23/08/2019 22:22
728 x 90

Yas mərasimləri yalnız qəbiristanlıqların yanında?...

img

Nazirlər Kabinetinin qərarına əsasən, hazırda yeni qəbiristanlıq ərazilərinin seçilməsi üçün işlər aparılır. Aparılan işlər sayəsində yas mərasimləri bundan sonra qəbiristanlıqların yanında keçiriləcək. Milli Məclisin İctimai birliklər və dini qurumlar komitəsinin sədri Siyavuş Novruzov media nümayəndələrinə açıqlamasında deyib ki, yeniliklərin tətbiqində əsas məqsəd bu sahədə sosial ədalətin təmin edilməsidir: “Maddi cəhətdən imkanı aşağı olan ailələr üçün isə yas mərasimlərini bələdiyyələr təşkil edəcək”.

Qeyd edək ki, qəbiristanlıqların salınması və idarə edilməsi qaydalarına əsasən, bu ərazilərin idarəçiliyi bələdiyyələrin ixtiyarına verilir. Yas mərasimlərinin qəbiristanlıqların yanında bələdiyyələr tərəfindən keçirilməsi bəzi ekspertlər tərəfindən müsbət qarşılanır.

  • İsmayıl Əhməd: “Yas mərasimlərinin qəbiristanlığa yaxın ərazidə keçirilməsi, istər-istəməz, mərasimdə iştirak edəcək insanların…”

Dinşünas İsmayıl Əhməd “Bakı-Xəbər”ə açıqlamasında qeyd etdi ki, qəbiristanlıq ərazilərində yas mərasimlərinin keçirilməsi mümkün haldır. Ancaq mərasimin qəbiristanlığa yaxın ərazidə keçirilməsi, istər-istəməz, mərasimdə iştirak edəcək insanların sayına təsir edəcək: “Buna psixoloji tərəfdən də yanaşmaq lazımdır. Elə insan var ki, onun qəbiristanlığa qarşı kompleksi var. Orada verilən ehsanlara da əlini  vurmayacaq. Bu kimi məsələlər nəzərə alınmalıdır. Eyni zamanda, uzaqda yaşayan insanlar nə üçün qəbiristanlığa yaxın ərazidə yas mərasimi keçirməlidirlər? Bu qayda könüllü olmalıdır”.

  • Hacı Təyyar Hüseynli: “Yas mərasimlərinin qəbiristanlığa yaxın ərazidə keçirilməsi mümkündür”

İlahiyyatçı Hacı Təyyar Hüseynli bildirdi ki, qəbiristanlıqların bələdiyyələrin ixtiyarına verilməsi müsbət haldır. Yeni qərara əsasən, aztəminatlı ailələrə dəstək, onların kədərinə şərik olmaq üçün yas mərasimlərinin bələdiyyələr tərəfindən keçirilməsi məqsədəuyğundur. O hesab edir ki, bu qayğı cəmiyyətin məmnunluğuna xidmət edən dövlət proqramıdır: “Qəbiristanlıqların fəaliyyətinin, eləcə də yas mərasimlərinin tənzimlənməsinə ehtiyac var idi. İndi bu məsələyə builki bələdiyyə seçkilərindən sonra daha yaxından baxılacaq. Hesab edirəm ki, yas mərasimlərinin qəbiristanlığa yaxın ərazidə keçirilməsi mümkündür. Bu qayda bir çox ölkədə tətbiq olunur. Bunun əhəmiyyəti odur ki, burada qiymətlər nisbətən ucuz olacaq və ölü sahibi elə də böyük çətinliklərlə üzləşməyəcək”.

Günel CƏLİLOVA

Son xəbərlər