23/08/2019 00:53
728 x 90

“Moyka”larda işləyənlərin müştəri avtomobili qaçırması hallarına xeyli vaxt idi rast gəlinmirdi…

“Avtoyuma məntəqələrinin bəzisində çalışan gənclərin bir qismi nə etdiklərinin fərqinə varmadan “moyka”dan maşın qaçırırlar”

img

Azərbaycanda avtoyuma məntəqələrindən maşınların qaçırılması barədə xəbərlər tez-tez eşidilir. Eləcə də maşınlardan hansısa əşyaların oğurlanması halları da olur. Belə olduqda sürücülər maşını yuyulmağa verdikdə orada gözləsələr, daha yaxşı olar.

Bəzi hallarda isə sürücü avtomobilin açarını avtoyuma məntəqələrində çalışan şəxslərə verib, bir saata qayıdıb maşını təhvil götürəcəyini deyir. Fürsətdən istifadə edən bəzi işbazlar avtomobilin açarının onda olmasından yararlanaraq həmin minik vasitəsilə “avtoşluq” etməyə başlayırlar. “Moyka”dan qaçırılan avtomobillər tərəfindən törədilən qəzalar dəfələrlə ictimaiyyətə açıqlanıb.

Bu günlərdə Baş Dövlət Yol Polisi İdarəsi avtomobil sahiblərinə mövzu ilə bağlı müraciət edib.

İdarənin yaydığı məlumatda qeyd olunur ki, bir çox hallarda avtomobil sahibləri təmir və ya avtoyuma məntəqələrinin xidmətlərindən istifadə edərkən nəqliyyat vasitəsinin açarlarını da məntəqə işçilərinə verərək oranı tərk edirlər. Belə hallar isə bəzən həmin məntəqələrdə çalışan və adətən gənc, hərəkətlərinin məsuliyyətinin fərqinə varmayan bir sıra insanlara sahibi yanında olmayan nəqliyyat vasitələrindən qanunsuz istifadə etmək fürsəti yaradır: “Müştərilərin etibarından sui-istifadə etməklə yanaşı, qanunvericiliyin də tələblərini kobud şəkildə pozaraq onlara həvalə edilmiş avtomobili qaçıraraq idarə edən belə gənclər tərəfindən bir sıra hallarda insanların həlak olması, yaralanması ilə nəticələnən ağır yol-nəqliyyat hadisələri törədilir. Bununla yanaşı, bəzən xidmət göstərməli olduqları nəqliyyat vasitələrindən oğurluq edən, onlardan öz əmlakı kimi istifadə edən şəxslərə də rast gəlinir. Odur ki, avtomobil sahiblərinə müraciət edərək tövsiyə edirik ki, təmir və ya avtoyuma məntəqələrinin xidmətlərindən istifadə edərkən mümkün qədər məntəqəyə yaxın ərazidə olmağa çalışın, avtomobilinizi təsadüfi deyil, tanıdığınız, məsuliyyətli, peşəkar insanlara etibar edin”.

Qeyd edək ki, “moyka”lardan avtomobillərin qaçırılması cinayət hadisəsi olmaqla yanaşı, bu işi edən şəxs minik vasitəsini yüksək sürətlə idarə edərək öz həyatını risqə atır.

  • İlqar Hüseynli: “Maşın sahibləri avtomobil təmizlənərkən avtoyuma məntəqəsində olsunlar”

Sosial sahə üzrə ekspert İlqar Hüseynli bildirdi ki, avtoyuma məntəqələrinin bəzisində çalışan gənclərin bir qismi nə etdiklərinin fərqinə varmadan “moyka”dan maşın qaçırır: “Həmin gənclər elə bilirlər ki, kimsə avtomobolinin yuyulması üçün açarı onlara təhvil veribsə, onlar maşından necə gəldi istifadə edə bilərlər. Bəzi hallarda, avtomobildən nəsə oğurlayırlar. Daha pis halda isə həmin maşını istədikləri kimi idarə edirlər. Hətta bəziləri avtomobili yüksək sürətlə idarə etdiyinə görə qəza hadisəsi törədirlər. Bu kimi hadisələr dəfələrlə qeydə alınıb.

Bir neçə il əvvəl avtomobil sahibi maşınının təmizlənməsi üçün onu moykaya verib və orada dayanmayaraq açarı da işçilərə təhvil verib harasa gedib. Sonra həmin şəxs maşında videokamera vasitəsilə “moyka”da çalışan gənc bir oğlanın avtomobili çala-çuxur yollarda yüksək sürətlə sürdüyünü müşahidə etmişdi. Daha sonra minik vasitəsinin sahibi həmin görüntünü sosial şəbəkədə yaymışdı ki, “moyka”da çalışanlar avtomobilin başına nə cür “oyunlar açırlar”.

Həmsöhbətimiz tövsiyə edir ki, maşın sahibləri avtomobil təmizlənərkən avtoyuma məntəqəsində olsunlar.

Günel CƏLİLOVA

Son xəbərlər