07/12/2019 10:52
728 x 90

Şəhərətrafı yollarda “piyada zebraları” bərbad günə düşüb...

“Həmin ərazilərdə yaşayan sakinlər belə hallarla bağlı aidiyyəti qurumlara tez məlumat verməlidirlər”

img

Bəzən yollarda piyada zolaqlarının silinməsi halları ilə rastlaşırıq. Belə olan halda yalnız nişanların olması sürücülərə kifayət etmir, zolaqların silinməsini görmürlər. Bütün bu kimi hallar isə piyadaların hərəkətində çətinlik yaradır. Xüsusilə də məktəb ətrafındakı yollarda piyada zolaqlarının silinməsi şagirdlər üçün təhlükə yaradır və onların hərəkətini çətinləşdirir. Artıq neçə vaxtdır şagirdlər tətildədirlər. Ancaq nəzərə almaq lazımdır ki, 2 aydan sonra dərslər yenidən başlayacaq

Bakıda avtomobil yollarında piyada zolaqlarının silinməsi sürücülərin narazılığına səbəb olur. Müşahidələr göstərir ki, paytaxtın mərkəzi hissəsi ilə müqayisədə ətraf ərazilərdə silinmiş piyada zolaqları daha çoxdur. Mərkəzdə belə hallar olanda tez həmin zolaqlar rənglənir. Bakının ətrafında isə bir çox avtomobil yolunda yol örtüyündəki piyada zolaqları silinib, bəziləri isə ümumiyyətlə görünmür. Bu da yollarda bədbəxt hadisələrin baş verməsinə və sürücülərin cərimələnməsinə səbəb olur. Suraxanı, Sabunçu rayonları ərazisində rəngi silinmiş piyada zolaqları çoxdur. O üzdən, sözügedən problemi necə həll etmək olar? Niyə bu zolaqlar vaxtında rənglənmir?

  • Azər Allahverənov: “İctimai nəzarət təkmil şəkildə qurularsa, silinmiş piyada zolaqlarının sayı azalacaq”

Məsələyə münasibət bildirən nəqliyyat sahəsi üzrə ekspert Azər Allahverənovun sözlərinə görə, rəngi solan və ya silinən piyada zolaqları məsələsi çox aktualdır: “Bu gün nəinki Bakıətrafı qəsəbələrdə, hətta şəhərin özündə belə, həmin zolaqların silindiyinin şahidi oluruq. Düzdür, mərkəzdə belə zolaqlar tez rənglənir, amma ətraf ərazilərdə biz bunu görmürük. Bakıətrafı qəsəbələrdə bu məsələ bir qədər diqqətdən kənarda qalıb. Məsələ ondadır ki, şəhərdə aidiyyəti qurumların nümayəndələrinin çox olması daim bu məsələnin diqqət mərkəzində qalmasına öz təsirini göstərir. Bir qədər ətraf ərazilərdə isə piyada zolaqlarının vaxtında rənglənməsinə etinasız yanaşılır. Nəticədə belə halların sayı artır. Belə halları necə aradan qaldırmaq olar? Hesab edirəm ki, həmin ərazilərdə yaşayan sakinlər belə hallarla bağlı aidiyyəti qurumlara tez məlumat verməlidirlər. Bunu təkcə sakinlər yox, eyni zamanda, həmin ərazidə yerləşən inzibati mərkəzlərə rəhbərlik edən şəxslər də etməlidirlər. Ən azından, Bakı Nəqliyyat Agentliyinə, Dövlət Yol Polisinə məlumat verə bilərlər. Həmin qurumlar da, öz növbəsində, silinən piyada zolaqları ilə bağlı zəruri tədbirlər görsünlər. Mən özüm zaman-zaman belə silinmiş piyada zolaqları gördükdə şəklini çəkib aidiyyəti qurumlara təqdim edirəm. Onlar da operativ şəkildə zəruri rənglənmə işlərini həyata keçirirlər. Yəni, bax, bu nöqteyi-nəzərdən ictimai nəzarət təkmil şəkildə qurularsa, belə silinmiş piyada zolaqlarının sayı azalacaq. Bələdiyyələr də bu işdə fəal ola bilərlər. O üzdən, problemin həllinə kompleks yanaşma olmalıdır”.

Vidadi ORDAHALLI

Son xəbərlər