Azərbaycanlı qızları açıq fahişəliyə çağıran sosial şəbəkə istifadəçilərinin sayı çoxalır

Sosial şəbəkələr cəmiyyətimizin ən çox istifadə etdiyi bir platformadır. Bu gün vəzifəsindən, tutduğu mövqedən asılı olmayaraq, çox insan müxtəlif sosial şəbəkələrdən istifadə edir. Təbii ki, bu platformadan hər kəs öz əxlaqına, məqsədinə uyğun yararlanır. Sosial şəbəkələrdə müsbət təmayüllərlə, pozitiv göstəricilərlə yanaşı, kifayət qədər neqativ amillər də var ki, bu da normal düşüncəli insanları ciddi şəkildə narahat edir.

Sosial şəbəkələrdə dini ekstremizmdən, milli-irqi ayrıseçkilikdən tutmuş, fahişəliyin təbliğinə qədər neqativ əməllər sərgiləyənlər kifayət qədərdir.

Son zamanlar həm “Facebook”, həm də “İnstagram” kimi sosial platformalarda bəzən açıq, bəzən də feyk profillərdən Azərbaycan qızlarını fahişəliyə cəlb etmək niyyətində olanlara, bununla bağlı müxtəlif çağırışlar edənlərə çox rast gəlinir. Kifayət qədər profillər var ki, burada həm qadınlar, həm də translar, cinsi oriyentasiyasında problemi olanlar öz bədənlərini, intim xidmətlərini təklif edirlər. Xüsusən də translar bu istiqamətdə aktiv fəaliyyət göstərirlər. Müxtəlif açıq-saçıq pozalarda fotolar çəkdirərək yayırlar. Özü də bu şəxslər həm adlarını, həm telefon nömrələrini, həm də ev ünvanlarını açıq şəkildə yayımlamaqdan çəkinmirlər.

Məlum olduğu kimi, onlayn intim xidmət göstərənlərin və qadınları intim xidmətə cəlb edən insanların əksəri qadın adlarından istifadə edir. Çox təəssüf ki, bu hala qarşı heç bir tədbir görülmür. Yerli QHT-lər, eləcə də başqa qurumlar sosial şəbəkələri başına götürən bu mənfi tendensiyanın ifşa olunması istiqamətində etiraz səsini qaldırmırlar. Əslində, cəmiyyətə, xüsusən də gənc qızlara, qadınlara yönələn bu mənfi təbliğatın qarşısının alınması üçün tədbirlər görülməsi vacibdir. Əvvəllər bu kimi profillər daha çox “Facebook”da aktiv idisə, indi “İnstagram”ın daha kütləvi istifadəçiləri olduğu üçün, qadınları, qızları fahişəliyə cəlb edən və özü də fahişəlik xidməti göstərənlər bu platformada daha aktiv fəaliyyətə keçiblər.

Onu da deyək ki, bu profillərdən qızlara, qadınlara dostluq təklifi göndərilir, sonra isə onlarla “isti söhbət”lər aparılır. Çox təəssüf ki, bəziləri həmin insanların toruna düşürlər. Doğrudur, o insanların niyyətini anlayıb onları rədd edənlər də çoxdur, amma itkilərimiz də az deyil.

• Fatimə Hacıbəyli: “Translar var ki, özlərini, göstərdikləri intim xidmətlərin bütün növlərini sosial şəbəkələrdə paylaşırlar”

“Vəfa” Sosial İctimai Birliyinin sədri Fatimə Hacıbəyli bizimlə söhbətində bu cür profillərin fəaliyyətini kəskin qınadığını bildirdi. Onun sözlərinə görə, bir çox insan sosial şəbəkələrdən azad istifadə edildiyindən sui-istifadə edərək belə neqativ işlərlə məşğul olur. “Çox təəssüf ki, bu gün sosial şəbəkələrdə, internet resurslarında bu cür xoşagəlməz, mənfi fəaliyyətlə məşğul olanların sayı həddindən artıq çoxdur. Əvvəllər belələri daha çox “Odnoklassnik” sosial şəbəkəsində aktiv idilər. Çünki həmin sosial şəbəkə bir vaxtlar daha populyar və istifadəçiləri çox idi. Sonra “Facebook” və “İnstagram” daha aktiv platformalar kimi özünü göstərdikdən sonra həmin qüvvəllər bura keçdilər. Sosial şəbəkə üzərindən qadınları, qızları fahişəliyə cəlb edənlərin əksəriyyəti translardır. Onlar qadın adları altında feyk profillər yaradaraq özlərini ginekoloq, psixoloq kimi təqdim edirlər. Bu adamlar bir az gözəgəlimli, cəlbedici olan qızlara və qadınlara mesajlar yazıb onları söhbətə çəkirlər. Özü də qadınları fahişəliyə cəlb edənlər xanımlarla çox yüksək səviyyədə psixoloji söhbətlər aparmaq qabiliyyətinə malik hazırlıqlı adamlardır. Bəzən onların bu söhbətləri “faydasız” olmur, onlar bəzi xanımları öz toruna sala bilirlər. Qadınlarla bir az yazışıb onların vəziyyətini, ailə münasibətini, həyata baxışını öyrənirlər, sonra neqativ bir məsələ tapıb qadınları şantaj edirlər. Bu gün bu işdə translar daha aktivdirlər. Hətta onlar qız adları ilə oğlanlara mesaj yazıb intim əlaqə təklif edirlər, bir az yazışdıqdan sonra trans olduqlarını deyirlər. Onlar nəinki qızları, hətta oğlanları da öz çirkin fəaliyyətlərinə cəlb etməyə cəhd göstərirlər. Translar var ki, özlərini, göstərdikləri intim xidmətlərin bütün növlərini sosial şəbəkələrdə paylaşırlar. Hesab edirəm ki, bu neqativ halın qarşısının alınması üçün tədbirlər görülməlidir. Əks təqdirdə onların bu əməlləri xərçəng kimi daha geniş yayılacaq və daha çox insanı bədbəxt edəcək” - deyə F.Hacıbəyli qeyd etdi.

O bildirdi ki, artıq Türkiyədə və başqa ölkələrdə sosial şəbəkələr üzərindən qadınları, qızları fahişəliyə cəlb edən insanlar barədə hüquq müstəvisində tədbir görülür. Sosial şəbəkələrdə belə insanların əməllərindən zərər çəkənlər aidiyyəti qurumlara müraciət etməlidirlər. “Bilirsiniz, belə hallarla üzləşənlər aidiyyəti qurumlara müraciət etsələr, onların şikayətləri əsasında elə insanlara qarşı tədbir görmək mümkündür. Ümumiyyətlə, xanımlar tanımadıqları adamların mesajlarını blok etsinlər. Bu daha yaxşıdır” - deyə o bildirdi.

Leyla QARAXANLI