Müasir dövrdə təmizliyə riayət olunması bir mədəniyyət göstəricisidir. Ölkə haqqında təəssürat onun hava limanı, dəmir yolu, avtomobil yolları, tualetlərin və şəhərdəki zibilxanaların vəziyyəti əsasında formalaşır. İlk baxışdan bu kiməsə qəribə görünə bilər, amma bu doğrudan da belədir. Bakıya gələn əcnəbilər geri döndükdən sonra şəhərimiz haqqında təəssüratlarını bölüşəndə mütləq sadaladıqlarımız barəsində danışırlar.
Hazırda bu sahədə paytaxtda bir sıra problemlər mövcuddur. Problem ondan ibarətdir ki, bu gün Bakının mərkəzində və ətraf ərazilərində zibil qutularının yeri düzgün müəyyənləşdirilməyib. Zibil qutularının bəziləri əlverişsiz yerlərə qoyulub ki, bu da sakinlərin haqlı narazılığına səbəb olur. Görürsən ki, zibil qutularını binaların girişi ilə üzbəüz yerdə, yolun düz yanında, marketin qarşısında qoyublar. Üfunət iyindən harasa getməyə belə peşman olursan. Açıq-aydın görünür ki, zibil qutuları qoyularkən onların təmizlənməsi üçün şərait nəzərə alınmayıb. Bir sözlə, sakinlər zibil qutularının çox uzaq məsafədə qoyulmasından, bəziləri bu qutuların binanın həyətində, digərləri isə düz qapılarında qoyulmasından şikayətlənirlər. Adətən zibil qutuları yaşayış binasından, xidmət və iaşə obyektlərindən bir qədər aralıda qoyulmalı, sakinlərin istirahətinə və gediş-gəlişə mane olmayan yerlərdə yerləşdirilməlidir.
Bu məsələdə bələdiyyələrin üzərinə böyük məsuliyyət düşür. Ancaq müşahidələr göstərir ki, bu heç də hər yerdə belə deyil. Məsələn, sosial şəbəkələrdə yayılan məlumata görə, Xırdalan şəhərinin Abşeron Gənclər şəhərciyində bununla bağlı ciddi problem yaranıb. Sakinlərin dediyinə görə, əvvəllər zibil qutularının qoyulduğu yer sakinləri qane edib. Ancaq “Al market” şəbəkəsinin filialı açılandan sonra bu sahədə vəziyyət qarışıb. Belə ki, zibil qutularını hara gəldi qoyublar. Zibil qutuları əsasən binaların girişi ilə üzbəüz yerlərə qoyulub ki, bu səbəbdən ətrafı üfunət iyi bürüyüb. Belə iddialar var ki, sözügedən market filialı bina komendantına məxsus olduğu üçün belə xoşagəlməz vəziyyət yaranıb.
Ən nəhayət, zibil qutuları ilə bağlı mühüm problemlərdən biri də onların dərmanlanmamasıdır. Qonşu Gürcüstanda zibil qutuları estetik görünüşünə görə diqqəti cəlb etməklə yanaşı, həm də mütəmadi dərmanlanır. Bizdə isə zibil qutularının haçansa dərmanlandığını görməmişəm. Hansı ki, bu olduqca vacib məsələdir.
Sözügedən məsələ ilə bağlı bəzi bələdiyyələrin fikirlərini öyrənməyə çalışdıq.
Ələmdar Nəbiyev: “Mümkün olan qədər çalışırıq ki, zibil qutuları uyğun yerlərdə qoyulsun və sakinlər üçün hansısa problem yaranmasın”
Sabuncu Rayon Bələdiyyəsinin sədr müavini Ələmdar Nəbiyevlə əlaqə saxladıq. O, qəzetimizə açıqlamasında belə problemlər yarandıqda dərhal müdaxilə etdiklərini bildirdi: “Bizdə də belə problemlər olur. Görürsən ki, hansısa ünvanda yaşayan sakinlər zibil qutularının yerindən narazıdır. O zaman biz dərhal bunu araşdırırıq və yaranan problemi aradan qaldırmaq üçün müvafiq tədbirlər görürük. Bu məsələdə Sabunçu Bələdiyyəsi son dərəcə diqqətlidir. Mümkün olan qədər çalışırıq ki, zibil qutuları uyğun yerlərdə qoyulsun və sakinlər üçün hansısa problem yaranmasın. Bu məsələdə sakinlərin fəallığından çox şey asılıdır. Yəni belə problemlə üzləşdikdə dərhal bələdiyyəyə müraciət etsinlər. Mən Sabunçu Bələdiyyəsinin adından danışaraq bildirirəm ki, bizdə belə problem yarananda aradan qaldırırıq”.
Arzuxan Əlizadə: “Bakıxanovda zibil qutularının qoyulması, zibillərin daşınması rayon kommunal təsərrüfatlarının səlahiyyətindədir”
Bakıxanov Bələdiyyəsinin üzvü Arzuxan Əlizadənin sözlərinə görə, qəsəbədə zibil qutularının qoyulması, zibillərin daşınması rayon kommunal təsərrüfatlarının səlahiyyətindədir: “Bələdiyyələr konkret olaraq bu məsələ ilə məşğul deyil. Deməyim odur ki, bu məsələyə müxtəlif yerlərdə, müxtəlif yanaşma var. Bəzi yerlərdə bu işi bələdiyyələr görür, elə yer var ki, rayon kommunal təsərrüfatları bu işlə məşğul olurlar. Bakıxanov Bələdiyyəsində bu işin təşkili fərqlidir. Məsələ ondadır ki, zibil qutusunun yeri ilə bağlı narazılıq olanda bələdiyyəyə müraciət olunur. Bu zaman bələdiyyə öz səlahiyyəti çərçivəsində həm rayon icra hakimiyyətinə, həm də kommunal təsərrüfat birliyinə müraciət edir. Ondan sonra problem həllini tapır. Ancaq yaxşı olardı ki, paytaxtın bütün yerlərində bu işlə bələdiyyələr məşğul olsun. O zaman bu sahədə problemlər elə də çox olmaz”.
Vidadi ORDAHALLI
