19/08/2019 17:09
728 x 90

Lerikin kəndlərində qanunsuz çəpərləmələr və “həx” yığımı...

img

Məlum həqiqətdir ki, artıq hərtərəfli inkişafı ilə Azərbaycan  bütün  dünyanın diqqətini  özünə  cəlb edə bilib. Amma Lerik rayonda bəzi səlahiyyət sahiblərinin gözlərini rüşvət pərdəsi tutduğu üçün  sanki onlar bu inkişafı görmək istəmirlər.

Açığını deyim ki,  Lerikdə vəzifə başında duranların çoxu ölkə başçısi İlham Əliyevin xalqın xoş güzəranı naminə qurub-yaratdıqlarına xələl gətirməkdən savayı bir iş görmür. Onların fəaliyyətsizliyi rayonda hərc-mərclik yaradır, hətta camaatı əyri yollara aparır.

Rayonun Hamarat,  Daster, Bradi, Aküşəpeştə  kəndləri  təbiətin ən füsunkar guşəsində yerləşir. Bu yerlərin kəklikli yamacları, yaşıl meşə zolaqları, bənövşə qoxulu dərələr, sərin sulu bulaqları göz oxşayır. Daha doğrusu, təbiətin hər yaratdığı  bu dörd kənddə daha gözəldir. Lakin təəssüf ki, rayonda olan özbaşınalıqdan  istifadə edən bəzi nadan insanlar təbiətin sinəsinə sağalmaz yaralar vururlar. Yəni yuxarıda göstərdiyim təbiətin yaraşığı olan yerləri qanunsuz halda çəpərə salırlar. Elə bir vəziyyət yaranıb ki, indi dövlətin saxladığı örüşlərə də yaxın düşmək olmur. Vaxtilə 30 nəfərin istifadə etdiyi  bulaq  zəbt olunduğu üçün indi bir nəfərə məxsusdur. Çəpərlərin sayı o qədər çoxdur  ki, bir kənddən digərinə gedən yollar bağlanıb. Meşə zolaqlarını, dərə kənarlarını  hasara salanlar buralardan amansız halda istifadə edirlər. Qazanc xətrinə təbiətdə bitən yüzlərə cavan ağacın ömrünə son qoyulur. Halbuki, sovet dövründə dediyim həmin  meşələrin əzgili, alçası, armudu, itburnusu  və digər dərman bitkiləri ilə böyük  ailənin  ruzisi tapılardı.

Ümumiyyətlə, kəndlərin ərazilərində olan qanunsuz çəpərlər çox ağır dərddir. Çəpər sahiblərinin dediyinə görə, onlar  tutduqları hər hansı əraziyə görə yuxarılara “həx” ( talış sözüdür, rüşvət mənasında deyilir) verirlər.  Mənim deməyim odur ki, vaxtında əsaslı tədbir  görülməsə, sonradan bu qorxulu uçurumdan qurtarmaq qeyri-mümkündür.

Zəfər ORUCOĞLU
Azərbaycan Jurnalistlər Birliyinin üzvü

Son xəbərlər