Xəzərin problemləri içərisində dəniz sularının və dənizkənarı zonaların çirklənməsi, bununla əlaqədar ekoloji şəraitin korlanması son dövrün mühüm məsələlərindən biridir. Xəzər dənizinin əsas çirklənmə mənbələri onun sahillərində yerləşən şəhərlərin və sənaye obyektlərinin çirkab suları, dəniz nəqliyyatı və neft mədənlərinin müxtəlif çirkləndiriciləridir. Sahil ərazilərinin çirklənmə dərəcəsini isə əsasən yay mövsümünün sonunda müşahidə etmək mümkündür ki, bunun da başlanğıcında insan amili durur.
Xəzər dənizini çirkləndirən qurumlara, istirahət mərkəzlərinə qarşı sərt tədbirlər həyata keçirilir. Dənizi çirkləndirən istirahət mərkəzlərinin adı dəfələrlə ictimaiyyətə açıqlanıb. Eyni zamanda, qurğular quraşdırılanadək sözügedən obyektlərin fəaliyyətinin dayandırılması ilə bağlı aidiyyəti qurumlar qarşısında da məsələ qaldırılıb. Ancaq həmin istirahət mərkəzləri yenə də Xəzəri çirkəndirməkdə davam edirlər.
Bu günlərdə Ekologiya və Təbii Sərvətlər Nazirliyinin əməkdaşları Xəzər dənizinin Bakı, Sumqayıt, şimal və cənub sahil zolağında fəaliyyət göstərən ictimai iaşə obyektlərində tullantı sularının idarə olunması vəziyyəti ilə bağlı növbəti reydlər keçirib və bundan əvvəl verilən məcburi göstərişlərin icra vəziyyətini yoxlayıblar.
Nazirliyin Mətbuat xidmətinin rəhbəri İradə İbrahimova jurnalistlərə açıqlamasında bildirib ki, reydlər zamanı Xaçmaz rayonu ərazisində fəaliyyət göstərən “Çıraqqala”, “Jalə”, Sumqayıt şəhərindəki “Duyğu”, “Liman”, “Atlantida”, “Flaqman”, “Narınqala”, “Balıqçı”, “Alma”, “Neptun, “Antalya”, “Qala”, Bakı şəhərindəki “Mirvari”, “Riyad park”, “Caspian Beach”, “1001 gecə”, “Eldarado”, “Dostluq”, “Aquapark” istirahət mərkəzlərinə bir müddət əvvəl verilən məcburi göstərişlərin tələbləri icra edilmədiyi üçün onların fəaliyyətlərinin dayandırılması ilə bağlı məhkəmə qarşısında vəsatət qaldırılıb.
Reydlər zamanı Nabranda fəaliyyət göstərən “Lotos”, “Ulduz”, Sumqayıtda “Katamaran”, “Sahil”, “Diana”, Bakıda “Bizim sahil”, “Xəzər”, “Türkan”, “Simurq”, “Voyage”, “Qala” və “Antalya” istirahət mərkəzlərində, Lənkəran-Astara zonasında isə “Dağlar oğlu”, “Həsirli”, “Su pərisi”, “Panorama” ictimai iaşə obyektlərində də formalaşan tullantı sularının təmizlənmədən dənizə axıdıldığı aşkar edilib və cavabdeh şəxslər barəsində akt tərtib olunub. Formalaşan tullantı sularının təmizlənməsi üçün sözügedən obyektlərin sahiblərinə icrası məcburi olan məcburi göstərişlər verilib.
Ekspertlər də Xəzər dənizini çirkləndirən istirahət mərkəzlərinin fəaliyyətinin dayandırılmasının tərəfdarıdırlar.
İlqar Hüseynli: “Belə olarsa, hər kəs qayda-qanuna riayət edər, ekologiyanı korlamaz”
Sosial sahə üzrə ekspert İlqar Hüseynli bildirdi ki, dənizə çirkab su axıdanlar və məişət əşyaları atanlar sərt şəkildə cəzalandırılmalıdırlar: “İstər istirahət mərkəzi olsun, ya da müəssisə, fərqi yoxdur, dənizi çirkləndirənlər qanun qarşısında cavab verməlidirlər. Bu günə kimi dənizi çirkləndirən istirahət mərkəzləri ilə bağlı müəyyən işlər görülüb. Onların adları ictimaiyyətə açıqlanıb, müəyyən tədbirlər görməsi ilə bağlı dəfələrlə xəbərdarlıq olunub. Ancaq buna baxmayaraq, həmin iaşə obyektləri heç bir iş görməyib, öz fəaliyyətlərini olduğu kimi davam ediblər. Bəzi sahibkarlar edilən xəbərdarlığa əhəmiyyət verməyərək ekologiyanı pozmaqla məşğuldurlar. Bu səbəbdən də hesab edirəm ki, Xəzər dənizini və onun sahilini çirkləndirən istirahət mərkəzlərinin sahibləri sərt şəkildə cəzalandırılmalıdırlar. Zənnimcə, dənizi çirkab su ilə çirkləndirənlər yüksək məbləğdə cərimələnməli, bununla yanaşı, həmin məkanların fəaliyyəti dayandırılmalıdır. Belə olarsa, hər kəs qayda-qanuna riayət edər, ekologiyanı korlamaz”.
Günel CƏLİLOVA
