Azərbaycan ali məktəblərində ödənişli təhsil alan tələbələrin bir sıra hallarda təhsil haqqını birdəfəlik ödəmədikdə ciddi problemlərlə qarşılaşdığı məlumdur. Hətta əlaçı tələbələr də belə çətinliklərlə üzləşirdi. Təhsil haqqını müəyyən olunmuş dövr ərzində ödəyə bilməyən tələbələrin ali məktəblərdən qovulması kimi halların da baş verdiyi gizlin deyil. Bu da sözsüz ki, həmin tələbələr və onların valideynləri tərəfindən narazılıqla qarşılanırdı.
Təhsil naziri Ceyhun Bayramovun ali təhsil müəssisələrinin rəhbərlərinə verdiyi tapşırıq tələbələrin narahatlığına artıq son qoyub. Belə ki, Təhsil Nazirliyinin İctimaiyyətlə əlaqələr sektorunun müdiri Cəsarət Valehovun mətbuata verdiyi məlumata görə, nazirliyin kollegiyasının qərarına əsasən, ali təhsil müəssisələrinin rəhbərlərinə tapşırılıb ki, ödənişli təhsil alan tələbələrin təhsil haqlarını təhsil aldığı müddətdə yarımilliklər üzrə ödənilməsinə şərait yaratsınlar.
Kamran Əsədov: “Bu, ali təhsilin əlçatanlığı və əhatə dairəsinin genişləndirilməsinə, inkişaf etməsinə, rəqabət qabiliyyətinin artırılmasına ciddi şəkildə təsir göstərəcək”
Məsələni şərh edən tanınmış təhsil eksperti Kamran Əsədov “Bakı-Xəbər”ə bildirdi ki, nazirin bu tapşırığı bu sahədə yaşanan mövcud problemin aradan qalxmasına səbəb olacaq. “İlk növbədə qeyd etmək istəyirəm ki, tələbələrdən təhsil haqqını birdəfəlik ödəməyi tələb etmək düzgün deyildi. Ödəniş hissə-hissə olmalı idi. Çünki valideynlərin vəziyyətini nəzərə almaq lazımdır. Təcrübə gösrərir ki, tələbələr imtahanlara buraxılmırlar və universitetdən xaric olunurlar. Azərbaycanda təhsil haqlarının ödənilməsi dünya təcrübəsindən fərqlidir. Dünyada tələbələr təhsil haqqını birinci kursdan sonuncu kursa qədər hissələrlə ödəmək imkanına malikdirlər. Son 5 il ərzində ölkəmizdə 7000 tələbə təhsil haqqını ödəyə bilmədiyi üçün təhsilini yarımçıq qoyub. Bundan başqa, 1992-2015-ci illər ərzində ali məktəblərdən 40 minə yaxın tələbə xaric edilib. Ödənişli əsaslarla oxuyan tələbə təhsil haqqını ödəməlidir. Bu, bütün dünyada belədir. Müvafiq vəsaiti ödəmək üçün imkanı olmayan tələbə müxtəlif variantlardan yararlana bilir. Kimisi hər hansı imkanlı şəxslərin hesabına oxuyur. Yəni tələbələrin imkanlarını, potensialını görən imkanlı şəxslər onların təhsil haqqını qarşılayır. Eləsi də var çalışdığı şirkətin vasitəçiliyi ilə bu problemi həll edir. O, məzun olduqdan sonra isə həmin şirkət kadr kimi potensialından faydalanır. Gənclərin bir qismi isə orta məktəbi bitirdikdən sonra işləyib, gələcəkdə alacaqları təhsil üçün pul yığırlar. Ona görə də Təhsil Nazirliyi tərəfindən ali məktəblərə göndərilən tövsiyə olduqca müsbət bir addımdır. Bu, ali təhsilin əlçatanlığı və əhatə dairəsinin genişləndirilməsinə, inkişaf etməsinə, rəqabət qabiliyyətinin artırılmasına ciddi şəkildə təsir göstərəcək” - deyə K.Əsədov qeyd etdi.
İradə SARIYEVA
