Ölkəmizdə özünüməşğulluq proqramının tətbiq edilməsi əhalinin sosial rifah halının yüksəldilməsində mühüm əhəmiyyətə malikdir. Dövlət dəstəyilə həyata keçirilən özünüməşğulluq proqramından Azərbaycan əhalisi ciddi şəkildə bəhrələnərək fəaliyyətini qurur.
Məlum olduğu kimi, Azərbaycan Respublikasının Prezidenti İlham Əliyev müxtəlif illərdə əhalinin özünüməşğulluğunun təmin olunması sahəsində bir sıra sənədlər imzalayıb. Dövlətin sosial siyasətinin daha geniş hədəflərə çatması üçün böyük önəm daşıyan özünüməşğulluq proqramından istifadə edən ailələrin sayı günü-gündən artır.
Əhalinin məşğulluğunun artırılması istiqamətində həyata keçirilən işlərin sırasında özünüməşğulluq xüsusilə fərqlənir. Prezident İlham Əliyev əhalinin sosial rifah halının yüksəldilməsi yönündə çox ciddi islahatlar keçirib və bu islahatlar müsbət mənada öz bəhrəsini verir.
Məşğulluq proqramı üzrə görülən işlərin daha geniş miqyas alması və sürətlənməsi Azərbaycan Prezidentinin diqqət mərkəzindədir. Ölkə başçısı bu işin daha sürətlə həyata keçirilməsi və bu proqramdan daha çox ailənin bəhrələnməsi üçün kifayət qədər şərait yaradıb.
Qeyd edilənə görə, ötən il bu proqram 6 min ailəni əhatə edib, bu il isə əlavə vəsaitlərin cəlb olunması nəticəsində 10 min ailənin əhatə olunması nəzərdə tutulub. Məlumatlara görə, əhali arasında populyarlığı yüksələn bu proqram çərçivəsində ƏƏSMN-ə artıq 45 min müraciət daxil olub və 4 min nəfər təlim keçib, 110 nəfər aktiv əldə edib.
Prezident İlham Əliyevin “Əhalinin özünüməşğulluğunun təmin olunması sahəsində əlavə tədbirlər haqqında” 2016-cı il 7 aprel tarixli Sərəncamının mühüm əhəmiyyət kəsb etdiyini deyən ekspertlərin bildirdiyinə görə, sərəncam dövlət məşğulluq siyasətində keyfiyyətcə yeni bir mərhələ açmaqla, özünəməşğulluq fəaliyyəti ilə işsiz və işaxtaran şəxslərin ailə bizneslərini qurmalarına, əmək potensiallarının reallaşdırılması yolu ilə gəlirlərini artırmalarına, həmçinin, kiçik və orta sahibkarlığın inkişafına xidmət edir.
Fikrət Yisifov: “Növbəti illərdə bu proqramdan bəhrələnən ailələrin sayı daha da artacaq, çünki buna dövlət tərəfindən yüksək şərait yaradılıb”
İqtisadçı-ekspert Fikrət Yusifov “Bakı-Xəbər”ə bildirdi ki, özünüməşğulluq proqramı Azərbaycan ailələrinin, xüsusən də aztəminatlı ailələrin rifahının yüksəlməsinə səbəb olub. O qeyd etdi ki, Azərbaycanda sosial siyasətin əsas istiqamətlərindən birini əhalinin məşğulluğunun təmin olunması, yaşayış səviyyəsinin daha da yaxşılaşdırılması təşkil edir. Dövlət tərəfindən aztəminatlı ailələrin sosial müdafiəsinin gücləndirilməsi ilə yanaşı, onların aktiv əməyə cəlb edilməsinə, məşğulluğunun təmin olunmasına və bununla da fəal həyat mövqeyinin formalaşmasına xüsusi əhəmiyyət verilir.
F.Yusifovun sözlərinə görə, son illər daha çox ailə bu proqramla əhatə olunub və olunacağı da şübhə doğurmur. “Özünüməşğulluq proqramının əsas məqsədi əhalinin məşğulluğunu təmin etməkdir. Bu proqram xüsusən də kənd yerlərində yaşayan əhalinin hansısa bir fəaliyyət növü ilə məşğul olmasına, onların özünüməşğulluq hesabına ailə büdcəsini təmin etməsinə şərait yaradır. Bu proqrama qoşulanlar hansısa bir biznes növünü inkişaf etdirməklə öz yaşayışlarını təmin edirlər. Dövlət büdcəsindən də bu sahəyə maliyyə ayrılır. Təbii ki, özünüməşğulluq proqramının tətbiqi, bütövlükdə, ölkədə əhalinin sosial müdafiəsinin, xüsusilə də ölkənin aztəminatlı təbəqəsinin sosial müdafiəsinin gücləndirilməsi istiqamətində atılan çox müsbət, gərəkli və təqdirəlayiq addımlardır. Hesab edirəm ki, növbəti illərdə bu sahəyə daha geniş səviyyədə dövlət dəstəyi göstərilməsi mümkün olacaq. Çünki insanların öz yerlərində özünüməşğulluqla məşğul olması, biznes qurması, öz maddi problemlərini bu yolla həll etməsi dövlətin qayğılarını azaldır, onun vətəndaş qarşısındakı öhdəliklərinin yerinə yetirilməsində bir yardımçı olur. Ona görə də özünüməşğulluq proqramı çərçivəsində fəaliyyət göstərən ailələrin sayının bu səviyyədə artması müsbət göstəricidir. Fikrimcə, növbəti illərdə bu proqramdan bəhrələnən ailələrin sayı daha da artacaq, çünki buna dövlət tərəfindən yüksək şərait yaradılıb” - deyə F.Yusifov bildirdi.
O, həmçinin, qeyd etdi ki, ölkəmizin bütün bölgələrində özünüməşğulluq proqramı çərçivəsində aktivlərlə təmin edilən vətəndaşların öz ailə təsərrüfatlarını və bizneslərini qurmağa nail olması müsbət haldır. Yaxın bir-iki ildə də özünüməşğulluq proqramına qoşulanların sayı daha da artacaq. Ailələrin müxtəlif sahələr üzrə öz ailə bizneslərini yaratmaq üçün dövlət tərəfindən ciddi dəstək göstərilməsinin təqdir olunmalı hal olduğunu bildirən F.Yusifov qeyd etdi ki, bu, ölkədə işsizliyin də kəskin şəkildə azalmasına gətirib çıxaracaq.
İradə SARIYEVA
