Prezidentin növbəti humanist addımı olaraq imzaladığı "Bəzi çoxmənzilli binaların istismarına icazə verilməsinin sadələşdirilməsi haqqında” 19 fevral 2019-cu il tarixli, 529 nömrəli Fərmanının icrası ilə əlaqədar Fövqəladə Hallar Nazirliyi (FHN) və digər aidiyyəti dövlət qurumları tərəfindən görülən tədbirlər nəticəsində ötən 5 ay ərzində ümumi sahəsi 1 928 897 kv.m. olan 19551 mənzilli, ümumilikdə, 317 girişli 116 binaya (kompleksə) dair müsbət rəy verilib.
114-ü Bakı şəhəri, 1-i Abşeron rayonu, 1-i isə Gəncə şəhərində yerləşən bu binalara dair sənədlər komplektləşdirilərək, müvafiq qaydada onların istismara hazır olması barədə tərtib edilmiş rəy aidiyyəti üzrə Dövlət Şəhərsalma və Arxitektura Komitəsinə, Abşeron Rayon və Gəncə Şəhər İcra hakimiyyətlərinə təqdim olunub.
Görünən odur ki, ölkə Prezidentinin çoxmənzilli yaşayış binalarının istismara qəbulu prosesinin asanlaşdırılmasına dair Fərmanının icrası prosesi ləng gedir. Azərbaycanda istismarına icazə verilmədən insanların məskunlaşdığı çoxmənzilli yaşayış binalarının və yaxud da komplekslərin sayı 470-dir. Bunun 413-ü Bakı ərazisində, qalan 57 bina isə Abşeron rayonunda, Sumqayıt, Gəncə, Lənkəran və Mingəçevir şəhərlərindədir. Fərmanın imzalanmasından ötən 5 ay ərzində cəmi 116 binaya istismar icazəsinin verilməsi onu göstərir ki, proses kifayət qədər ləng gedir. Hansı ki, ilk dövrlərdə müvafiq qurumlar bu işin sürətlə həyata keçiriləcəyini bəyan edirdilər. Yay ayına qədər həmin binaların yarıdan çoxuna müsbət rəy veriləcəyi gözlənilirdi. Ancaq qeyd edildiyi kimi, indiyə qədər 116 binaya dair müsbət rəy verilib. Maraqlıdır, sözügedən proses niyə ləng həyata keçirilir?
Fuad İbrahimov: “... bürokratik əngəllərlə bağlı deyil”
Məsələyə aydınlıq gətirən iqtisadçı-ekspert Fuad İbrahimovun sözlərinə görə, prosesin yubanması daha çox binalar tikilərkən MTK-ların buraxdığı səhvlərlə bağlıdır: “Yəni onların vaxtında müvafiq qaydalara əməl etməmələri işi belə çətinləşdirir. Ölkə başçısının bu ilin fevralında bununla bağlı müvafiq Fərmanından sonra çoxmənzilli binaların sənədləşdirilməsi ilə bağlı müəyyən canlanma baş verdi. Bir sıra binalar dövlət reyestrinə qəbul edildi. Ancaq, göründüyü kimi, ötən 4 ayda binaların çoxu barədə rəy verilməyib. Lakin bütün bunların səbəbi var. Yubanmanın səbəbi bürokratik əngəllərlə bağlı deyil. Bunun başlıca səbəbi sahibkarların bina tikərkən buraxdıqları səhvlərdir. Problem ondadır ki, binalar inşa edilərkən bir sıra texniki qaydalara əməl edilməyib. Bu gün aktual problemlərdən biri odur ki, binalarda ynğınsöndürmə sisteminin təkmilləşdirilməsi başa çatmalıdır. Ondan sonra binanın dövlət reyestrinə daxil edilməsi qanunauyğun sayılır. Məlum olur ki, sahibkarların günahı üzündən binalarda bununla bağlı çoxsaylı çatışmazlıq var. Ona görə də proses ləng gedir. Paytaxtda xeyli sayda binada yanğın təhlükəsizliyi ilə bağlı problemlərin aradan qaldırılması isə bir sıra səbəblərdən mümkün deyil. Çünki ya binanı tikən MTK artıq mövcud deyil, ya da problemləri aradan qaldırmaq gücü yoxdur. Bu səbəbdən həmin binaların sənədləri verilmir. Ancaq dövlət orqanları tərəfindən bu yöndə səylər artıb. Deməyim odur ki, bu işin yubanmasının başlıca səbəbi binalar tikilərkən MTK-lar tərəfindən buraxılan səhvlərdir”.
Vidadi ORDAHALLI
