Ölkə başçısının apardığı məqsədyönlü siyasətin nəticəsidir ki, respublikamız əsl inkişaf dövrünü yaşayır. Ölkənin iqtisadiyyatı günbəgün möhkəmlənir, əhalinin yaşayış səviyyəsi yüksəlir, mərkəzlərdən əlavə qəsəbə və kəndlərdə də geniş quruculuq işləri aparılır.
Lakin təəssüf ki, respublikada belə bir inkişaf olan yerdə Lerik rayonunun dağ kəndlərində ağır, məşəqqətli həyat şəraiti insanları doğma ev-eşiyindən perik salır. Qəflət yuxusunda olan rayon rəhbərləri hələlik xalqın xeyrinə əlini ağdan-qaraya vurmur. Rayon mərkəzində rüşvətsiz heç bir məmurun qapısına yaxın düşmək olmur. Bürokratik əngəllərlə üzləşmiş insanlar çarəni rayondan qaçmaqda görür.
Rayonun uzaq dağ kəndində artıq yaşamaq qeyri mümkündür. Əhalinin vəziyyəti ilə maraqlanan yoxdur, hərc-mərclik baş alıb gedir. İmkanı olan imkansıza zülm etməkdən, sanki mənəvi zövq alır. Qalaq-qalaq problemlərin içində batıb qalan kəndlərin sayı bilinmir. Rayonun əksər yaşayış məntəqələrində qaz yoxdur. Yanacaq qıtlığı üzündən hətta ötən qışda evində donanlar da oldu. Rayon mərkəzindən heç bir kəndə avtobus marşrutu işləmir. İşıqlar gündə 15-20 dəfədən çox, xəbərdarlıq edilmədən söndürülür. Bu da evlərdəki məişət cihazlarının yanıb sıradan çıxmasına səbəb olur. Kəndli öz torpağını əkib-biçməyə texnika tapa bilmir... Qara günlər milli-mənəvi dəyərləri, insani keyfiyyətləri, tərbiyəvi məsələləri də unutdurur.
Son illər isə dağ kəndlərində elə məmurların əli ilə daha təhlükəli hala rəvac verilib. Belə ki, kənd yerlərində əhalinin ərzağa olan tələbatını ödəməkdən ötrü münasib bir yer yoxdur. Bu işi indi ayrı-ayrı imkanlı “Kənd tacirləri” görürlər. Burada da əsas məqsəd daha çox pul əldə etməkdir. “Kənd tacirləri” Lənkəran şəhərinə düşüb, az miqdarda xərc çəkməklə bir-iki iri şirkətin insan sağlamlığına təhlükə törədən, müddəti ötmüş atılmış ərzaqlarını öz dükanlarına gətirirlər. Sonra qorxmadan, çəkinmədən aylarla bazarlıq üçün şəhərə düşə bilməyən kənd sakinlərinə üçqat baha qiymətinə sırıyırlar.
Dinamik inkişafı sayəsində böyük dövlətlər arasına tanınan Azərbaycanımızın gözəl guşəsində qərar tutan Lerik rayonunun Daster, Bürsülüm, Siyov, Conu... ərazilərində əhalinin vəziyyəti olduqca pisdir. Prezidentinə ürəkdən bağlı olan leriklilər inanırlar ki, xalqın xidmətində durmaqla vəzifəyə gəlib sonradan ona arxa çevirən məmurlar, bəzi vicdanı unutmuş işbazlar tezliklə layiqli cəzalarına çatacaq.
Zəfər ORUCOĞLU Azərbaycan Jurnalistlər Birliyinin üzvü
