Masallı rayonunun Qızılavar kəndində, Masallı-Boradigah yolunun sol tərəfində Böyük Vətən Müharibəsində həlak olanların xatirəsinə ucaldılan möhtəşəm abidənin dağıdılması ilə bağlı məlumat vermişdik. Həmin kəndin sakinləri yenidən redaksiyamızla əlaqə saxlayıblar. Onlar bildirirlər ki, prosesdə heç bir irəliləyiş yoxdur, rayon rəhbərliyi baş verən vandallıq hərəkətini ört-basdır etməklə məşğuldur.
Xatırladaq ki, biz bu istiqamətdə apardığımız araşdırma nəticəsində bir çox qurumla əlaqə saxlayıb, həmin tarixi abidənin niyə sökülməsilə maraqlanmışıq. Ancaq təəssüflər olsun ki, əlaqə saxladığımız bütün qurumların rəsmiləri, əslində, bu ciddi hadisə ilə bağlı yaxalarını kənara çəkməyə çalışıblar. Kənd sakinlərinin sözlərinə görə, həmin abidənin sökülməsinə 71 saylı Masallı kənd seçki dairəsinin sədri İlkin Əzizovun rəhbərlik etdiyi deyilir. Mədəniyyət Nazirliyindən isə bizə deyiblər ki, bu işlərlə qurum yanında Mədəni İrsin Qorunması, İnkişafı və Bərpası üzrə Dövlət Xidməti məşğul olur.
Qeyd edək ki, bizim ictimailəşdirdiyimiz bu mövzu cəmiyyətdə ciddi narazılıqla qarşılanıb. Sosial şəbəkələrdə geniş müzakirəyə səbəb olan bu hərəkətlə bağlı hətta bəzi sol təmayüllü siyasi partiyalar da etiraz bəyanatları veriblər. Bizimlə yenidən əlaqə saxlayan həmin kəndin bir neçə sakini bildirib ki, bu hadisə kənddə böyük narazılığa səbəb olub, ancaq problem həllini tapmayıb. Abidə uçurulan kəndin sakini Əsədov Ağaddin Cəmiyyət oğlu “Bakı-Xəbər”ə açıqlamasında bildirdi ki, onların şikayət etmədiyi instansiya qalmayıb: “Təkcə bizim kənddən Böyük Vətən Müharibəsində 106 nəfər həlak olub. Məhz onların xatirəsini əbədiləşdirmək üçün bu abidə qoyulmuşdu. Bu ilin aprel ayının 8-dən 9-na keçən gecə həmin abidə ekskavatorla sökülüb, yüklənib “KamAZ” markalı maşına. Sonra aparılıb kəndin başqa bir hissəsinə xəndəyə tökülüb, üstünü də torpaqlayıblar. Səhər biz kəndin mərkəzinə çıxanda gördük ki, abidə yoxdur. Bələdiyyə sədri və ərazi icra nümayəndəsindən öyrəndik ki, onların bu işdən xəbərləri yoxdur. Bunun oğurluq və ya xuliqanlıq niyyətilə edildiyini aydınlaşdırmaq üçün 102 xidmətinə zəng etdik.
Bir saat sonra kəndə polis tədqiqatçısı gəldi. Məni soruşdular. Çünki zəngi mən etmişdim. Tədqiqatçı mənə dedi ki, abidə Rayon İcra Hakimiyyəti başçısının qərarı ilə sökülüb və təmirə aparılıb. Bildirdim ki, təmirə aparılıbsa, onda torpağın altına niyə basdırılıb?”
Kənd sakininin sözlərinə görə, polis kənara çəkilib telefonla danışandan sonra ona deyib ki, narahat olmayın, abidənin yerində yenisi tikiləcək: “Kənd sakinlərindən abidənin kim tərəfindən söküldüyünü görən olub. Həmin yoldaşın özü də sizinlə danışacaq. Abidənin sökülməsinə bilavasitə rəhbərlik edən şəxs 71 saylı Masallı kənd seçki dairəsinin sədri Əzizov İlkin Ədalət oğludur. Onun marağı bundan ibarətdir ki, abidənin ətrafında, yolun kənarında 3-4 sot torpağı ələ keçirib, orada ya ticarət, ya da iaşə obyekti tikdirsin. Bizim Qarabağ mübaribəsində həlak olan iki şəhid balamız da var. İndi aparıb sökülən abidəni onlara qoyulan xatirə löhvəsi ilə eyniləşdiriblər. Axı bu iki hadisə arasında xeyli fərq var. Hər halda, müstəqillik şəhidlərimizlə Böyük Vətən Müharibəsində öldürülənlərin xatirəsini bir tikilidə əbədiləşdirmək düz deyil. Məqsəd abidənin olduğu yol kənarına yaxın olan ərazini zəbt etməkdir. Əgər bu həqiqətən xoş niyyətlə edilirdisə, niyə bunu gündüz yox, gecə saatlarında söküb, xəndəyə tökdükdən sonra üstünü torpaqla basdırıblar? Cavab bəllidir. Dəyərli 10 min manatlarla ölçülən torpaq sahəsini abidədən azad etmək lazım idi. Artıq abidənin yerinin koordinatları Əmlak Komitəsi tərəfindən qeydiyyata alınıb, onu satışa çıxardılar. Biz bununla bağlı hətta Rusiyanın ölkəmizdəki səfirinə müraciət etmişik. Onlardan aldığımız məktubdan bəlli oldu ki, səfirlik şikayətimizi Vətən Müharibəsi Veteranları Cəmiyyətinə yönəldib. Qələbənin 75 illiyi ərəfəsində onu simvolizə edən abidəyə bu cür münasibət sözün bitdiyi yer sayıla bilər. Məhz bu hadisəyə görə kəndin icra nümayəndəsi biabırçı vəziyyətdə işdən çıxarıldı. İlkin Əzizov DSK-dan çıxarılıb İcra Hakimiyyətində aşağı işə keçirildi. Bununla bu işi ört-basdır etmək istəyirlər. İnsanları “qurban” verməklə diqqəti əsas məsələdən uzaqlaşdırırlar. Torpaq isə artıq hərraca çıxarılıb. Çox xahiş edirik, bizim səsimizi ölkə rəhbərliyinə çatdırın. Bizə kiminsə vəzifədən çıxarılması deyil, abidənin yerinə bərpa olunması lazımdır”.
Məhəmmədəli QƏRİBLİ
