Paytaxtda fəaliyyət göstərən tibb mərkəzlərinin bəzisi reklam qaydalarına düzgün riayət etmədiyi üçün cərimələnib. “Yaşam” MMC reklam haqqında qanunvericiliyin pozulmasına görə 5 min manat inzibati qaydada cərimə edilib. Şirkət İnzibati Xətalar Məcəlləsinin 428.7.1. (müvafiq icazə, texniki şərtlər pasportu və icazə müqaviləsi olmadan, həmçinin, onun tələbləri pozulmaqla açıq məkanda reklam yerləşdirilməsinə görə) maddəsi ilə təqsirli bilinib. Bu inzibati xətaya görə hüquqi şəxslər beş min manatdan on min manatadək məbləğdə cərimə edilirlər.
Məlumat üçün bildirək ki, "Yaşam" tibb mərkəzi 2006-ci ildə yaradılıb və ümumi profilli klinikadır.
Tibb mərkəzlərinin reklam qanunvericiliyini pozduğuna görə cərimələndiyini reklam sahəsi ilə məşğul olan mütəxəssislər də təsdiqləyirlər.
Oqtay Əliyev: “Bu gün səviyyəsi olmayan, gördüyü işin keyfiyyəti aşağı olan özəl tibb müəssisələri daha çox xəstə cəlb etmək üçün reklama üstünlük verirlər”
Reklamçılar İttifaqı idarə heyətinin üzvu, reklam sahəsi üzrə mütəxəssis Oqtay Əliyev “Bakı-Xəbər”ə açıqlamasında qeyd etdi ki, klinikaların reklamı əsasən media vasitəsilə yayılır. Küçələrdə klinikaların reklam olunmasına rast gəlinmir: “Klinikaların reklamı KİV-də həm video formasında, həm də yazılı formada yayımlanır. Özəl klinikaların bəzisinin reklamının mediada yayılmasının məqsədi daha çox xəstə qəbul etməkdir. İstər televiziyalarda, istərsə də çap mediasında tibb mərkəzlərinin reklam olunması onların səviyyəsini göstərmir. Reklamı görən tamaşaçı və ya oxucu onların keyfiyyətini ayırd edə bilmir. Belə olan halda rəqabət inkişaf etmir”.
Həmsöhbətimiz onu da bildirdi ki, “Reklam haqqında” Qanuna bəzi əlavə və dəyişikliklərin olunması üçün Milli Məclisdə müzakirəyə çıxarıldı. Qəbul edilən qərar sayəsində tibblə bağlı yayılan reklamlar icra hakimiyyəti orqanlarına həvalə olundu: “Reklam verən müəssisənin gördüyü işin keyfiyyətini icra orqanları müəyyən edəcək. Danılmaz faktdır ki, bu gün səviyyəsi olmayan, gördüyü işin keyfiyyəti aşağı olan özəl tibb müəssisələri daha çox xəstə cəlb etmək üçün reklama üstünlük verirlər. Ancaq səviyyəli tibb müəssisələri reklama ehtiyac duymadıqları üçün, onlar piara önəm vermirlər”.
Həmsöhbətimiz onu da vurğuladı ki, özəl tibb müəssisələrinin reklamı kortəbii şəkildə aparıldığı üçün onlar cərimə olunurlar. Bu sahəni inkişaf etdirmək üçün reklam sahəsində sağlam rəqabəti inkişaf etdirmək lazımdır.
Günel CƏLİLOVA
