Məlum olduğu kimi, Ali Məhkəmədə ləğv edilmiş Milli Təhlükəsizlik Nazirliyinin (MTN) Transmilli İqtisadi Cinayətkarlığa Qarşı Mübarizə Baş İdarəsinin sabiq rəisi, general-mayor Sübahir Qurbanov, həmin qurumun digər vəzifəli şəxsləri - Füzuli Əliyev, Natiq Alıyev və iş üzrə zərərçəkmiş Əliyev İlqar Nəriman oğlunun kassasiya şikayəti üzrə məhkəmə prosesi keçirilib.
Hakim Fərhad Əliyevin sədrliyi ilə keçirilən prosesdə adıçəkilən şəxslərin kassasiya şikayətini geri götürdükləri elan edilib. İş üzrə zərərçəkmiş şəxs İ.Əliyevin nümayəndəsi şikayətini geri götürmədiyi üçün proses avqustun 1-də davam edəcək.
Qeyd edək ki, Bakı Hərbi Məhkəməsinin hökmü ilə general-mayor Sübahir Qurbanov 14 il, Füzuli Əliyev 14 il, Natiq Alıyev 10 il 6 ay müddətinə azadlıqdan məhrum ediliblər.
Bu ilin fevralında Bakı Apelyasiya Məhkəməsində MTN-in Monitorinq Mərkəzinin sabiq rəisi, general-mayor Teymur Quliyev, Transmilli İqtisadi Cinayətkarlığa Qarşı Mübarizə Baş İdarəsinin sabiq rəisi, general-mayor Sübahir Qurbanov, həmin qurumun digər vəzifəli şəxsləri Füzuli Əliyev, Zaur Məmmədov, Natiq Alıyev, Fərhad Atayev, Anar Şirəliyev və Elşad Əzizovun barəsində olan hökmdən verilən apelyasiya şikayəti üzrə məhkəmə iclası qərar çıxarmışdı. Qərara əsasən, təqsirləndirilən şəxslərin apelyasiya şikayəti təmin edilməyib, birinci instansiya məhkəməsinin çıxardığı hökm dəyişdirilmədən qüvvədə saxlanıb.
Onu da qeyd edək ki, bundan əvvəl Ali Məhkəmədə hakim İnqilab Nəsirovun sədrliyi ilə baş tutan prosesdə Akif Çovdarov və digər şikayət edən şəxslər şikayətlərini geri götürmələri barədə ərizə veriblər və bu ərizə təmin olunub. Bu səbəbdən kassasiya şikayətləri baxılmamış saxlanıb. Sabiq MTN-çilərin şikayətlərini geri götürmələri o anlama gəlir ki, onlar irəli sürülən cinayət ittihamları ilə razıdırlar. Yəni bunu qəbul edirlər.
Maraqlıdır, bəs ekspertlər bunu necə dəyərləndirirlər?
Vüqar Cəfərov: “Sözügedən keçmiş MTN-çilər 2 instansiya məhkəməsini keçiblər”
Məsələyə münasibət bildirən hüquqşünas Vüqar Cəfərovun sözlərinə görə, bu o anlama gəlir ki, sözügedən şəxslər onlara qarşı irəli sürülən ittihamları qəbul edirlər: “Məsələ ondadır ki, Azərbaycanda müəyyən iyerarxiyalı məhkəmə sistemi mövcuddur. Yəni təqsirləndirilən şəxslər yalnız bir instansiya məhkəməsinin qərarı ilə məhkum olunmurlar. Təbii ki, kimsə məhkum olunandan sonra birinci instansiya məhkəməsini keçir. Ondan sonra apelyasiya, ən nəhayət, Ali Məhkəmənin kassasiya instansiyası var. Yəni iş Ali Məhkəmənin kassasiya instansiyasını keçdikdən sonra hökm qanuni qüvvəyə minmiş sayılır. Yəni fərdə, təqsirləndirilən şəxsə Azərbaycan qanunvericiliyi imkan verir ki, üçpilləli məhkəmə sistemindən istifadə etsin. Bu minvalla öz hüquqlarını qorusun. Deməyim odur ki, birinci instansiya məhkəməsinin hökmü ilə razılaşmadıqda, digər məhkəmə instansiyalarından istifadə edir. Buna pilləvi məhkəmə ardıcıllığı deyilir. Sözügedən keçmiş MTN-çilər, göründüyü kimi, 2 instansiya məhkəməsini keçiblər. Ancaq üçüncü instansiya məhkəməsi ilə bağlı şikayətdən imtina ediblər. Burada heç də belə bir nəticə əldə etmək olmaz ki, sözügedən şəxslər şikayəti geri götürüb harasa vermək istəyirlər. Bu belə deyil. Çünki adıçəkilən şəxslər həbsdədirlər. Onlar üçün daha optimal olar ki, indiki halda şikayət versinlər və hökmü yüngülləşdirsinlər. Çünki onlar müəyyən ağır cəzalara məhkum olunublar. Bu ehtimalı görmürlərsə, deməli, onlar ittihamla razılaşıblar ”.
Vidadi ORDAHALLI
