Prezident İlham Əliyev şair-publisist Murad Köhnəqalaya mənzil hədiyyə edib. Bu barədə məlumatı şairin özü sosial şəbəkədə paylaşıb.
O bildirib ki, mənzil problemi ilə bağlı Prezident İlham Əliyev və Birinci vitse-prezident Mehriban Əliyevaya ünvanlanan müraciətə müsbət cavab verilib: “Bu şad xəbəri Bakı Şəhər İcra Hakimiyyətindən mənə zəng edərək bildirdilər. Möhtərəm Prezidentimizin mənə bağışladığı ev altmış yaşıma ən gözəl hədiyyədir. Mətbuatımızın 144-cü ildönümündə məni sevindirdiyinə görə cənab Prezident İlham Əliyevə dərin minnətdarlığımı bildirirəm! Azərbaycanın xoşbəxtliyi uğrunda fəaliyyətində ona möhkəm cansağlığı, tükənməz enerji arzulayıram! Qoy həmişə günəş olsun!”.
Murad Köhnəqala bildirib ki, məhz ev kirayəsi verdiyi an Bakı Şəhər İcra Hakimiyyətindən zəng gəldi, dedilər, Prezidentə ünvanlanan məktubu dəyərləndiriblər və mənə mənzil vermək istəyirlər: “Çox sevindim. Bu gün də çağırdılar, getdim, evin yerini göstərdilər. Yeni Yasamalda, Bünyadzadə küçəsində, on üçüncü mərtəbədə ikiotaqlı evdir. Ancaq ev yaşayış üçün iki-üç aya hazır olacaq. Təmirli, hazır vəziyyətdə deyil”.
Qeyd edək ki, Murad Köhnəqala, eyni zamanda, hakimiyyətə qarşı tənqidi mövqedə dayanan jurnalist kimi tanınıb. Ölkə başçısının şairə verdiyi qiymət bir daha göstərir ki, bu cür həssas məsələlərdə hakimiyyət heç bir ayrıseçkiliyə yol vermir.
Elşad Barat: “Dövlət qurumları bu nümunəyə sadiq qalmalıdırlar”
Murad Köhnəqalanın yaxın dostu olan yazıçı Elşad Barat qəzetimizə açıqlamasında bildirdi ki, bu hadisəyə hamı kimi o da ürəkdən sevinib: “Muradın 60 yaşı var. Onunla dost olan şəxs kimi bilirəm ki, kirayədə qalırdı. Çox təəssüf ki, bu gün Azərbaycan yazıçısı öz qonorarı ilə ev ala bilmir. Murad da bunu öz gücünə edə bilməmişdi. Qismət beləymiş. Çox gözəl. İnşallah, başqa evi olmayan yazıçılara da ev arzulayıram. Bu sevinci də birlikdə yaşayarıq. Muradın şəxsən özü müraciət etmədi. Bir çox ziyalı bu təşəbbüsə qoşuldu. Geniş bir siyahı alındı. Baş redaktorlar, millət vəkilləri, tanınmış ziyalılar həmin sənədə imza atdılar. Nə yaxşı ki, müraciətin nəticəsi gözəl oldu. Tənqid inkişaf deməkdir. Muradın tənqidləri obyektiv olub. O, Azərbaycan üçün lazımlı qələm adamıdır. Hesab edirəm ki, dövlət qurumları bu nümunəyə sadiq qalmalıdırlar. Heç bir qələm adamına onun mövqeyinə görə ayrıseçkilik olmamalıdır. Murad kimi adamlar bu xalq üçün yazıblar. Yaradıcı insan adi məişət qayğısı ilə yaşamamalıdır. Onun həmin problemləri həllini tapanda, daha məhsuldar olur, gözəl əsərlər ortaya qoyur. Onu da qeyd edim ki, Murad Köhnəqala ona verilən evin bir otağını mənə verdi. Mənim də kirayədən canım qurtardı, gedib onun yanında yaşayacağam”.
Kəramət Böyükçöl: “Murad xoşbəxt görünəndə mən uşaq kimi sevinirəm”
Murad Köhnəqalanın başqa bir dostu Kəramət Böyükçöl də ölkə başçısının bu qərarına çox sevindiyini deyir: “İlham Əliyev Azərbaycanın böyük şairi Murad Köhnəqalaya ev verib. Muradın, onun ailəsinin üzündəki sevinc hissini heç nəyə dəyişmərəm. Xəbəri eşidən kimi kirayə qaldığı evə gəldim. Murad xoşbəxt görünəndə mən uşaq kimi sevinirəm. O bu dünyaya sığacaq adam deyil, amma dörd divara ehtiyacı vardı. Təbrik edirəm”.
Məhəmmədəli QƏRİBLİ
