Bir neçə ildir ənənəvi xarakter almış amillər çimərliklərdən istifadəyə maneçilik yaradır. Çimərliklərə girişin pullu olması, ekoloji vəziyyəti, bəzi çimərliklərin ətrafına hasar çəkilməsi vətəndaşların bu imkandan istifadəsini məhdudlaşdırır. İş o yerə çatıb ki, hazırda pulsuz çimərliklərin də sayı azalıb. Olanlar da pis gündədir. Halbuki, belədə bütün çimərliklər pulsuz olmalıdır.
Çimərliklərin əksəriyyəti bəzi sahibkarların özəl mülkünə çevrilib. Bu işbazlar vətəndaşların çimərliklərdən istifadə etmək hüququnu məhdudlaşdıraraq, çimərliyə giriş üçün müəyyən məbləğ də təyin ediblər. Təbii ki, istirahət üçün hansısa xidmət qarşılığında pul ödənilir. Elə çimərliklər var ki, qapısından girmək belə pulludur. Qiymət isə 5, 10, 15, hətta 20 manat arasında dəyişir.
Digər tərəfdən, son illər Abşeronun bəzi çimərlikləri həddindən artıq çirklənməyə məruz qalıb. Çirkab sularının dənizə axıdılması və ərazini bürüyən üfunət qoxusu, sahilboyu zibil qutularının olmaması və bu səbəbdən ərazinin zibillənmə problemi çimərlik mövsümü üçün prioritet mövzulardan biridir.
Bu arada Bakıda pulsuz çimərliklərin yaradılmasına qərar verilib. Bakı Şəhər İcra Hakimiyyətinin mətbuat xidmətinin rəhbəri İsrafil Kərimov bildirib ki, Bakı şəhərində çimərlik mövsümündə vətəndaşlardan daxil olan müraciətlər, onların istək və arzuları nəzərə alınaraq, aidiyyəti dövlət qurumlarının tapşırıqlarına əsasən paytaxtın bir sıra dənizkənarı ərazilərində ictimai çimərliklərin yaradılması işlərinə başlanıb. O bildirib ki, ilkin mərhələdə bu çimərliklər Səbail rayonu “Şıx” ərazisində və Novxanı qəsəbəsində, sonradan isə Hövsan, Buzovna, Bilgəh, Nardaran, ümumilikdə, 7 ərazidə yaradılacaq: "Çimərliklərə giriş pulsuz olacaq, müvafiq qurumlar tərəfindən bura nəzarət ediləcək".
Sözügedən qərarı ekspertlər necə dəyərləndirirlər? Bu zaman hansı məqamlara diqqət edilməlidir?
Məhərrəm Zülfüqarlı: “Yaxşı olardı ki, sözügedən problem kökündən həll edilsin”
Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlı, prinsipcə, bu qərara müsbət yanaşdı. Ancaq onun fikrincə, elə etmək lazımdır ki, vətəndaşlar, praktiki olaraq, pulsuz çimərliklərdən faydalana bilsinlər: “Ümumiyyətlə, neçə vaxtdır pulsuz çimərliklər məsələsi müzakirə edilir. Xəzər dənizinin hasarlanması, dənizin sahilində müəyyən obyektlərin tikilməsi, dənizin insanların üzünə bağlanması narazılığa səbəb olur. Bəzi çimərliklərin adı pulsuz olsa da, orada sanitar vəziyyət pis gündədir. Həmin çimərliklərə yaxın durmaq belə mümkün deyil. Bütövlükdə, ölkədə pulsuz çimərliklərə böyük tələbat var. Bakı Şəhər İcra Hakimiyyəti pulsuz çimərliklərin yaradılması ilə bağlı belə bir addım atırsa, bunu müsbət qiymətləndirmək lazımdır. Yaxşı olardı ki, deyildiyi kimi, çimərliklər pulsuz olsun. Yəni, praktiki olaraq, bu özünü əməldə göstərsin. İndi baxaq görək bununla bağlı vəziyyət necə olacaq. Əgər doğrudan da bunu edəcəklərsə, o zaman çox yaxşı. Yoxsa söz verib etməyəcəklərsə, o zaman bu sahədə problemlər həll edilməyəcək. Çünki illərdir pulsuz çimərliklər məsələsi gündəmdədir, amma bu həll edilmir. Ona görə də yaxşı olardı ki, sözügedən problem kökündən həll edilsin, alayarımçıq xarakterli olmasın”.
Vidadi ORDAHALLI
