLI
