Bəzən deyirlər ki, sevgi yaşa baxmır. İnsan istənilən yaşda sevə və özündən yaşca böyük, yaxud kiçik insana aşiq ola bilər. Çoxlarımız bunu təbii qəbul etməyə çalışırıq. Nədənsə, bu barədə düşünəndə reallıqlara göz yumub hisslərimizin diqtəsinə uyuruq.
Müasir Azərbaycan qızlarının sevgiyə münasibəti bir qədər fərqlidir. Əvvəlki dövrlərlə müqayisədə indi qızlar daha çox özlərindən 10-20 yaş böyük kişilərlə sevgi yaşamağa, evlənməyə can atırlar. Vaxtilə isə qızlar daha çox yaşıdları, yaxud da özlərindən uzaqbaşı 5-6 yaş böyük insanla sevgi yaşamağa, ailə həyatı qurmağa meyl göstərirdilər. Yeri gəlmişkən, Sovet dövründə bu məsələyə xüsusi diqqət yetirilirdi. Hətta keçən əsrin əvvəllərində, ondan qabaqkı dövrlərdə qızların özlərindən 10-15, 20 yaş böyük kişiyə ərə verilməsi ciddi tənqid edilirdi. Elə dahi Üzeyir Hacıbəyovun “O olmasın, bu olsun” filmində də gənc qızın atası yaşda kişiyə ərə verilməsi şiddətlə tənqid olunub. Üzeyir bəyin bu əsəri yazmasının üstündən bəlkə də 100 ildən çox vaxt keçib. Bu gün ata-analar qızlarını zorla özlərindən yaşlı kişiyə verməyə elə də meyl göstərməsələr də, qızların özləri bu seçimi etməyə cəhdlər göstərirlər.
Statistikaya görə, Azərbaycanda özündən 10-15 yaş böyük kişilərə aşiq olan qadınların sayı artıb. Bu faktın psixoloqların araşdırmaları zamanı üzə çıxdığı məlum olub. Psixoloqlar çoxsaylı pasiyentlə söhbətlər zamanı bu halın aşkar olunduğunu vurğulayırlar.
Psixoloq Aytən Ələkbərovanın sözlərinə görə, son dövrlər bu vəziyyətə görə yaşanan problemlərlə müraciət edən xanımların sayında artım var: “20 yaşlı qızların özlərindən 10 yaş böyük kişilərə aşiq olması onlarda ciddi ürək xəstəliklərinə, vegetativ nevroz və sağlam düşüncənin pozulmasına gətirib çıxara bilir. Bəzən bu, bağlılıq hissi olur. Lakin əgər gün ərzində fikirlərini toplaya bilmirlərsə, hər yerdə o şəxsi görürlərsə, bu artıq aşiq olduğuna işarədir. Ümumiyyətlə, qadınların aşiq olma yaşları bölünür. 17, 18, 20 yaşlarında qızlarda buna daha çox rast gəlinir.
Statistikaya görə, qadınların bu yaşlarda aşiq olması “Adel” sindromuna gətirib çıxarır. 40-45 yaş qrupları arasında kiməsə aşiq olan qadınlarda isə bu sindrom özünü daha güclü göstərir”.
Qeyd edək ki, “Adel” sindromu kimi tarixə düşən bu termin böyük ABŞ yazıçısı Viktor Hüqonun qızı Adelin adı ilə bağlıdır. Adel qeyri-adi sevgisi ilə tarixə düşmüş qadınlardan biridir.
Könül Vaqifqızı: “Özündən qat-qat yaşlı kişiyə o qızlar meyl göstərir ki...”
Psixoloq Könül Vaqifqızı “Bakı-Xəbər”ə bildirdi ki, bu gün 17, 18, 19, 20 yaşlı qızların böyük əksəriyyəti həqiqətən də özlərindən 10-15, 20 yaş böyük kişilərə aşiq olur. Bu, bir tərəfdən, qızların psixoloji durumu ilə bağlıdır. Başqa bir tərəfdən isə onlar yaşayışlarını, maddi rifahlarını təmin edə biləcək kişinin məhz özlərindən 15-20 yaş böyük olacağı qənaətindədirlər. “Statistikaya baxsaq görərik ki, Azərbaycan qızlarının xeyli bir qismi əsasən özlərindən yaşlı kişilərlə ünsiyyət qurmağa meyl göstərir. Bəzən bu münasibətlər ciddi sevgi üzərində qurulur. Qızlar yaşlı kişiləri sevirlər. Bilirsiniz, özündən qat-qat yaşlı kişiyə o qızlar meyl göstərir ki, onların özgüvəni çox zəifdir, ailədə özünə müdafiəçi, həmfikir tapa bilmir. Belə qızlar adətən uşaqlıqda öz valideynlərindən diqqət-qayğı görməyənlər, yaxınlarının laqeyd münasibətindən, soyuqluğundan əziyyət çəkənlərdir. Onlar daim sığınacaqları, güvənə biləcəkləri insan axtarırlar. Təbii ki, bu onların yaşıdı, yaxud da özlərindən 3-5 yaş böyük oğlanlar ola bilməz, bu halda, qızlar özlərindən 15-20 yaş böyük kişiyə maraq göstərirlər. Siz fikir versəniz görərsiniz ki, 17, 18, 20 yaşlı qızlar hətta evli, oğul-uşaqlı kişiləri də sevirlər. Onlar bu kişilərə, bir növ, maddi və psixoloji problemlərdən xilas vasitəsi kimi baxırlar. Gənc qızların çoxu özündən 20, 30, ya böyük kişiyə dəlicəsinə aşiq olur və bu da əksər hallarda qızlara faciə yaşadır. Bu həm bizdə, həm də dünya praktikasında var. Amma bu sevgilərin çox böyük hissəsi iflasa uğrayır”.
Bu gün qızların çoxunun öz yaşıdları olan oğlanlarla ünsiyyət probleminin olduğunu da deyən psixoloq hesab edir ki, müasir qızlar oğlanlarla müqayisədə əqli, psixoloji və bioloji cəhətdən daha çevik inkişaf etdikləri üçün, həm də daha çox bilgiyə, informasiyaya malikdirlər. “17-18 yaşlı qızlar var ki, onlar özlərini kifayət qədər yetişmiş hesab edirlər. Söhbət edəndə görürsən ki, bunlar həqiqətən də çox bilirlər və onların maraq dünyası tamamilə fərqlidir. Özündən yaşlı kişiyə aşiq olan gənc qızların bir qisminin psixoloji durumu elə də yerində olmur. Onlar arasında nevrozlar, “Adel” sindromundan əziyyət çəkənlər də var. Yadınızdadırsa, bu yaxınlarda bir neçə gənc qız özlərindən yaşca böyük, ailəli-uşaqlı kişilərə qoşulub qaçmışdı” - deyə ekspert vurğuladı.
İradə SARIYEVA
