23/08/2019 00:54
728 x 90

Azərbaycanda ailə, əmək mübahisələrində Mediasiya xidməti öz praktik nəticələrini göstərməyə başladı

“Mediasiya xidməti ölkəmizdə özünü doğruldacaq”

img

Ölkəmizdə boşanma hallarının çoxalması səbəbindən bunun artmaması üçün qabaqlayıcı tədbirlərin həyata keçirilməsi istiqamətində işlər görülür. Həm bu, həm də digər mübahisəli məsələlərin məhkəməyə qədər həll olunması yönündə Mediasiya xidməti fəaliyyətə başlayıb.  

Əmək, ailə və iqtisadi mübahisələrin məhkəməyə qədər mediasiya xidməti vasitəsilə həlli üçün hallar müəyyənləşib. Baş nazir Novruz Məmmədovun təsdiq etdiyi “İlkin mediasiya sessiyası zamanı mediasiya xidmətinin göstərilməsinə görə haqqın və digər xərclərin məbləği”nə dair qərar 2020-ci il iyulun 1-dən qüvvəyə minir.

Azərbaycanda yeni institut olan Mediasiya xidmətinin tətbiqinə artıq başlanıb. Məlumatlara görə, Azərbaycanda 2018-ci ilin aprel ayından bu ilin iyun ayınadək 317 ailə nikahın pozulmasından imtina edib.

Bütövlükdə, Mediasiya xidməti Azərbaycan mühitində işləyə biləcəkmi?

  • Əliməmməd Nuriyev: “Mediatorların tərəfləri razılığa gətirməsi nəticəsində 300-dən artıq ailə boşanmadan imtina edib, bu böyük uğurdur”

Tanınmış hüquqşünas Əliməmməd Nuriyev “Bakı-Xəbər”ə bildirdi ki, Mediasiya xidmətinin Azərbaycanda çox böyük perspektivi var. Mediasiya xidmətinin zərurətdən yaradıldığını deyən Ə.Nuriyevin sözlərinə görə, bunun əhəmiyyəti odur ki, bir sıra problemlər məhkəməyə gedib çıxmayacaq və yerindəcə həll olunacaq. “Mediasiya xidməti ölkəmizdə özünü doğruldacaq. Çünki buna artıq əsaslar da var. Bu xidmət yalnız nikah pozulmasının qarşısını almayacaq, eyni zamanda, əmək və iqtisadi məsələlərin də məhkəməyə gedib çıxmadan həllini həyata keçirəcək. Bu xidmətin göstərilməsi həm də məhkəmə xərclərinin azalmasına gətirib çıxaracaq, həmçinin, məhkəməyə gediş-gəlişlərin qarşısını alacaq. İnsanlar arasında nikahın pozulmasının qarşısı alınmaqla yanaşı, həm də onlara məhkəmə prosesi izah ediləcək. Mediatorlar bütün bunları tərəflərə izah etməklə problemin həllinə nail olacaqlar. Yəni tərəflər arasında razılaşma əldə ediləcək. Onların işi məhkəməyə düşsə, tərəflərdən biri udacaq, o biri isə uduzacaq. Bu bütün məsələlərdə belədir. Özü də bu sahədə insanlara yalnız hüquq və vəzifələri anladılmayacaq, həm də hər şey onlara psixoloji tərəfdən izah ediləcək, yardım göstəriləcək. Bu baxımdan, Azərbaycanda mediasiyanın tətbiqi imkanları çox böyükdür. Bilirsiniz, ölkəmizdə mediasiyanın ənənəvi forması tarixən mövcud olub. Bu mənada ki, o vaxt ailə mübahisələrinin, eləcə də əmək və sairlə bağlı konfliktlərin həll olunmasında ağsaqqallar mühüm rol oynayırdılar, onlar tərəfləri barışdırıb problemin həllinə nail olurdular. Ağsaqqallar problemi elə həll edirdilər ki, bu məsələ məhkəməyə gedib çıxmırdı. Demək istəyirəm ki, Azərbaycanda bu prosesin şifahi ənənəsi var. Ona görə hesab edirəm ki,ölkəmizdə mediasiyanın perspektivi böyükdür. Məlumatıma görə, mediatorların tərəfləri razılığa gətirməsi nəticəsində 300-dən artıq ailə boşanmadan imtina edib, bu böyük uğurdur” - deyə Ə.Nuriyev vurğuladı. O, həmçinin, qeyd etdi ki, mediasiya institutu rəsmi şəkildə formalaşmadığı dönəmlərdə Azərbaycanda QHT və Ədliyyə Nazirliyi boşanmaların qarşısının alınması üçün mediatorluq həyata keçiriblər.   

İradə SARIYEVA

Son xəbərlər