Məlum olduğu kimi, iyulun 31-də Azərbaycan Respublikasının Prezidenti İlham Əliyevin yanında sosial-iqtisadi sahə ilə bağlı keçirilən müşavirədə ölkə başçısı küçələrin işıqlandırılması məsələsinə həssaslığını bir daha nümayiş etdirdi.
Bununla bağlı danışan Prezident küçə işıqlandırılmasının hələ də lazımi səviyyədə olmadığını bildirib. Ölkə başçısı müşavirədə göstəriş də verib və qeyd edib ki, bu məsələyə çox ciddi diqqət göstərilməlidir.
İ.Əliyev çıxışı zamanı bildirib ki, Bakıda küçə işıqlandırılması hələ də lazımi səviyyədə deyil. Şəhərin mərkəzi təbii ki, işıqlandırılır, ancaq bəzi yerlərdə küçə işıqlandırılması yoxdur.
Maraqlıdır, Bakıda küçələrin işıqlandırılması sahəsində problemin olduğu dəfələrlə gündəmə gətirilsə də, aidiyyəti qurumlar bir tək mərkəzi küçələrin yollarını işıqlandırmaqla kifayətlənib. Ancaq kənar ərazilərdə isə küçələr işıqlandırılmayıb.
Bakı Şəhər İcra Hakimiyyəti: “Prezidentin müşavirədəki tapşırığı ilə bağlı iclas keçirilməsi və müvafiq qərarların qəbulu nəzərdə tutulur”
Məsələ ilə bağlı Bakı Şəhər İcra Hakimiyyətinə müraciət etdik. Bakı Şəhər İcra Hakimiyyətindən “Bakı-Xəbər”ə bildirildi ki, Prezidentin müşavirədəki tapşırığı ilə bağlı iclas keçirilməsi və müvafiq qərarların qəbulu nəzərdə tutulur. Bu barədə mediaya geniş açıqlama veriləcək.
Anar Nəcəfli: “Qanunvericiliyə uyğun olaraq, AAYDA yolun kənarları, səki hissələri, orada yerləşən işıq dirəkləri və digər əhəmiyyətli kommunikasiyalara cavabdeh deyil”
Azərbaycan Avtomobil Yolları Dövlət Agentliyinin (AAYDA) İctimaiyyətlə əlaqələr şöbəsinin müdiri Anar Nəcəfli qeyd etdi ki, yolun əsaslı təmiri zamanı işlər layihəyə uyğun həyata keçirilir: “Yenidənqurma həyata keçirilərkən, layihə üzrə həmin yolda işıqlandırma sisteminin quraşdırılması nəzərdə tutulubsa, quraşdırılır. Yox, əgər nəzərdə tutulmayıbsa, quraşdırılmır. Dirəklər quraşdırıldıqdan sonra istismar olunmaq üçün aidiyyəti üzrə təhvil verilir. Agentlik sırf Bakıda yolun hərəkət hissəsinin işıqlandırılmasına cavabdehdir.
Mövcud qanunvericiliyə uyğun olaraq, AAYDA yolun kənarları, səki hissələri, orada yerləşən işıq dirəkləri və digər əhəmiyyətli kommunikasiyalara cavabdeh deyil. Biz yolun təmiri zamanı asfalt örtüyünü təmir edirik. Əgər ərazidə işıqlandırma yoxdursa, asfalt örtüyünün təmiri zamanı orada işıq dirəyi quraşdıra bilmərik. Bu bizim səlahiyyətimizdə deyil. Yolun kənarında quraşdırılan işıq dirəkləri həmin rayon üzrə icra hakimiyyətlərinin cavabdehliyindədir. Biz yeni yollar inşa etdikcə, işıqlandırma sistemini də quraşdırırıq. Amma mövcud yolların təmiri zamanı işıq dirəklərini quraşdırmağa, kommunikasiya xətləri çəkməyə ixtiyarımız yoxdur”.
Azər Allahverənov: “Küçələrin lazımi dərəcədə işıqlandırılmaması piyadaların vurulmasına səbəb olur”
Sosial sahə üzrə ekspert Azər Allahverənov bizimlə söhbətində qeyd etdi ki, bu gün bəzi küçələrin işıqlandırılması sahəsində ciddi problem yaşanır: “Küçələrin lazımi dərəcədə işıqlandırılmaması piyadaların vurulmasına səbəb olur. Prezident İlham Əliyev müşavirədə küçələrin işıqlandırılması sahəsində vəziyyətin istənilən səviyyədə olmaması probleminin aktuallığını gündəmə gətirdi. Danılmaz faktdır ki, mərkəzi küçələr istisna olmaqla, kənar ərazilərin yollarında işıqlandırma ya zəifdir, ya da ümumiyyətlə yoxdur”.
Həmsöhbətimiz onu da vurğuladı ki, şəhərin mərkəzi küçələrinin məhəllələrində belə işıqlandırma yox səviyyəsindədir: “Küçələrdə yolların işıqlandırılmaması arzuolunan hal deyil. Ola bilsin ki, bəzi qurumlar enerjiyə qənaət etmək üçün hansısa küçələrdə işıqları söndürür. İstənilən halda, küçələrdə təhlükəsizlik yüksək səviyyədə olmalıdır ki, əhalinin rahatlığı təmin olunsun. İctimai asayiş, ictimai təhlükəsizlik baxımından hansısa qənaət rejimindən söhbət gedə bilməz. Nəzərə almaq lazımdır ki, insan sağlamlığı hər şeydən üstün olmalıdır”.
Ekspert təklif edir ki, küçələrin işıqlandırılıb-işıqlandırılmaması ilə bağlı monitorinq keçirilsin: “2018-ci il dekabrın 28-də Yol hərəkətinin təhlükəsizliyinə dair Dövlət Proqramı qəbul olundu. Həmin proqramın 7 – 7.2 bəndində avtomobil yollarının işıqlandırılmasına toxunulub. Həmin bənddə konkret olaraq göstərilir ki, avtomobil yolları müasir standartlara cavab verən süni işıqlandırma sistemləri, qurğuları ilə təmin olunmalı, habelə yolların işıqlandırılmasında alternativ enerji mənbələrindən istifadə edilməli və onların yararlı vəziyyətdə saxlanması üçün mütəmadi olaraq tədbirlər görülməlidir. Qeyd edim ki, bu Dövlət Proqramı 2019-2023-cü illəri əhatə edir”.
Günel CƏLİLOVA
