Qarpız mövsümünün hazırkı ən qızğın vaxtında bu məhsulun bir kilosu bazarlarda 40-50 qəpikdən satılır. Bostanlarda 20-25 qəpikdən təklif edilən qarpızın 1 kiloqramı satış məntəqələrində iki dəfə baha satılır. Alıcılar qiymətlərin ötən ilin eyni dövrü ilə müqayisədə baha olduğunu bildirirlər.
Qeyd edək ki, ötən il və ondan qabaqkı illərdə qarpız hətta 20-25 qəpiyə satılırdı. Yemişin qiyməti isə kilosu 60 qəpikdən başlayır və 2 manata qədər yüksəlir.
Bu arada Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsinin müdiri Vüqar Hüseynov mətbuata açıqlamasında bildirib ki, paytaxt və bölgələrdə qarpızın qiyməti ötən ilin müvafiq dövrü ilə müqayisədə iki dəfə ucuzdur: “Hazırda qarpızın sahələrdən alış qiyməti 21-25 qəpik, paytaxt və böyük şəhərlərdə pərakəndə satış qiyməti 35-45 qəpikdir. Ötən il iyul ayında qarpızın pərakəndə satış qiyməti 70-90 qəpik təşkil edirdi. Hazırda bazarlara çıxarılan qarpız istixana şəraitində yetişdirilmiş yerli məhsuldur. Açıq sahələrdən qarpızın kütləvi yığımına yaxın günlərdə başlanacaq. Buna bir müddətdir bölgələrdə davam edən yağıntılı hava şəraiti mane olur. Bazara təklifin artması ilə qiymətlərdə ucuzlaşma olacağı gözlənir”.
Nazirlik rəsmisi onu da əlavə edib ki, 2018-ci illə müqayisədə bu il daha 300 hektar artıq sahədə qarpız əkilib, ümumilikdə, qarpız sahələrinin həcmi 15100 hektar təşkil edir.
Maraqlıdır, qarpızın qiymətinin ötən ilin eyni dövrü ilə müqayisədə iki dəfə ucuz olması ilə bağlı deyilənlər nə dərəcədə realdır? Doğrudanmı ötən illə müqayisədə qarpız iki dəfə ucuzdur?
Vahid Məhərrəmov: “Bunu ötən illə müqayisə edib demək ki, ötən ilə baxanda qarpız ucuzdur, bu cür yanaşma absurddur”
Məsələyə münasibət bildirən kənd təsərrüfatı sahəsi üzrə mütəxəssis Vahid Məhərrəmov qarpızın qiyməti ilə bağlı deyilənlərlə razılaşmadı. Onun fikrincə, ötən ilin eyni dövrü ilə müqayisədə qarpız ucuz deyil: “Bu cür məlumatlar insanlarda çaşqınlıq yaradır. Sanki belə rəy yaranır ki, insanların yaddaşı zəifləyib. Ötən il bəli, qarpız istehsalı az idi. Ona görə ki, qarpız əkilən ərazilərdə pambıq becərilirdi. Bu səbəbdən qarpız əkinləri azalmışdı. Ancaq ötən il bu vaxtlar qarpızın qiyməti təxminən indiki kimi idi. Yəni qiymət 35-40 qəpik arasında dəyişirdi. İndi də elədir. Mən özüm bazarlarda oldum. Biz Kənd Təsərrüfatı Nazirliyindən fərqli olaraq aybaay, on gündən bir monitorinq aparırıq və qeyd edirik. Keçən il də qiymət baha idi, bu il də. Əslində, iqlim dəyişikliyi nəticəsində məhsul istehsalı 20-25 gün irəli çəkilib, xüsusən də qarpız istehsalı. Biz indi avqust ayında görəcəyik ki, indi yığılan qarpız yeməli olmayacaq. Ona görə ki, xarrayacaq. Lap əvvəllər qarpız avqust ayında yaxşı yetişirdi, indi isə iyul ayında. Ona görə də indi qarpızın qiyməti 15-20 qəpikdən baha olmamalı idi. Ancaq təəssüflər olsun ki, bu gün qiymət iki dəfə bahadır. Bunu ötən illə müqayisə edib demək ki, keçən ilə baxanda qarpız ucuzdur, bu cür yanaşma absurddur. İnsanlar belə açıqlamalara inanmaz”.
Vidadi ORDAHALLI
