20/09/2019 23:06
728 x 90

Bakıda iki məktəbin bütün məzunları universitetə qəbul olundu

“Məktəbimizin tarixində ilk dəfədir belə bir hadisə baş verdi”

img

Azərbaycan orta ümumtəhsil məktəblərinin məzunlarının qəbul imtahanlarında göstərdikləri uğurlu nəticələrin sayı ilbəil artır. Artıq bu sahədə nümunəvi məktəblər formalaşmaqdadır. Bəzən deyirlər ki, Azərbaycanın orta ümumtəhsil məktəblərində dərslər keyfiyyətli keçilmir. Lakin son nəticələr deyilənlərin həqiqət olmadığını sübut edir.

Rəsmi məlumata görə, Bakıda iki orta məktəbin 11 a və 11 b siniflərini bitirmiş bütün məzunlar ali məktəbə qəbul olunub. Bakı şəhəri üzrə Təhsil İdarəsinin yaydığı məlumata görə, Yasamal rayonu  13 nömrəli tam orta məktəbin 11 a sinfini bitirən 22 məzunun hamısı 2018-2019-cu dərs ilində ali məktəblərə keçirilən qəbul imtahanlarında uğurla iştirak edərək tələbə adını qazanıb. Məzunlardan 8 nəfəri 500-dən yuxarı, 2 nəfəri isə 600-dən yuxarı bal toplayıb.

Binəqədi rayonunun 314 nömrəli tam orta məktəbinin humanitar təmayüllü 11 b sinfini bitirən 22 məzun da ali məktəblərə keçirilən qəbul imtahanlarında yaxşı nəticə göstərərək tələbə adını qazanıb. Məzunlardan 21-i III qrup üzrə, 1-i isə V qrup üzrə qəbul imtahanlarında uğur qazanıb. Onlardan 2 nəfəri 500-dən yuxarı, 20 nəfəri isə 200-500 balarası nəticə göstərib.

Adları çəkilən orta məktəblərin məzunlarının qazandıqları bu uğurun səbəbi nədir?  

  • İlham İsmayılov: “Məzunlarımızın qəbul imtahanlarında göstərdikləri böyük nəticə məktəbimizin nüfuzunu daha da yüksəltdi”

Binəqədi rayonu Biləcəri qəsəbəsində yerləşən 314 nömrəli tam orta məktəbin dərs hissə müdiri İlham İsmayılov “Bakı-Xəbər”ə bildirdi ki, məzunların qazandıqları bu uğur məktəbin özü və bütün kollektivi üçün, sözün həqiqi mənasında, sürpriz olub. İ.İsmayılov qeyd etdi ki, 11 b sinfinin bütün məzunları məktəbə böyük sevinc yaşadıb. “Məktəbimizin tarixində ilk dəfədir belə bir hadisə baş verdi. Bir sinfin bütün məzunlarının ali məktəbə daxil olması məktəbimizin kollektivi üçün böyük sürprizdir. Əlbəttə, burada müəllimlərimizin böyük zəhməti olmaqla məzunların da çalışqanlığı, biliyi böyük rol oynayıb. Sözün açığı, biz bu nəticəni gözləmirdik ki, bir sinfin bütün məzunları qəbul oluna bilər. Biz o məzunlarımızla fəxr edirik. Məzunlarımızın qəbul imtahanlarında göstərdikləri böyük nəticə məktəbimizin nüfuzunu daha da yüksəltdi” - deyə İ.İsmayılov vurğuladı. 

Qeyd edək ki, Biləcəri qəsəbəsində yerləşir 314 saylı məktəb 2007/ 2008-ci dərs ilindən fəaliyyət göstərir. Cari dərs ilində məktəbdə 1918 şagird təhsil alır ki, onlar 76 sinifdə komplektləşib. I-IV siniflər 31, V-IX siniflər 34, X-XI siniflər 7 , 4 məktəbəhazırlıq qrupu və 1 günü uzadılmış qrup fəaliyyət göstərir. Təlim Azərbaycan dilindədir. Məktəbdə 106 pedaqoji, 25 texniki işçi fəaliyyət göstərir. Məktəb binası 800 yerlikdir və 3 korpusdan ibarətdir. Məktəbdə 1 fizika, 1 kimya, 1 biologiya, 2 informatika, 1 əmək hazırlığı və 1 hərbi kabinet, 1 kitabxana fəaliyyət göstərir. Kitabxananın ümumi kitab fondu 28583 ədəddir. 1 bufet, 1 akt zalı, 1 idman zalı var. 314 saylı tam orta məktəbdə təhsilin keyfiyyətinin yüksəldilməsi istiqamətində aparılan məqsədyönlü işlərdən biri də fənlərin tədrisi vəziyyətinin müasir tələblərə cavab verən inteqrativ, İKT əsaslı təlim metodlarına uzlaşdırılmasından ibarətdir. Məktəbin bir çox müəllimləri yuxarıda qeyd olunanları həyata keçirmək üçün Təhsil Nazirliyi, bir çox beynəlxalq və yerli təşkilat tərəfindən təşkil olunmuş treninq və kursların iştirakçıları olmuş və müxtəlif innovativ layihələrlə bağlı sertifikatlara layiq görülmüşlər. 314 saylı orta məktəb şagirdlərin şəxsiyyət kimi formalaşmasında mühüm rol oynayan sinifdənxaric və məktəbdənkənar tədbirlərin keçirilməsinə də geniş yer verir. Məktəb şagirdlərinin respublika olimpiadasında və inşa yazı müsabiqələrinin şəhər turunda iştirak edərək yer tutmalarını göstərmək olar. Hər il məktəbin şagirdlərindən 600-dən yüksək bal toplayanlar olur. Müəllimlər arasında müsabiqə və layihələrdə iştirak edənlər var. Məktəb fiziki cəhətdən sağlamlıq imkanları məhdud uşaqlar üçün Binəqədi rayonunda evdə təhsilin təşkili üzrə mərkəz məktəbdir. Məktəb təhsil sahəsində yeniliklərin reallaşması istiqamətində durmadan çalışır və bu sahədə işini davam etdirir.

  • 13 nömrəli məktəbdən: “Məktəbimiz məzunlarımızın bu uğurları ilə yalnız fəxr edir”

Yasamal rayonunda fəaliyyət göstərən 13 nömrəli tam orta məktəbdən də bildirdilər ki, məzunların nəticələri onları ürəkdən sevindirir. 11 a sinfini bitirən 22 nəfər məzunun hamısının ali məktəbə daxil olmasının məktəbin böyük uğuru olduğunu deyən məktəb əməkdaşları hesab edirlər ki, məzunlar bu uğura müəllimlərin zəhməti ilə nail olublar. “Məktəbimiz məzunlarımızın bu uğurları ilə yalnız fəxr edir” - deyə məktəbdən bildirdilər.   

Qeyd edək ki, 13 saylı məktəb 1965-ci ildən Bakı şəhərinin Yasamal rayonunda fəaliyyət göstərir. Məktəbin güclü pedaqoji kadr potensialı var. Məktəbdə 1205 şagird təhsil alır ki, onların təlim-tərbiyəsi ilə 100-ə yaxın müəllim məşğul olur. Hazırda məktəb rus dili fənni üzrə pilot məktəbi kimi fəaliyyət göstərir. 1982-ci ildə məktəbə Şərq klassik ədəbiyyatını mükəmməl mənimsəmiş görkəmli pedaqoq Şəfiqə Əfəndizadənin adı verilib.

İradə SARIYEVA

Son xəbərlər