Azərbaycanda dövlət qurumları tərəfindən keçirilən tenderlərin böyük əksəriyyəti ilə bağlı narazılıqlar meydana çıxır. İctimaiyyətin diqqətini cəlb edən belə tenderlərdən biri də bu yaxınlarda baş tutub.
Azərbaycan Qida Təhlükəsizliyi Agentliyinə (AQTA) tabe olan Azərbaycan Qida Təhlükəsizliyi İnstitutunun Qurban bayramı ilə əlaqədar heyvan kəsimi üçün müvəqqəti çadır və avadanlıqlar aldığı barədə məlumat verilib. Sözügedən qurumun bu məqsədlə 13 iyun 2019-cu il tarixində keçirilmiş tenderində “Novotrend” MMC qalib elan edilib və nəticədə sözügedən şirkətə 802 min manat ödəniş edilib.
Həmin vaxt çadırların sayı barədə bir şey deyilmirdi. Ötən gün isə AQTA-nın yaydığı məlumatdan belə nəticə çıxarmaq olar ki, sözügedən çadırlar 30 yerdə quraşdırılacaq. Belə çıxır ki, 30 ədəd müvəqqəti çadıra və onun avadanlıqlarına 800 min manatdan artıq pul xərclənəcək. Belə çıxır ki, hər çadır təxminən 30 min manata başa gəlib. Çatdırlarda su kranalrının quraşdırılacağını da nəzərə alsaq, yenə də həmin məbləğ fantastik görünür. Onda gərək həmin kranlar bahalı metaldan hazırlanmış olsun. Dövlət qurumunun çadır tenderində şübhəli məqamların olması ilə bağlı ekspertlər nə düşünürlər?
İlqar Hüseynli: “Dövlətin bu qədər vəsaitini bu tip səmərəsiz xərcləmələrə yönəltməyin özü yolverilməzdir”
Sosial məsələlər üzrə ekspert İlqar Hüseynli qəzetimizə açıqlamasında bildirdi ki, burada şübhəli məqamlar çoxdur: “Çadır nə materialdan hazırlanır ki, ona 30 min manat pul xərclənsin? Siz jurnalistsiniz, buyurun, araşdırın. Qaçqın və məcburi köçkünlər üçün tikilən binalardakı 3 otaqlı mənzilin smetası 30-32 min manat arasında dəyişir. Yəni bu minvalla 30 qaçqın ailəsinin hər birinə 3 otaqlı mənzil tikmək olardı. Məsələnin digər tərəfi isə ondan ibarətdir ki, niyə Qida Təhlükəsizliyi Agentliyi belə işlə məşğul olur? Axı bu fəaliyyət onun mandatına uyğun deyil. Bu, bir sosial xidmətdirsə, yaxşı olardı ki, bununla Əmək və Əhalinin Sosial Müdafiəsi Nazirliyi məşğul olsun. Hətta onlar məşğul olsa belə, dövlət büdcəsini bu şəkildə israf etmək olmaz. QTA isə kəsiləcək heyvanların sağlamlığına nəzarət etməlidir. Hərənin öz funksiyası var və ona uyğun işlə məşğul olsa yaxşıdır. Dövlətin bu qədər vəsaitini bu tip səmərəsiz xərcləmələrə yönəltməyin özü yolverilməzdir. Bilirsiniz ki, belə humanitar sosial aksiyalar dünyanın bütün inkişaf etmiş ölkələrində keçirilir. Məsələn, Türkiyədə bunu özəl şirkətlər, iş adamları edir. Sizi inandırım ki, çağırış olsa, burada da edənlər tapılar. Dövlətin külli miqdarda vəsaitini havaya üfürmək lazım deyil. Belə israfçılıq hallarının qarşısı mütləq alınmalıdır. İctimai nəzarət mütləq olmalıdır. Jurnalistlər fəal olsa, bu cür israfların qarşısı hər halda alınar. O cümlədən, dövlətin büdcəsinə, onun necə xərclənməsinə nəzarət edən qurumlar yaxşı olardı ki, bu cür halları diqqətlə araşdırsınlar”.
Məhəmmədəli QƏRİBLİ
