Havaların isti keçdiyi dönəmdə taksi xidmətindən istifadə edən müştərilərin sayı artır. Sərnişinlər daha çox kondisionerli taksilərdən istifadə etməyə üstünlük verirlər. Ancaq, bəzi hallarda, taksi sürücüləri daha çox qazanc əldə etmək üçün kondisioner qoşmaq üçün müştəridən əlavə pul tələb edirlər.
Taksi sürücüləri kondisioner işlətdiyi üçün müştəridən əlavə olaraq 50 qəpik və ya 1 manat pul ödəməsini tələb edirlər. Bu hal son günlər tez-tez müşahidə olunur. Taksidən istifadə edənlər kondisioner üçün əlavə pul ödəməsindən narazıdırlar.
İlqar Hüseynli: “Bu gün bəzi taksi şirkətləri sürücüləri istismar edir və bu, sürücü-sərnişin münasibətlərinin pozulmasına səbəb olur”
Məsələ ilə bağlı fikir bildirən sosial sahə üzrə ekspert İlqar Hüseynli bildirdi ki, taksi sürücülərinin kondisioner işlətdiyi üçün müştəridən əlavə ödəniş tələb etməsi düzgün deyil: “Bəzi sürücülərin bu tələbi taksi xidməti sahəsində çox biabırçı mənzərə yaradır. Məlum tendensiyanın qarşısını almaq üçün taksi sahəsində müəyyən nizam-intizama ehtiyac var. Belə ki, vahid qiymət sisteminin tətbiqi zəruridir. Bu sistemdə tariflər həm sərnişinlər, həm də sürücülər üçün səmərəli olmalıdır”.
Ekspertin sözlərinə görə, bu gün bəzi taksi şirkətləri sürücüləri istismar edir və bu, sürücü-sərnişin münasibətlərinin pozulmasına səbəb olur: “Əksər taksi şirkətləri qiymətləri aşağı salmaqla, başqa şirkətlərlə rəqabətə girməyə çalışırlar. Yəni məlum şirkətləri sıradan çıxarmaq üçün oyun qururlar. Ortada əziyyət çəkənlər isə sərnişinlər və sürücülər olur. Bəzən sürücü fərdi xidmətdə müştəri qıtlığı yaşandığına görə taksi şirkətləri ilə işləməyə məcbur olur. Bu məcburiyyət sürücünün xeyrindən çox, ziyanına yol açır. Bu baxımdan vahid qiymət sistemi tətbiq olunmalı və ciddi dəyişikliklər edilməlidir”.
Həmsöhbətimiz təklif edir ki, hansısa taksi şirkətinin sürücüsü kondisioner işlətdiyi üçün müştəridən əlavə pul tələb edərsə, o zaman həmin şəxs aidiyyəti qurumlara şikayət etsin.
Günel CƏLİLOVA
