17/11/2019 20:10
728 x 90

Bakının yol kənarı ağacları vaxtında budansa... neçə-neçə fəlakətdən qurtara bilərik

“Yerli icra hakimiyyəti orqanları və bələdiyyələr ərazilərindəki budanmaya ehtiyacı olan ağaclarla bağlı bizə rəsmi məktubla müraciət etməlidirlər”

img

Bakıda yol kənarında və binaların, eləcə də müxtəlif müəssisələrin həyətində yaşı 50-ni, 60-ı keçmiş qollu-budaqlı, şaxəli ağaclara sıx-sıx rast gəlirik. Çox təəssüf ki, bu ağaclar vaxtilə qayğı içində bəslənilsə də, son zamanlar diqqətdən kənarda qalıb. Onlar vaxtlı-vaxtında budanmır, bu da insanlar üçün ciddi problemlər yaradır.

Uzunmüddətli qar-yağış yağarkən, aramsız şiddətli küləklər əsərkən bu ağaclar gerçək fəsad ünvanına çevrilir. Vaxtaşırı budanmayan ağaclar aşaraq məhlədaxili yolları kəsir, müəssisələrin həyətində gediş-gəlişə əngəl törədir. Bu azmış kimi, ağaclar sınaraq avtomobillərin üzərinə aşır, bəzən insan sağlamlığına da ciddi zərər vururlar. Budanmayan və budaqları ağırlıqdan çürüyən ağacların budaqlarının qırılması, yaxud onların köklərindən qopması nəticəsində xəsarət alan insanlar daha çox olur.

Ötən ay Şəki Xan Sarayında 500 yaşı olan çinar ağaclarından birinin budağının qırılaraq düşməsi və bunun nəticəsində də insanların xəsarət alması aidiyyəti qurumlar üçün bir xəbədarlıq olsa da, onlar bu məsələyə elə də əhəmiyyət vermirlər.

  • Orxan Məmmədov: “Rəsmi müraciət daxil olmazsa, hansısa ağacı budaya bilmərik”

Bakı Şəhər İcra Hakimiyyəti Yaşıllaşdırma Təsərrüfatı Birliyinin Bitkilərin mühafizəsi şöbəsinin rəisi Orxan Məmmədov “Bakı-Xəbər”ə bildirdi ki, qurum özbaşına ağaclara müdaxilə etmir. O.Məmmədovun sözlərinə görə, yerli icra hakimiyyətləri və bələdiyyələr budanmaya ehtiyacı olan ağaclarla bağlı Yaşıllaşdırma Təsərrüfatı Birliyinin Bitkilərin mühafizəsi şöbəsinə rəsmi müraciət etməlidirlər. Onun sözlərinə görə, ağacların budanması üçün indiyədək onlara edilən bütün müraciətlərə operativ reaksiya veriblər. “Ağaclarla bağlı baş verə biləcək hadisələrin qarşısının alınması üçün bizim quruma rəsmi müraciətin edilməsi vacibdir. Yerli icra hakimiyyəti orqanları və bələdiyyələr ərazilərindəki budanmaya ehtiyacı olan ağaclarla bağlı bizə rəsmi məktubla müraciət etməlidirlər. Bizə rəsmi müraciət daxil olmazsa, hansısa ağacı budaya bilmərik. Bizim quruma bu barədə müraciət daxil olarkən araşdırıb öyrənirik ki, həqiqətən də o ağacların budanmaya ehtiyacı var, yoxsa yox. Mütəxəssis yoxlayaraq bilir ki, bu ağac budanmalıdır, başqa bir ağac cavanlaşdırılmalıdır, yaxud üzərində başqa əməliyyat aparılmalıdır. Aqrotexniki qaydada buna mütəxəssis baxır və yerində qərar qəbul edir” - deyə O.Məmmədov bildirdi.

İradə SARIYEVA

Son xəbərlər