Bu yaxınlarda sosial şəbəkələrdə kütləvi bir etirazı müşahidə etdik. Ermənilərin bizim şəhər adlarımızla spirtli içkilər buraxdığına narazılıq bildirilirdi. Çox haqlı və yerində olan irad idi. Çünki hansısa əmtəənin üzərində olan ad həm də reklam deməkdir.
Ancaq bizim özümüz də daxili istehsalda bəzi vacib detallara fikir verməliyik. Məsələn, son vaxtlar müşahidə edirik ki, bəzi alkoqollu içkilər istehsal edən zavod və sexlər bir-birilə rəqabətə girib, məhsullarını daha cəlbedici təqdim etmək üçün, şüşələrin üzərinə tarixi şəxsiyyətlərin adını yazırlar. Ən maraqlısı isə budur ki, bəzən adları qeyd olunan şəxsiyyətlərin dönəminin dindar adamları olduğu, heç vaxt şərab qəbul etmədikləri üzə çıxır. Belə ki, “Şah İsmayıl Xətai” və ya “Nizami Gəncəvi” adlı spirtli içkilər buraxılır. Araşdırıldıqda məlum olur ki, hər iki tarixi şəxsiyyəti şərabla bağlayan hansısa əlamət yoxdur, əksinə, onlar dinə daha yaxın olublar. Təbii ki, belə adamların adının spirtli içkinin üzərinə yazılması həm də onlara olan hörmətsizlik kimi yozula bilər. Bu barədə ekspertlər nə düşünürlər?
Tural İrfan: “Rəsmi dövlət qurumları da bu məsələyə operativ reaksiya verməlidirlər”
İlahiyyatçı Tural İrfan “Bakı-Xəbər”ə açıqlamasında bildirdi ki, bu olduqca ciddi problemdir: “Ortaya bilirsinizmi hansı mənzərə çıxır? Kimsə pul qazanmaq istəyir və ürəyi nə istəyir edir. Ancaq belə işbazları özbaşına da buraxmaq olmaz axı. Bu gün nə Nizami Gəncəvinin, nə də Xətainin qohumları, doğmaları yoxdur ki, gedib həmin iş adamına etiraz etsin. Bunu biz ziyalılar, cəmiyyət etməlidir. Çünki onlar bu millətin sərvətidir, dəyəridir. Onların adını qorumaq həm bu dövlətin üzərinə düşür, həm də cəmiyyətin. Hesab edirəm ki, belə məsələyə ilk reaksiyanı Allahşükür Paşazadə verməlidir. Çünki o gözəl bilir ki, Nizami zəmanəsinin şeyxi olub. Dində şeyx titulu indiki akademikə bərabər, bəlkə də ondan da üstün olub. Bu, eyni zamanda, həmin adamın tarixi şəxsiyyət olması ilə yanaşı, həm də dinə bağlı adam olduğunu özündə ehtiva edir. İndi belə adamların adına çaxır və ya konyak buraxmağın nə adı ola bilər? Bu yaxınlarda bir din xadiminin adı şərabla bağlı hansısa qalmaqalda çəkildi. Gördünüz necə etiraz etdi? Bəs necə olur ki, belə məsələdə susqunluq görürük? Şah İsmayıl Xətainin bu gün də övliya kimi ehtiramını saxlayanlar var. İndi görün belə hallar nə qədər insanın heysiyyətinə toxunur. Dindar adamların adını spirtli içkinin üzərinə yazmaq onları aşağılamaqdan başqa nəsə deyil. Rəsmi dövlət qurumları da bu məsələyə operativ reaksiya verməlidirlər. Əgər rekalam xarakteri ilə bunu edirlərsə, bizim o qədər reklama ehtiyacı olan adlarımız var. Buyursunlar, onların adından istifadə etsinlər. Görürsünüz ki, belə adamların adına dövlətimiz heykəl qoyur, metro verir. UNESCO kimi bir təşkilat Nizaminin 850 illiyini bütün dünyada qeyd etdi. Dünyanın ən böyük şəhərlərində onun şərəfinə heykəllər ucalır, amma bizdə onun adını araq şüşəsinə yazırlar. Rəzalətdir”.
Məhəmmədəli QƏRİBLİ
