20/09/2019 23:09
728 x 90

Bakının 6 rayonunda köhnə binaların sökülməsi paytaxtın görkəmini necə dəyişəcək…

“Qəzalı vəziyyətdə olan binaların sökülüb yerində keyfiyyətli binaların inşa olunması ölkənin sosial siyasətinin tərkib hissəsidir”

img

Məlumdur ki, Bakının 6 rayonunda kəskin qəzalı binalarla bağlı yekun qərar verilib. Belə ki, kəskin qəzalı binalar söküləcək. Paytaxtın Binəqədi rayonunda 2 bina, Yasamal rayonunda 1 bina, Səbail rayonunda 1 bina, Sabunçu rayonunda 7 bina, Suraxanı rayonunda 4 bina, Xətai rayonunda isə 1 bina kəskin qəzalı olduğu səbəbindən söküləcək. Həmin binalarda bərpa-gücləndirmə və əsaslı təmir işlərinin aparılması mümkün olmadığından, sakinlərin köçürülməsi həyata keçiriləcək.

Bəllidir ki, əhalinin sosial vəziyyətinin yaxşılaşması istiqamətində dövlət tərəfindən mühum işlər görülür. Elə ölkə başçısı İlham Əliyev əhalinin mənzil şəraitinin yaxşılaşdırılması istiqamətində müvafiq qurumlara mütəmadi olaraq tapşırıqlar verir.

Məlumdur ki, Prezident İlham Əliyev hələ bu ilin əvvəlində bəyan etmişdi ki, qarşıdakı dövrdə sosial inkişafla bağlı mühüm islahatlar keçiriləcək. Bundan sonra həqiqətən də dövlət başçısının təşəbbüsü ilə iki böyük sosial islahat paketi qəbul olundu. Həmin sosial islahat paketinə daxil olan məsələlərdən biri də mənzil şəraitinin yaxşılaşdırılmasıdır. Elə bu minvalla, qəzalı vəziyyətdə olan yaşayış binaları aşkar olunaraq, sakinlərin rahatlığının təmin olunması üçün yeni, müasir standartlara cavab verən binalar inşa olunacaq.

  • İlqar Hüseynli: “Sevindirici haldır ki, artıq adıçəkilən binaların sökülməsi ilə bağlı qərar qəbul olunub”

Sosial sahə üzrə ekspert İlqar Hüseynli bildirdi ki, son zamanlar ölkə rəhbərliyi tərəfindən görülən işlərin əsas məqsədi əhalinin sosial vəziyyətinin yaxşılaşdırılmasıdır. Bu istiqamətdə çoxlu sayda iş görülür. Görülən işlərdən biri də mənzil şəraiti yararsız vəziyyətdə olan binaların yenisi ilə əvəz olunmasıdır: “Məlumdur ki, bu gün Bakının 6 rayonunda qəzalı vəziyyətdə olan binaların siyahısı tərtib olunub. Qəzalı vəziyyətdə olan binaların sakinləri həmin binalarda yaşamaqdan qorxurlar. Çünki istifadəyə yararsız olan binada hər an xoşagəlməz hadisə baş verə bilər. O insanların rahat və güvənli şəraitdə yaşamaları üçün həmin binalar sökülməlidir. Sevindirici haldır ki, artıq adıçəkilən binaların sökülməsi ilə bağlı qərar qəbul olunub. Qaydalara uyğun olaraq, bina sakinləri yeni və təhlükəsiz binalara köçürüləcək. Beləliklə, sakinlər rahat və güvənli şəraitdə yeni mənzillərində yaşayacaqlar”. 

Həmsöhbətimiz onu da vurğuladı ki, qəzalı vəziyyətdə olan binaların sökülüb yerində keyfiyyətli binaların inşa olunması ölkənin sosial siyasətinin tərkib hissəsidir.

Günel CƏLİLOVA

Son xəbərlər