*8555 taksi xidmətinin müştərilərlə anlaşılmaz qiymət siyasəti – gündüzlər bir, gecələr fərqli qiymətlər...
Bakıda ənənəvi taksi xidməti getdikcə əhəmiyyətli dərəcədə azalmaqdadır. Müştərilərin sayı əvvəlki kimi deyil. Hazırda Bakı şəhərində bir neçə iri taksi xidməti fəaliyyət göstərir. Fəaliyyət ərazisi eyni olsa da, xidmət səviyyəsi, xidmət çeşidi və digər amillərdən asılı olaraq, xidmət haqlarında da fərqlər var.
Hazırda ən çox sifariş edilən *9933 nömrəli “Salam” taksi, *8555 nömrəli “Ailə” taksi, *9111 nömrəli “Ekonom” taksi, *8844 nömrəli “City” taksi, *5000 nömrəli “Ulduz” taksi bu siyasəti həyata keçirirlər. İndi müştərilərin əksəriyyəti sözügedən taksi şirkətlərinin xidmətinə üstünlük verir. Bunun bir səbəbi qiymətlərdir, digər amil təhlükəsizlik və sürücünün vaxtında sifariş olunan ünvana gəlməsidir. Ancaq son vaxtlar müştəriləri narazı salan taksi şirkətlərinin qiymət manevrləridir.
Məsələ ondadır ki, kim necə istəyir, o cür qiymət tətbiq edir. Ötən ilin ortalarından başlayaraq, ümumiyyətlə, qiymətləri artırıblar. Bu sahədə, faktiki olaraq, qiymətləri tənzimləyən qurum yoxdur. Ona görə hər bir şirkət istədiyi tarifi müəyyənləşdirir. Əvvəlcə müştərini cəlb etmək üçün ucuz qiymətlər təklif edirlər, sonra bazarda yer tutub qiymətləri qaldırırlar.
Bu arada diqqətçəkən məqamlardan biri də ondan ibarətdir ki, eyni məsafəyə görə taksi xidməti günün müxtəlif saatlarında müxtəlif qiymətlər təklif edir. Bir növ, bu minvalla, müştəriləri soyurlar. Belə taksi xidməti ilə məşğul olan şirkətlərdən biri də *8555 nömrəli “Ailə” taksi xidmətidir. Problem ondadır ki, sözügedən şirkət eyni məsafəli yola görə müştərilərə müxtəlif qiymətlər təklif edir. Məsələn, Maştağa qəsəbəsindən Biləcəri qəsəbəsinə müştərini 8 manata aparırlar. İlk baxışdan bu qiymət münasib görünür. Ancaq bu, gün ərzində həmişə belə olmur. Saat altıdan sonra və yaxud axşam 11-12 radələrində müştəri *8555 taksi xidmətinə sifariş verəndə 8 manata göstərilən xidmət olur 13 manat. Bir gün ərzində qiymətlərin niyə bu qədər dəyişkən olduğunun səbəbini soruşduqda buna aydınlıq gətirən olmur. Hansı ki, bu, müştərinin soyulmasından başqa bir şey deyil.
- *8555 taksi xidmətinin təmsilçisi: “Pik saatlarında tətbiq olunan endirimlər dondurulur və bu səbəbdən qiymət dəyişir”
Məsələ ilə əlaqədar *8555 nömrəli “Ailə” taksi xidməti ilə əlaqə saxladıq. Xidmətdən adını açıqlamayan şəxs qiymət fərqinin səbəbni belə izah etdi: “Bu ona görə belədir ki, biz günün müxtəlif saatlarında xidmətləri endirimlə təklif edirik. Qiymət endirimlə təklif edildiyindən bu, gün ərzində dəyişir. Qiymətlərin fərqli olması məhz bununla bağlıdır. Ancaq nəzərinizə çatdırım ki, pik saatlarında tətbiq olunan endirimlər dondurulur və bu səbəbdən qiymət dəyişir. Çünki gediş-gəlişin pik saatlarında endirimlərin tətbiqi sərfəli olmur. Nəzərə almaq lazımdır ki, həmin saatlarda şəhərdə tıxaclar olur. Ona görə də endirimli qiymətlər tətbiq olunmur”.
Soruşanda ki, axşam 11-12 radələrində gediş-gəlişin pik vaxtı olmadığı halda, niyə qiymətlər qalxır, taksi xidmətinin təmsilçisi bu suala cavab vermədi.
- Fuad İbrahimov: “Belə hallarda da müxtəlif qiymətlər təklif edilirsə, bu, istehlakçının cibinə girməkdir”
Sözügedən məsələ ilə bağlı fikirlərini “Bakı-Xəbər”lə bölüşən iqtisadçı-ekspert Fuad İbrahimov bununla bağlı bir sıra məqamlara toxundu: “Taksi xidmətinin eyni məsafəli yolu müştərilərə müxtəlif qiymətə təklif etməsi əsasən günün vaxtı ilə bağlıdır. Dünyanın bir sıra ölkələrində taksi xidmətlərində tarif bu cür tətbiq olunur. Məsələ ondadır ki, pik saatlarında nəqliyyat vasitəsinin yanacaq sərfiyatı artır. Buna görə tarif dəyişir. Ancaq nəzərə almaq lazımdır ki, günün bəzi saatlarında tıxac olmur. Yollarda avtomobillərin hərəkət intensivliyi aşağı düşür. Belə hallarda da müxtəlif qiymətlər təklif edilirsə, bu, istehlakçının cibinə girməkdir. Eyni zamanda, bu, dələduzluğun bir formasıdır”.
Vidadi ORDAHALLI
