Xəzər rayonu, Binə qəsəbəsinin sakinləri illərdir susuzluqdan əziyyət çəkirlər. Məsələ ondadır ki, son illər qəsəbə əhalisinin sayı xeyli artıb. Binə qəsəbəsində torpaq paytaxtın digər əraziləri ilə müqayisədə nisbətən ucuz olduğuna görə son illər ərzində qəsəbədə çoxsaylı ev tikilib və yeni yaşayış massivləri yaranıb. Ancaq evlər plansız tikildiyi üçün, sakinlər su təminatı ilə bağlı ciddi problemlə üzləşiblər.
Sakinlərin dediyinə görə, Binə qəsəbəsinin bir sıra ərazilərinə su xətti çəkilmədiyindən, sakinlər suyu su maşınlarından alırlar. Əvvəl su təminatı ilə bağlı vəziyyət, ümumiyyətlə, çox çətin idi. Şikayətlərdən sonra Binə qəsəbəsinin Sovxoz adlanan yaşayış massivinin müəyyən hissəsinə su xəttinin çəkilməsinə başlanıb. Ancaq Binə qəsəbəsində xeyli sayda sakinin məskunlaşdığı ərazilərdə su yoxdur. Əhali suya olan tələbatını iki cür ödəyir. Bunlardan biri ondan ibarətdir ki, qəsəbədə sakinlər həyətlərdə quyular qazıblar. Demək olar ki, əksər evin həyətində su quyusu qazılıb. Ancaq bu quyulardan çıxan su duzlu olduğundan ondan ancaq məişət məqsədilə istifadə edilir. Daha dəqiq desək, naəlac qalan sakinlər quyu suları ilə paltar yuyur, ağacları sulayırlar. Su duzlu olduğundan bir sıra hallarda ağaclar quruyur. Sakinlər deyirlər ki, quyu suları ilə çimmək belə mümkün deyil. Su duzlu olduğundan çiməndən sonra bədəndə qaşınma yaranır. İçməli suya olan tələbat isə su maşınları vasitəsilə təmin edilir. Yəni pul verib su alırlar. Bu da çox vaxt baha başa gəlməklə yanaşı, suyun keyfiyyətinə də mənfi təsir edir. Yayda vəziyyət daha çətin olur.
Mehdi Məmmədov: “Problem ondadır ki, suyun 1 tonunu 6 manata alırıq”
Binə qəsəbəsinin yeni parniklər adlanan ərazisində çoxsaylı ev tikilib. Bu yaşayış massivinin sakini Mehdi Məmmədovun sözlərinə görə, su ilə bağlı çox ciddi çətinlik çəkirlər: “Yayda bunun nə demək olduğunu hər halda geniş izah etməyə ehtiyac yoxdur. Ona görə ki, hər dəqiqə suya ehtiyac yaranır. Qalırıq belə və bilmirik nə edək. Problem ondadır ki, suyun 1 tonunu 6 manata alırıq. Bir ton su heç beş gün getmir. Beş nəfərlik ailə üçün bu çox bahadır. Elə gün olur ki, istiyə görə 2 dəfə yuyunmalı olursan. Buna su çatdırmaq olar? Su xətti çəkilsə, biz də digər sakinlər kimi kubuna 35 qəpik ödəyib normal yaşayarıq. Dəfələrlə bununla bağlı bələdiyyələrə, digər müvafiq qurumlara müraciət etmişik, amma bir səs-soraq yoxdur. Burada minlərlə insan yaşayır və əksəriyyəti də son illər rayondan köçən insanlardır. Çoxu da iş tapmaqdan ötrü bura üz tutub. Onu da nəzərə almaq lazımdır ki, yaşadığımız yaşayış massivi şəhərə uzaqdır. “Koroğlu” metrostansiyasına getməkdən ötrü iki marşrut dəyişirik. Qazancımızın çoxu yollara çıxır. Bilmirik bunun fikrini çəkək, yoxsa su tapmağın fikrini?! Çox xahiş edirəm, bizə kömək edin, bu problem öz həllini tapsın”.
Anar Cəbrayıllı: “Digər yaşayış massivlərinə də mərhələ-mərhələ su çəkiləcək”
Sözügedən məsələ ilə əlaqədar “Azərsu” ASC-nin İctimaiyyətlə əlaqələr şöbəsinin müdiri Anar Cəbrayıllı ilə əlaqə saxladıq. Onun sözlərinə görə, Binə qəsəbəsinin təxminən 25 faizinə su çəkilib: “Digər yaşayış massivlərinə də mərhələ-mərhələ su çəkiləcək. Bizim Binə qəsəbəsinin su təchizatının yaxşılaşdırılması ilə bağlı layihələrimiz var. Vəsait ayrıldıqca, su xətləri çəkiləcək. Binə qəsəbəsinin müəyyən ərazilərinə ötən il də, bu il də su çəkmişik. Gələn il də bu iş davam etdiriləcək. Yəni mərhələli şəkildə bu işlər icra olunacaq. Hazırda Binə qəsəbəsinin dəmir yolu ərazisində su çəkilir. Ona görə də sakinlər narahat olmasınlar, mərhələ-mərhələ onların da problemi öz həllini tapacaq”.
Vidadi ORDAHALLI
