Dünya ölkələri arasında xarici iqtisadi əlaqələrin sürətlə inkişaf etdiyi müasir dövrdə beynəlxalq turizm xarici iqtisadi fəaliyyətin ən dinamik inkişaf edən sahələrindən birinə çevrilib. Ümumiyyətlə, turizm xidmətin xüsusi bir sahəsi olmaqla, insanların beynəlxalq hərəkəti və yaxud səyahəti ilə bağlıdır. Bu sahənin inkişafı XX əsrin ikinci yarısından başlayaraq geniş vüsət alıb.
Müstəqilliyini bərpa etdikdən sonra yeni ictimai-iqtisadi inkişaf yoluna qədəm qoyan, açıq bazar iqtisadiyyatı sisteminin tələbləri əsasında inkişaf edən Azərbaycan beynəlxalq aləmə inteqrasiya prosesləri çərçivəsində dünya dövlətləri ilə iqtisadi əlaqələrini genişləndirib. Məlumdur ki, ölkəmizdə bu əlaqələrin bir qolu olan beynəlxalq turizm münasibətlərinin inkişafı istiqmətində də təqdirəlayiq işlər görülüb. Artıq Azərbaycan turizmi inkişaf dövrünü yaşayır. Dünyanın dörd bir yanından ölkəmizə turistlər gəlir. Ümumiyyətlə, xarici ölkələrdən Azərbaycana turist axını artmaqda davam edir.
Açıqlanan statistik rəqəmlərə əsasən, ölkəyə gələn turistlərin sayı ötən ilin 6 ayı ilə müqayisədə 6,5 faiz artıb. Ölkəyə gələn turist sayını artırmaq üçün çoxlu işlər görülür. Görülən işlərə baxmayaraq, bəzi sahələrdə müəyyən problemlər var. O problemlərdən biri də yol kənarındakı ayaqyollarının bərbad vəziyyətdə olmasıdır. Bu problem daha çox paytaxtdan bölgələrə gedərkən yol kənarlarında olan ayaqyollarında müşahidə olunur. Azərbaycana gələn əcnəbi turistləri narahat edən məsələlərdən biri də ictimai tualetlərin az olması, bəzi yerlərdə isə ümumiyyətlə olmamasıdır. Bu hal ölkəyə istirahət üçün gələn turistlərin narazılığına səbəb olur.
Elgün Cavadov: “Bakı-Şəki əsas turizm marşrutu hesab olunduğu üçün, gələcəkdə qeyd olunan istiqamət üzrə sahibkarlıq subyektləri içərisindəki sanitar qovşaqların yaxşılaşdırılması layihəsinin olması gözlənir”
Dövlət Turizm Agentliyinin Regional turizm və qoruqların inkişafı sektorunun müdiri Elgün Cavadovun sözlərinə görə, məsələ agentliyin diqqətindədir: "Bununla bağlı layihələndirmə işləri də aparmışıq. İlkin olaraq Dövlət Turizm Agentliyinin rəhbərliyinə iki layihə təqdim etmişik. Bakı-Şəki istiqaməti bizim əsas turizm marşrutu hesab olunur, gələcəkdə marşrutlar çoxalacaq. Bu marşturun üzərində olan bir çox rayonda sahibkarlıq subyektləri içərisindəki sanitar qovşaqların yaxşılaşdırılması layihəsi olub. Hələ ki, layihə yekunlaşmayıb. Əslində, nə vaxt yekunlaşması dəqiq deyil. Ümid edirik ki, bu il ərzində və gələn ilin ilk aylarında bu layihəni həyata keçirəcəyik. Bundan başqa, bu ildən və gələn ilin əvvəlindən bir çox turizm rayonunda, xüsusən də turizm marşrutları üzərində olan rayonlarda sahibkarlıq obyektlərində təlimlər keçirəcəyik. Bu təlimlərin məqsədi həm xidmət səviyyəsinin yüksəldilməsi, həm də turistə olan davranışların yaxşılaşdırılması istiqamətindədir. Burada da biz həmin restoranlara tövsiyələr verəcəyik ki, dəyişikliklər etsinlər”.
Elçin Rüstəmov: “Paytaxtdan bölgələrə gedərkən yol kənarında olan ayaqyollarının əksəriyyətinin vəziyyəti bərbaddır”
Turizm sahəsi üzrə ekspert Elçin Rüstəmov bildirdi ki, paytaxtdan bölgələrə gedərkən yol kənarında olan ayaqyollarının əksəriyyərinin vəziyyəti bərbaddır: “Bəzisində su var, əl yumağa duru sabun, başqa birisində su olmur. Ümumiyyətlə, yol kənarında ayaqyollarında natəməzlik hökm sürür. Sanki illərdir həmin yer təmizlənmir. Təbii, qorxunc mənzərəni görən turistin Azərbaycan haqqında fikri dəyişəcək. Bərbad və natəmiz vəziyyətdə olan ayaqyolu üzündən xarici qonaqların yanında xəcalət çəkirik. Yaxşı olar ki, yol kənarında fəaliyyət göstərən restoran sahibləri obyektləri təmir etməklə yanaşı, ayaqyollarına da nəzər yetirsinlər. Bəzi sahibkarlar bu sahədə yaşanan problemdən xəbərdar olsalar da, həll etmək istəmirlər. Hətta bir neçə nəfərlə söhbətimiz olub, onlardan, “ay filankəs, imkanın da var, bəs niyə bir 20-30 dənə sivil, təmiz, səliqəli, pullu ayaqyolu açmırsan trass boyunca, suyu, sabunu, lavandalı fıs-fıs, farfor aftafa filan, gör nə qədər para qazanarsan” soruşmuşuq. Bəziləri deyir ki, “yox, mən bunu heç vaxt etmərəm, hərçənd problemin olmasını inkar etmirəm. Sonra məni öz adımla deyil, “tualet filankəs!” deyə çağırarlar”. Bu səbəbdən də sahibkarlar bu sahədən yan keçirlər. Nəticədə isə natəmizlik baş alıb gedir və bu hal turizmə təsir edir. Yaxşı olar ki, aidiyyəti qurumlar bu məsələni nəzarətə götürsünlər”.
Günel CƏLİLOVA
