Azərbaycan Cənubi Qafqazda gerçək beyin mərkəzlərindən biri olaraq da tanınır. Təsadüfi deyil ki, bir sıra beynəlxalq statuslu intellekt, bilik yarışları, olimpiadalar ölkəmizin evsahibliyi ilə keçirilir. Bu sahədə böyük təşkilatçılıq təcrübəsinə malik olan Azərbaycan bu dəfə də 31-ci Beynəlxalq İnformatika Olimpiadasına evsahibliyi edir. Ölkəmizin beynəlxalq olimpiada sahəsində uğurları kifayət qədərdir və Azərbaycanda keçirilən Beynəlxalq İnformatika Olimpiadası da informatika sahəsinin inkişafına dəyərli töhfədir.
Bakıda keçirilən 15-ci Avropa Gənclər Yay Olimpiya Festivalının ardınca belə bir nüfuzlu olimpiadanın da ölkəmizdə təşkil edilməsi müsbət göstəricidir. İnformatika üzrə ilk beynəlxalq olimpiadanın 30 il əvvəl Bolqarıstanda keçirildiyi qeyd edilir.
31-ci Beynəlxalq İnformatika Olimpiadası avqustun 11-dək davam edəcək. Ölkəmizdə ilk dəfə keçirilən Beynəlxalq İnformatika Olimpiadasında Azərbaycan komandası da daxil olmaqla, 88 ölkə və regiondan 600-dən çox şagird, müəllim və ekspertdən ibarət rəsmi nümayəndə heyətləri iştirak edirlər.
Kamran Əsədov: “Bu nüfuzlu beynəlxalq yarışda ölkəmizi indiyə qədər 24 dəfə təmsil edən Azərbaycan komandaları 1 gümüş və 4 bürünc olmaqla, ümumilikdə, 5 medal qazanıblar”
31-ci Beynəlxalq İnformatika Olimpiadasının əhəmiyyətini şərh edən tanınmış təhsil eksperti Kamran Əsədov hesab edir ki, bu olimpiadanın ölkəmizdə keçirilməsi müsbət haldır. “İlk növbədə qeyd edim ki, istedadlı uşaq və gənclərin aşkara çıxarılmasında, onların həvəsləndirilməsi və təlimdə sağlam rəqabətin yaradılmasında fənn olimpiadaları müstəsna rol oynayır. Olimpiadalar yerli, regional və beynəlxalq olmaqla müxtəlif fənlər üzrə təşkil olunur. Burada əsas məqsəd şagirdlərdə keyfiyyətli təhsilalma, biliklərə marağı artırmaq və ayrı-ayrı fənlər üzrə istedadı və yaradıcı təfəkkürü ilə fərqlənənləri aşkar etməkdir. Fənn olimpiadaları IX-XI sinif şagirdləri arasında Azərbaycan dili və ədəbiyyat, tarix, coğrafiya, riyaziyyat, fizika, kimya, biologiya, informatika fənləri üzrə təşkil edilir. I-III yerlərin qalibləri diplom və medallarla, IV yerin qalibləri isə tərifnamələrlə təltif edilirlər.
Respublika fənn olimpiadaları riyaziyyat, fizika, kimya, biologiya, informatika, Azərbaycan dili və ədəbiyyatı, coğrafiya və tarix olmaqla, ümumilikdə, 8 fənn üzrə keçirilir. Vacib bir məsələni qeyd edim ki, son illər istedadlı uşaqların aşkar və onların mövcud potensiallarından məqsədyönlü istifadə edilməsi istiqamətində bir sıra layihələr həyata keçirilib”.
K.Əsədov qeyd etdi ki, istedadlı uşaqlarla iş və bu istiqamətdə müxtəlif yarış, müsabiqə, yerli və beynəlxalq fənn olimpiadaları ümumi təhsilin bir hissəsini təşkil etməklə ən əsas sahələrdən biri olaraq qalmaqdadır. “İstedadlı şagirdləri vaxtında aşkar etməklə, onları qabiliyyətlərinə uyğun istiqamətləndirməklə gələcəkdə ölkə üçün güclü elm adamları, mühəndislər, iqtisadçılar, həkimlər və ixtisasından asılı olmayaraq, fərqli düşünən, analiz qabiliyyəti çox yüksək olan mütəxəssislərin yetişməsinə nail olmaq mümkündür. Fənn müsabiqələrinin məntiqi nəticəsi istedadlı uşaqları kəşf etməkdir. Aydın məsələdir ki, istedadlar daha erkən yaşlarda kəşf ediləcəyi təqdirdə şagirdlərin zəruri hazırlığının artırılması istiqamətində ciddi işlərin aparılması mümkün olacaq. Ölkə başçısı tərəfindən təhsilə yüksək səviyyədə göstərilən diqqət və qayğı gələcəyimiz olan gənc nəslin hərtərəfli və peşəkar mütəxəssis kimi formalaşmasında mühüm əhəmiyyət daşıyır. Bu mənada, Təhsil Nazirliyinin istedadlı şagirdlərin üzə çıxarılması, onların bilik və qabiliyyətlərinin inkişaf etdirilməsi istiqamətində həyata keçirdiyi tədbirlər nəticəsində məktəblilərimiz respublika fənn olimpiadalarında, eləcə də beynəlxalq səviyyəli bilik yarışlarında iştirak edir və uğurları ilə təhsilimizə töhfələrini verirlər.
Olimpiadalarda məktəblilərin əldə etdikləri uğurlara əsasən, qətiyyətlə onların elmi potensialının yüksək olduğunu demək olar. İndi onların sorağı ABŞ, Çin, Koreya, Türkiyə, Rusiya və Avropa ölkələrinin nüfuzlu universitetlərindən gəlir. Respublikamızda keçirilən olimpiadalarda qalib gələn şagirdlər dünya olimpiadalarına göndərilir. Onlar orada da qalib gələndə istədikləri universitetlərə imtahansız qəbul olunmaq şansı əldə edirlər. Xatırladım ki, hazırda Azərbaycan 31-ci Beynəlxalq İnformatika Olimpiadasına (IOI) evsahibliyi edir. 1989-cu ildən keçirilən və informatika sahəsində ən nüfuzlu yarışlardan biri hesab olunan Beynəlxalq İnformatika Olimpiadası hər il dünyanın müxtəlif ölkələrindən məktəblilərə bilik və bacarıqlarını sübut etmək imkanı yaradır. Azərbaycanda ilk dəfə təşkil olunan Beynəlxalq İnformatika Olimpiadasında iştirak üçün milli komandamız da daxil olmaqla, 88 ölkə və regiondan 600-dən çox şagird, müəllim və ekspertdən ibarət rəsmi nümayəndə heyəti qeydiyyatdan keçib. Bu nüfuzlu beynəlxalq yarışda ölkəmizi indiyə qədər 24 dəfə təmsil edən Azərbaycan komandaları 1 gümüş və 4 bürünc olmaqla, ümumilikdə, 5 medal qazanıblar. Bu olduqca mühüm hadisədir. 31-ci Beynəlxalq İnformatika Olimpiadasının ölkəmizdə keçirilməsi Azərbaycanda informatika fənninin tədrisinin keyfiyyətinin artmasına, gənclərin olimpiadaya marağının yaranmasına ciddi şəkildə müsbət təsir göstərəcək”.
İradə SARIYEVA
