Son zamanlar Azərbaycan avtomobil yollarında qəzaların sayı kifayət qədər artıb. Bunu açıqlanan statistik rəqəmlər də təsdiq edir. Dövlət Statistika Komitəsinin yaydığı məlumatda qeyd olunur ki, Azərbaycanda qəzaların sayı düz 2 dəfə artıb. Belə ki, 2019-cu ilin yanvar-iyun aylarında ölkənin avtomobil yollarında 822 yol-nəqliyyat hadisəsi baş verib.
Bu ilin ilk 6 ayı ərzində qeydə alınan yol qəzalarının sayı ötən ilin müvafiq dövri ilə müqayisədə 2 dəfə, zərərçəkənlərin sayı isə 1,2 faiz çoxdur. Bu ilin yanvar-iyun aylarında baş verən yol qəzalarında zərərçəkənlərin sayı 1087 nəfər olub. Onlardan 342-si həlak olub, 745-i isə müxtəlif bədən xəsarətləri alıb.
Hadisələrin 46,3 faizi gündüz, 36,5 faizi gecə, 17,2 faizi isə toran vaxtı baş verib, 29,3 faizi həftənin şənbə və bazar günlərinə təsadüf edib.
Qeyd edək ki, yol-nəqliyyat hadisələrinin 89,7 faizi yaşayış məntəqələrində baş verib, bu qəzalar nəticəsində həlak olanların sayı ötən ilin müvafiq dövrünə nisbətən 0,4 faiz azalaraq 249 nəfər, yaralananların sayı isə 0,7 faiz azalaraq 723 nəfər olub.
Yol-qəza hadisələrinin sayının azalması yönündə görülən işlərə baxmayaraq, bu sahədə vəziyyət acınacaqlı olaraq qalır.
İlqar Hüseynli: “İsti havalarda yol-nəqliyyat hadisələrinin artmasına səbəb bəzi nəqliyyat vasitələrinin standartlara uyğun olmamasıdır”
Sosial sahə üzrə ekspert İlqar Hüseynli bildirdi ki, isti havalarda yol-nəqliyyat hadisələrinin artmasına səbəb bəzi nəqliyyat vasitələrinin standartlara uyğun olmamasıdır: "Bəzi avtomobillərdə kondisionerlərin olmaması, isti nəticəsində yaranan yuxu, yorğunluq, tələskənlik qəzalara səbəb olur. Yorğun, yuxulu halda yola çıxmaq olmaz. Bütün polis postlarında sürücülərin istirahət etməsi üçün şərait yaradılıb. Yorğunluq hiss edilən zaman bu postlara yaxınlaşaraq su içmək, dincəlmək mümkündür. Bəzi avtomobilləri standartlara uyğun olmayan sürücülər polis saxladığı zaman bunu imkansızlıqla əlaqələndirirlər. Unudurlar ki, belə avtomobillərlə yola çıxmaq həm onların özü üçün, həm də ətrafdakılar üçün təhlükəlidir".
Həmsöhbətimiz onu da əlavə etdi ki, yay aylarında avtomobil qəzaları daha çox istirahət zonalarının ətrafında baş verir: "Yay aylarında insanlar daha çox istirahət mərkəzlərinə gedirlər. Bu da avtomagistralda intensivliyə səbəb olur. İntensivlik olan yollarda isə hər zaman qəzalar baş verir. Onu da əlavə edim ki, yay aylarında qəzaların artmasına digər bir səbəb sürücülərin sərxoş halda avtomobili idarə etməsidir. İstirahət mərkəzinə gələn və ya oradan çıxan sürücülərin əhvalı yaxşı olur, içkili olurlar. Bu da qəzaların baş verməsinə səbəb ola bilər".
Günel CƏLİLOVA
