Məlum olduğu kimi, Daxili İşlər Nazirliyinin (DİN) Baş Pasport, Qeydiyyat və Miqrasiya İdarəsi “Yaşayış yeri və olduğu yer üzrə qeydiyyat haqqında” qaydalarla bağlı məlumat yayıb.
Sözügedən məlumata görə, Azərbaycan vətəndaşlarının olduğu yer üzrə qeydiyyatı “Yaşayış yeri və olduğu yer üzrə qeydiyyat haqqında” Qanunun tətbiqi haqqında Əsasnaməyə əsasən həyata keçirilir. Vətəndaşın olduğu yer üzrə qeydiyyatı yaşayış yeri üzrə qeydiyyatdan çıxarılmadan aparılır.
Bildirilib ki, yaşayış yerindən kənarda 60 gündən artıq müvəqqəti yaşamaq istəyən vətəndaş həmin yerə gəldikdən sonra 7 gün ərzində (istirahət, səsvermə, iş günü hesab edilməyən bayram günləri və ümumxalq hüzn günü istisna olmaqla) internet üzərindən DİN Baş Pasport, Qeydiyyat və Miqrasiya İdarəsinin saytına daxil olmaqla olduğu yer üzrə qeydiyyata alınır.
Vətəndaş olduğu yerdən getdikdə, müvafiq icra hakimiyyəti orqanı onu olduğu yer üzrə qeydiyyatdan çıxarır. Olduğu yer üzrə qeydiyyat haqqında qanunvericiliyin pozulması İnzibati Xətalar Məcəlləsinin 563-cü maddəsi ilə inzibati məsuliyyətə səbəb olur: vətəndaşın olduğu yer üzrə qeydiyyatdan keçməməsinə, yaxud qeydiyyata alma və qeydiyyatdan çıxma qaydalarına əməl etməməsinə görə xəbərdarlıq edilir və ya otuz manat məbləğində cərimə edilir.
Ancaq qəribədir ki, DİN-in qeydiyyatla bağlı zəruri müraciətini bəziləri başqa cür yozub təqdim etmək istəyirlər. Sanki buna başqa cür don geydirməyə çalışırlar. Ancaq, əslində, sözügedən məsələdə qeyri-adi heç nə yoxdur. Yaşayış yerinin qeydiyyatı ilə bağlı əhaliyə müraciət tam normaldır və bunu başqa istiqamətə yozmaq kökündən yanlışdır. Bunun bir sıra müsbət əhəmiyyəti var. O üzdən, hər bir vətəndaş olduğu yer üzrə qeydiyyata düşməlidir.
Bəzilərinin bunu başqa cür yozmasını ekspertlər necə dəyərləndirirlər?
Şəmsəddin Əliyev: “Müəyyən insanlar var ki, DİN-in cinayətkarlıqla mübarizə siyasətinin formalaşdırılması və onun həyata keçirilməsi missiyasını görmürlər”
Məsələyə münasibət bildirən “Polisə Dəstək” İctimai Birliyinin rəhbəri Şəmsəddin Əliyevin sözlərinə görə, bunu başqa cür yozmaq istəyənlər ciddi səhvə yol verirlər: “Bu cür yanaşmaların heç bir əsası yoxdur. Müəyyən insanlar var ki, DİN-in cinayətkarlıqla mübarizə siyasətinin formalaşdırılması və onun həyata keçirilməsi missiyasını görmürlər. Nazirlik, daxili işlər orqanlarının əməkdaşları bu məsələyə sırf cinayətkarlıqla mübarizə kimi baxır. Yanaşma ondan ibarətdir ki, vətəndaşların təhlükəsizliyi təmin olunsun, baş verə biləcək ictimai münasibətlərə zidd halların qarşısını almaq üçün bu tədbirlər görülməlidir. Vətəndaş yaşayış yerindən kənarda olursa, uzun müddət orada yaşayırsa, mütləq mənada onun həmin yerdə qeydiyyata alınması zəruridir. Çünki müəyyən hadisələr baş verə bilər, amma onu törədən subyektin şəxsiyyətini açmaq, müəyyən etmək çətinlik yarada bilər. Yaxud da onun şəxsiyyəti ilə bağlı məlumat əldə olunacaq, lakin yaşadığı və ya qeydiyyatda olduğu yerlə bağlı müəyyən zaman tələb olunduğundan, cinayətin “isti izlərlə” açılması məsələsi yubana bilər. Bütün bunların hamısı ictimai münasibətlərə zidd olduğundan, DİN-in əhaliyə belə bir müraciət etməsi tam normaldır. Hesab edirəm ki, bəzilərinin bunu başqa cür təqdim etməsi tam əsassızdır. Bu cür cəfəng fikirlərə inanmaq olmaz. Çünki Konstitusiya üzrə dövlətin ali məqsədi vətəndaşların hüquq və azadlıqlarının təmin olunmasıdır. Həm də layiqli həyat səviyyəsinin təşkil olunmasından ibarətdir. DİN də dövlətin bu istiqamətdəki siyasətinin icra olunmasına, həyata keçirilməsinə çalışır. Çalışır ki, təhlükəsizlik, ictimai qayda təmin olunsun”.
Vidadi ORDAHALLI
