20/09/2019 23:07
728 x 90

Anormal bioloji varlıqdan şübhələnən kənd camaatı da ilk olaraq polisi köməyə çağırdı

“Harada vətəndaşların həyatına, sağlamlığına, dövlətçilik və konstitusion quruluş əleyhinə, təbiətin mühafizəsinə bir qərəz, bir təhlükə varsa, mütləq polis oradadır, xalq bilir ki, polis onu qoruyur”

img

Bu gün Azərbaycan polisi, sözün həqiqi mənasında, xalqın güvənc yerinə çevrilib. Ailədaxili münaqişədən tutmuş, təbii hadisələrə qədər insanlar üzləşdikləri hər bir problemə görə ilk olaraq polisə üz tuturlar. Bu da insanların polisə bəslədiyi inam və etibarın göstəricisidir. Sirr deyil ki, ölkəmizdə ictimai asayişin qorunmasında, təhlükəsizliyin, sabitliyin təmin olunmasında polisin müstəsna rolu var.

Doğrudur, bəzən Azərbaycan polisini ləkələmək, onun fədakar əməyini kölgəyə çəkmək istəyində bulunanlara da rast gəlinir. Lakin belələrinin apardığı uğursiz təbliğata, qarayaxmaya qətiyyən xalqımız əhəmiyyət vermir və dar günündə polisə əl uzadır, polis də ona uzanan əlləri havada qoymur, insanların dadına çatır. Elə bir təhlükə doğuran, yaxud təhlükəli olduğu şübhə doğurmayan hadisələr yoxdur ki, orada polisin müdaxiləsinə, dəstəyinə ehtiyac olmasın. Miqyasından, motivindən asılı olmayaraq, bütün şübhəli hadisələrin zərərsizləşdirilməsində əsas rolu polis oynayır. Bu da, dediyimiz kimi, birbaşa insanların polisə bəslədiyi güvənc, inam və etimadla bağlıdır.

Uzağa getməyək. Elə Ucar rayonunun Çiyni kəndində baş verən hadisəyə diqqət yetirək. Mətbuatda gedən məlumata görə, Çiyni kəndinin sakinləri bir neçə gündür qəribə varlıqla üzləşdiklərini deyirlər. Kənddə peyda olan əcaib varlıq insanları təşvişə salıb. Kənd sakinləri iddia edirlər ki, bir neçə gündür kənddə qəribə varlıq ortaya çıxıb. Xüsusən də gecələr həyətlərə girir, küçələrdə insanların qabağına çıxır. İnsanlar başdan ayağa tüklü olan bu canlının nə olduğunu müəyyən edə bilmirlər. O həm də çox sürətlə qaçır. Sakinlər deyirlər ki, onlar ehtiyat etdiyindən, gündüzlər əllərində ağac parçaları ilə gəzirlər. Onların sözlərinə görə, naməlum varlıq hündür divarlara da dırmaşır. Sakinlər bununla bağlı polisə də müraciət ediblər. Rayon Polis Şöbəsindən mətbuata verilən məlumata görə, kəndə polis əməkdaşları cəlb olunublar. Gecə saatlarında da kənddə yoxlamalar aparılır. Çiyni kənd icra nümayəndəsi Vüqar Zeynalov da bildirib ki, vətəndaşlarla söhbətlər aparılıb. Onlara gecə saatlarında tək gəzməmələri tövsiyə olunub.

Göründüyü kimi, insanlar sözügedən şübhəli varlıqla bağlı başqa qurumlara deyil, birbaşa daha çox inandığı, təhlükəsizliklərinin təminatına əsas verən polisə üz tuturlar.

Azərbaycan polisi xalqın etibarını, inamını necə qazanıb?

  • Şəmsəddin Əliyev: “Azərbaycan polisi xalqın inam və etimadını öz yüksək peşəkarlığı, fədakarlığı ilə qazanıb”

 “Polisə Dəstək” İctimai Birliyinin sədri, hüquqşünas Şəmsəddin Əliyev “Bakı-Xəbər”ə bildirdi ki, 100 yaşlı Azərbaycan polisi yarandığı gündən xalqımızın yanında olub və onun etimadını qazanıb, inam, güvənc yerinə çevrilib. “Əvvəla Azərbaycan polisinin Azərbaycan dövlətçiliyi qədər böyük tarixi var. Artıq biz polisin 100 illiyini qeyd etdik. Müasir Azərbaycan polisinin qarşısına qoyulan vəzifə və funksiyalar öz mənbəyini 100 il bundan əvvəl alıb. Hər dəfə təhlükəsizlik təmin olunarkən, ictimai qaydalar mühafizə edilərkən, ətraf mühit qorunarkən, hətta vətənin müdafiəsindən söhbət gedərkən burada polis əməkdaşlarının adları ön cərgələrdə çəkilir. Polis əməkdaşları arasında canını vətənə fəda edənlər də az olmayıb. İnsanların təhlükəsizliyini təmin etmək polisin əsas işidir və polislərimiz də bu işin öhdəsindən yüksək peşəkarlıqla gəlirlər. Harada vətəndaşların həyatına, sağlamlığına, dövlətçilik və konstitusion quruluş əleyhinə, təbiətin mühafizəsinə bir qərəz, bir təhlükə varsa, mütləq polis oradadır, xalq bilir ki, polis onu qoruyur. Ona görə də baş verən istənilən hadisə zamanı insanların ilk yadına düşən polis olur. İnsanlar polisə güvəndikləri üçün hər hansı bir təhlükə, şübhəli hadisə ilə bağlı ilk olaraq polisə üz tuturlar. Vətəndaşlar hətta ən kiçik bir problemə görə polisə müraciət edirlər. Vəhşi heyvanların hücumundan tutmuş, şübhəli hadisələrə qədər baş verən hadisələr zamanı insanların dadına polis çatır. Bu baxımdan da, Ucarda sakinləri təşviş içində saxlayan anormal varlıqla bağlı şübhələrin aradan qaldırılması üçün camaat polisə üz tutub. Çünki kənd camaatı inanır ki, polis istənilən təhlükəni aradan qaldıra bilir. Əminəm ki, polis sakinləri əndişədə, təşvişdə saxlayan məsələnin aradan qalxmasına nail olacaq”.

Ş.Əliyev qeyd etdi ki, bu gün polis Azərbaycan xalqının təhlükəsizliyini təmin edən güvənc yeridir, o, təhlükəsizliyin təmin olunmasına zəmanət verən bir qurumdur, orqandır. “Azərbaycan polisinə yalnız Azərbaycan vətəndaşları inam bəsləmir, həmçinin, ölkəmizdə yaşayıb işləyən əcnəbilər də, xarici diplomatik korpus təmsilçiləri də, turistlər də Azərbaycan polisinə inam bəsləyir, onu özünə güvənc ünvanı bilirlər. Hesab edirəm ki, ən çətin məqamlarda polisin xalqın yanında olması, xalqın polisə xoş münasibət bəsləməsi bəzi sosial şəbəkələrdə polisə qarşı zərrə boyda qarayaxma təbliğatını tamamilə heçə endirir. Azərbaycan polisi xalqın inam və etimadını öz yüksək peşəkarlığı və fədakarlığı ilə qazanıb” - deyə Ş.Əliyev vurğuladı.

İradə SARIYEVA

Son xəbərlər