23/08/2019 01:04
728 x 90

Bina tikən MTK-lara yeni və gərəkli tələb - ərazinin azı 40 faizini yaşıllaşdırmalısınız...

“Hesab edirəm ki, bu tələb Bakının ekoloji vəziyyətinin yaxşılaşması üçün əhəmiyyət kəsb edir”

img

Azərbaycanda tikinti şirkətlərinin qarşısına yeni tələblər qoyulub. Çoxmərtəbəli bina inşa edən sahibkarlar ərazinin 40, müstəsna hallarda 30 faizində yaşıllıq salmalıdırlar. Bu barədə mətbuata açıqlamasında Bakı Şəhər Yaşıllaşdırma Təsərrüfatı Birliyinin Bitkilərin mühafizəsi şöbəsinin rəisi Orxan Məmmədov məlumat verib.

O, bildirib ki, bu qayda paytaxtda yaşayış binası inşa edən bütün tikinti şirkətlərinə şamil ediləcək. O.Məmmədovun sözlərinə görə, indiyədək tikinti şirkətlərinin çoxu yaşayış binası inşa edərkən ərazini yaşıllaşdırmağa maraq göstərməyib. Amma bundan sonra tikinti şirkətlərinin hər biri bu tələbə əməl etməli, yəni bina inşa edərkən ərazinin 40, müstəsna hallarda 30 faizində yaşıllıq salmalı olacaqlar.

Şöbə rəisi bildirib ki, bu tələbə əməl etməyən tikinti şirkətlərinə qanunun icrası məcburi olacaq: "Əgər hansısa tikinti şirkəti buna əməl etməyəcəksə, məcburi qaydada yaşıllığın salınması təmin ediləcək".

O da məlum olub ki, bu məsələ "Yaşayış məntəqələrinin yaşıllıqla təmin edilməsi normaları"nda öz əksini tapıb. Belə ki, bu normalar Azərbaycan Respublikasının Şəhərsalma və Tikinti Məcəlləsinin 68.2-ci maddəsinə uyğun olaraq hazırlanıb və yaşayış məntəqələrinin yaşıllıqla təmin edilməsi qaydalarını müəyyən edir: “Bu normalara görə, yaşayış məntəqələrinin layihələndirilməsi zamanı yaşıllıq ərazinin minimum 40 faizini təşkil etməlidir. Amma müstəsna hal kimi 30 faiz də götürülə bilər. Yeni qayda beş il və daha əvvəl inşa olunmuş binalara aid deyil”.

O da məlumdur ki, indiyədək tikinti şirkətlərinin mütləq əksəriyyəti necə gəldi binaları inşa ediblər. Nəzərə alsaq ki, Bakıda əhalinin sayı çoxaldığı üçün sıxlıq xeyli artıb, yaşıllıqların artırılması ekoloji baxımdan çox vacibdir.

Bu qərarı ekspertlər necə dəyərləndirirlər?

  • Rəsul Cahangirli: “Elə bir mexanizm yaradılmalıdır ki, tikinti şirkətləri bu tələbə praktiki olaraq əməl etsinlər”

Məsələyə münasibət bildirən ekspert Rəsul Cahangirlinin sözlərinə görə, çoxmərtəbəli bina inşa edən sahibkarlar qarşısında belə bir tələbin qoyulması vacib addımdır: “Görək tikinti şirkətləri bundan sonra sözügedən qaydaya necə əməl edəcəklər. Məsələ ondadır ki, bu sahədə ciddi problemlər var. Əksər tikinti şirkəti çoxmənzilli binalar tikərkən yaşıllıqların salınmasına maraq göstərməyib. Düzdür, bundan əvvəl də bununla bağlı tələb var idi, amma bu məcburi deyildi. Azərbaycan müstəqillik əldə etdikdən sonra bu sahədə qanunda yaranan boşluqlardan istifadə edən sahibkarlar yaşıllıqların salınmasına əhəmiyyət vermirdilər. Aldıqlari ərazilərdə binalar inşa edirdilər. Bəzən ərazidə binaları o qədər bir-birinə yaxın inşa edirdilər ki, yaşıllıqların salınması üçün yer belə qalmırdı. O da heç kəsə sirr deyil ki, Bakıda yaşıllıqları qırıb yerində binaların tikilməsi halları da olub. Son illər bu sahədə vəziyyət xeyli dəyişib. Bina tikintisi ilə bağlı yeni normalar müəyyənləşdirilib. Hesab edirəm ki, bu tələb Bakının ekoloji vəziyyətinin yaxşılaşması üçün əhəmiyyət kəsb edir. Ona görə ki, çoxmənzilli binaların ətrafında yaşıllıqların salınması həyati əhəmiyyət kəsb edir. Təəssüflər olsun ki, bu sahədə hazırkı vəziyyət qənaətbəxş deyil. Müqayisə üçün qeyd edək ki, Ukraynanın paytaxtı Kiyev şəhəri yaşıllıqlar içindədir. Orada binaların həyətlərində yaşıllıqların salınmasına xüsusi diqqət göstərilir. Ən nəhayət, bu qərara tikinti şirkətlərinin bundan sonra necə əməl edəcəklərinə diqqət edilməlidir. Elə bir mexanizm yaradılmalıdır ki, tikinti şirkətləri bu tələbə praktiki olaraq əməl etsinlər”.

Vidadi ORDAHALLI

Son xəbərlər