Bu gün dünyanın bütün ölkələrində intihar hadisələri baş verir. Hətta ən çox inkişaf etdiyi bildirilən dövlətlərdə, xüsusən də Avropada, ABŞ-da intihar hallarına daha çox rast gəlinir. Ümumiyyətlə, “insan niyə intihar edir” sualı əsrlərdir mütəxəssisləri ciddi şəkildə düşündürür. İntiharın qarşısının alınması üçün müxtəlif tədbirlər həyata keçirilsə də, bu da intihara hazırlaşan insanı niyyətindən döndərə bilmir.
Bizim ölkədə də intihar hadisələri baş verir. Çox təəssüf ki, insanlar çıxış yolunu intiharda görür. İntiharların səbəblərinin müxtəlif olduğu məlumdur. Sırf psixoloji məsələ olan bu halın heç bir siyasi səbəbi olmadığı da məlumdur. Çox təəssüflər olsun ki, bəzi qara qüvvələr, Azərbaycanı istəməyənlər müxtəlif vasitələrlə ölkəmizdə baş verən intihar hallarına siyasi don geydirməyə cəhd göstərir.
Mütəxəssislərin bildirdiyinə görə, biz əhalinin hər 1000 nəfərinə düşən intihar sayına görə Avropa və MDB üzrə az qala iki-üç dəfə yaxşı vəziyyətdəyik. Yəni həmin ölkələrlə müqayisədə Azərbaycanda intiharlar kütləvi xarakter daşımır.
Könül Vaqifqızı: “İntihar hadisələrini siyasiləşdirmək istəyənlər anti-Azərbaycan mövqedə dayanan insanlardır”
Psixoloq Könül Vaqifqızı baki-xeber.com-a bildirdi ki, bəzi xarici qüvvələrin təsirinə uyaraq Azərbaycanda baş verən intiharların sayını qəsdən şişirdənlər və buna siyasi don geydirmək istəyənlər cəmiyyətdə çaşqınlıq yaratmaq, ölkəmiz haqqında mənfi rəy formalaşdırmaq istəyən qüvvələrdir. K.Vaqifqızının sözlərinə görə, Azərbaycanda indiyə qədər hanısa bir siyasi motivə görə intihar edən şəxs olmayıb. Yəni Azərbaycanda baş verən intihar hadisələrinin siyasiləşdirilməsinin əsassız olduğunu deyən psixoloqun qənaətinə görə, bütün dünyada intiharın əsas səbəbi kimi psixoloji amil göstərilir. Bu gün Azərbaycan vətəndaşları arasında heç bir qeyri-bərabərliyin, ayrı-seçkiliyin olmadığını deyən K.Vaqifqızının bildirdiyinə görə, bir neçə il əvvəl də sosial şəbəkələrdə ölkəmizdə baş verən intiharların siyasi səbəblərlə bağlı olduğunu iddia edən, bununla da ölkəmizə qarşı çirkin kampaniya aparanlar olub. O, qeyd etdi ki, həmin dövrdə Daxili İşlər Nazirliyinin məlumatına əsasən intihar edənlərin statistikası mətbuatda yer aldı. Ekspertin sözlərinə görə, nazirlikdən intihar edənlərin əksəriyyəti ruhi xəstələr, xroniki alkoqolizm, narkomaniya və digər ağır xəstəliklərdən əziyyət çəkənlər olduğu açıqlanıb.
“Çox təəssüf edirəm ki, Azərbaycanda baş verən ən kiçik hadisələrə belə siyasi məna, çalar verən qüvvələr sosial şəbəkələrdə bu gün də çox aktivləşiblər. Birmənalı olaraq demək istəyirəm ki, Azərbaycanda baş verən intiharların səbəbi siyasi motivlərlə bağlı deyil. İntihar hadisələrini siyasiləşdirmək istəyənlər anti-Azərbaycan mövqedə dayanan insanlardır. Belə yanlış məlumatları yayan insanlar Azərbaycanın inkişafını istəməyən qüvvələr və onların əlaltılarıdır. Mənə elə gəlir ki, sosial şəbəkələrdə intihar mövzusunu məqsədli şəkildə gündəmə gətirib cəmiyyətdə xof yaratmaq istəyirlər. Lakin onlar buna nail ola bilməyəcəklər. Çünki Azərbaycan insanı yaxşı bilir ki, onun hüquq və azadlıqlarını qoruyan, sosial rifahını düşünən dövləti var. Azərbaycanda baş verən intihar hadisələrini siyasiləşdirməyə cəhd göstərənlərin məqsədi dövlətimiz haqqında beynəlxalq aləmdə mənfi rəy yaratmaqdır. Müqayisə üçün deyim ki, bu gün Ermənistanda intihar edənlər daha çoxdur və onların arasında qadınlar, uşaqlar, məmurlar da az deyil. Lakin bunu gündəmə gətirən yoxdur. Avropa ölkələri, eləcə də ABŞ, Rusiya və digər dövlətlərlə müqayisədə Azərbaycanda baş verən intiharların sayı çox azdır. Baş verən beş-altı hadisəni “kütləvi intihar hadisəsi” kimi təqdim etmək olmaz. Bu məsələni siyasiləşdirənlər bizi istəməyən qara qüvvələr olduğu heç kəsdə şübhə doğurmur” - deyə K.Vaqifqızı bildirdi.
Yeri gəlmişkən, Azərbaycanın baş psixiatrı, Azərbaycan Tibb Universitetinin rektoru Gəray Gəraybəyli də xarici KİV-ə açıqlamasında son vaxtlar baş verən intihar hallarının siyasiləşdirilməsinin qəti əleyhinə olduğunu bildirib. O, qeyd edib ki, bu məsələdə hər hansı bir siyasi motiv axtarmaq olmaz.
İradə SARIYEVA
