Bu gün Azərbaycanda mövcud olan ictimai-siyasi sabitlik respublikamızın müstəqillik tarixinin ən mühüm nailiyyətlərindən biridir. Təbii ki, sabitliyin əldə olunması o qədər də asan başa gəlməyib. Ölkəmiz öz dövlət müstəqilliyini bərpa etdikdən sonra çox böyük çətinliklərlə üzləşib.
Həmin dövrün çətinliklərinin əsas hissəsi məhz Azərbaycan polisinin üzərinə düşüb. Qarabağ müharibəsinin ilk illərində Azərbaycanın nizami ordusu yox idi, ona görə də ön cəbhədə torpaq uğrunda polis vuruşurdu, şəhidlər verirdi. Qanunsuz silahlı dəstələrlə polis mübarizə aparırdı. Bu illər ərzində Azərbaycan polisinin ictimai asayişin qorunmasında əvəzsiz xidmətləri olub.
Danılmaz faktdır ki, həftə ərzində 7 gün, gün ərzində 24 saat təhlükəsiz yaşamaq istəyən hər bir insan polisə etibar edir və bu etibar hörmət və inamla şərtlənir. Həyatın elə çağları, məqamları, hətta anları var ki, onlar insanın daxilində mənəvi bir öhdəlik yaradır. Ancaq polisin həyatı və xidməti elə bu cür anlardan ibarətdir və bəzən bu onun həyatı bahasına başa gəlir.
Şübhəsiz ki, hər bir peşənin bir-birindən fərqli xüsusiyyətləri, üstünlükləri və çətinlikləri var. Bu peşələrin içində polisin xidməti çətinliyi və məsuliyyəti ilə seçilir. İnsan neçə gün yuxusuz qala bilər, neçə həftə istirahətsiz işləyə bilər? Amma polis bu yuxusuz gecələri və istirahətsiz həftələri xidməti-vəzifə öhdəliyi hesab edir, xalqa və qanuna məsuliyyətlə xidmət edir. Elə bu səbəbdəndir ki, polis işində istirahət anlayışı yoxdur. Bu səbəbdən də Azərbaycan polisi ictimai asayişin qorunması və digər sahələr üzrə digər ölkələrdən seçilir.
Əliməmməd Nuriyev: “Azərbaycan polisinin peşəkarlığı, onun beynəlxalq cinayətkar dəstələrə qarşı mübarizə aparması qonşu ölkələrin daim diqqətindədir”
“Konstitusiya” Araşdırmalar Mərkəzinin rəhbəri, hüquqşünas Əliməmməd Nuriyev “Bakı-Xəbər”ə açıqlamasında qeyd etdi ki, Azərbaycan polisinin əsas vəzifəsi ictimai təhlükəsizliyi təmin etməkdir, eyni zamanda, cinayətkarlığa qarşı mübarizədə daim ön sıradadır: “Danılmaz faktdır ki, Azərbaycan polisi ölkənin müstəqilliyi uğrunda mübarizə aparıb. Azərbaycan polisinin şanlı tarixi var. Polisimiz Birinci Qarabağ müharibəsində yüzlərlə şəhid verib. Bu tarixə işıq tutmaq, vətəndaşın polisə güvənini artırmaq lazımdır. Ölkənin milli qəhrəmanları siyahısına nəzər salanda, Azərbaycan polisinin sayı yetərincədir.
Polisin vəzifəsi asayişin keşiyində dayanmaq, vətəndaşın təhlükəsizliyini təmin etməkdir. Polis-vətəndaş birliyinə əlahiddə ehtiyac var. Polislə vətəndaş arasında sədd çəkmək, ikitərəfli münasibətləri zədələmək yolverilməzdir.
Onu da deyim ki, dövlətçilik uğrunda mübarizədə, qanunsuz silahlı birləşmələrin aradan qaldırılması kimi məsələlərdə polisin müstəsna xidməti var”.
Həmsöhbətimizin sözlərinə görə, bu gün Azərbaycan polisinin fəaliyyəti nəticəsində ölkə vətəndaşı daha rahat yaşayır. Ölkə vətəndaşı günün istənilən vaxtı çölə çıxarkən təhlükəsizliklə bağlı problem yaşamır: “Cinəyətkarlıqla mübarizədə qonşu ölkələrlə müqayisə aparılarkən Azərbaycan bu sahə üzrə xeyli uğur qazanıb. Cinayətkar qrupların, quldurluğun aşkar olunmasında Azərbaycan polisinin xidmətləri danılmazdır. Elə hallar baş verib ki, Azərbaycan polisi öz canını ortaya qoyub. Gəncə hadisələri zamanı polislər öz canlarından belə keçdilər” .
Ə.Nuriyev onu da vurğuladı ki, Azərbaycan polisində qeydə alınan uğurlar ona rəhbərlik edən şəxslə bağlıdır. Bu gün Azərbaycan polisi peşəkarlardan ibarətdir. Azərbaycan polisinin peşəkarlığı onun beynəlxalq cinayətkar dəstələrə qarşı mübarizəsində də özünü göstərir. Bu sahədə böyük işlər görülür. Ümumiyyətlə, Azərbaycan polisi məsuliyyətlə fəaliyyət göstərir.
Hüquqşünas qeyd etdi ki, Azərbaycan polisinin sosial müdafiəsinin gücləndirilməsi ilə bağlı ölkə başçısı tərəfindən mühüm qərarlar qəbul edildi. Nəzərə almaq lazımdır ki, polisin fəaliyyəti onun funksional vəzifələrini peşəkarcasına icrasından asılıdır: “Bu səbəbdən də Azərbaycan polisi rahat şəkildə ölkənin təhlükəsizliyinin qorunmasında lazımi xidmətlər göstərir.
Hər bir ölkə vətəndaşı bilir ki, onun əmlakını, canını Azərbaycan polisi qoruyur. Bu səbəbdən də Azərbaycan cəmiyyəti hər zaman polisə arxayındır. Tək dövlət deyil, vətəndaş cəmiyyəti, sadə vətəndaşlar belə polisin fəaliyyətinə daim dəstək verməlidirlər.
Günel CƏLİLOVA
