24/07/2019 01:17
728 x 90

Süni mayalanma və orqan köçürmələri də icbari tibbi sığorta paketinə salına bilər…

“Orqan transplantasiyası və süni mayalanma bahalı əməliyyat olduğu üçün, onların icbari tibbi sığorta paketinə salınması müsbət olar”

img

Məlumdur ki, gələn ildən ölkəmizdə icbari tibbi sığorta tətbiq olunacaq. İcbari tibbi sığortanın tətbiqi ilə bağlı xəstəxanalarda informasiya texnologiyaları infrastrukturunun qurulması, sığortalılar xəstəxanaya gəldiyi halda onların qeydiyyatının elektron şəkildə aparılması və göstərilən xidmətlər barədə məlumatların elektron şəkildə agentliyə göndərilməsi işi yekunlaşmaq üzrədir.

2020-ci il yanvarın 1-dən ölkədə tətbiq olunacaq icbari tibbi sığortanın problemsiz həyata keçirilməsi üçün ciddi və sistemli tədbirlər görülməkdədir.

Qeyd edək ki, icbari tibbi sığorta ilə bağlı həyata keçirilən pilot layihədə müraciətlərin sayından asılı olaraq, xidmətlər zərfinə bir sıra xəstəliklər daxildir. Xidmət zərfinə dəyişikliklərin edilməsi gözlənir. Dəyişikliklər arasında süni mayalanma və orqan köçürmələri də var. Məlumdur ki, süni mayalanma və orqan transplantasiyası böyük vəsait tələb edən sahələrdir.

İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev kütləvi informasiya vasitələrinin nümayəndələrinə açıqlamasında bildirib ki, 2020-ci ildən tətbiq olunacaq icbari tibbi sığorta paketinə süni mayalanma və orqan transplantasiyasının da əlavə olunması gözlənir. Z.Əliyev qeyd edib ki, gələn ildən limitli şəkildə qeyd olunan problemlərin icbari tibbi sığortanın xidmətlər zərfinə daxil edilməsi mümkündür: “Hazırda onların xidmətlər zərfinə daxil edilməsi təklif olunub. Təkliflər öz təsdiqini tapdıqdan sonra əminliklə deyə biləcəyik ki, həmin istiqamətlər üzrə nə qədər və hansı növbə ilə xidmət etməyi gözləyirik. Çünki burada növbəlilik düzgün, ədalətli şəkildə tənzimlənməlidir ki, ən çox ehtiyacı olan vətəndaşlar həmin xidmətlərdən yararlana bilsinlər".

  • Adil Qeybulla: “Bu gün ölkədə orqan transplantasiyasını həyata keçirmək istəyən xəstələrin sayı yetərincədir”

İcbari tibbi sığorta paketinə süni mayalanma və orqan transplantasiyanın daxil olunmasının əhəmiyyəti barəsində danışan professor, həkim-ekspert Adil Qeybulla bunları dedi: “Məlumdur ki, orqan transplantasiyası və süni mayalanma bahalı əməliyyatlardır. Bu gün ölkədə orqan transplantasiyasını həyata keçirmək istəyən xəstələrin sayı yetərincədir. O xəstələrin bir qismi ya maddi çətinlik, ya da orqan çatışmazlığından müalicə oluna bilmir. Bu tip xəstələrin şəfa tapması üçün sığorta paketinə orqan transplantasiyasının salınması zəruridir”.

Həmsöhbətimiz onu da əlavə etdi ki, oynaq köçürülməsi prosesi dövlət xəstəxanalarında həyata keçirilir. Ancaq oynağın hansı firma tərəfindən alınıb xəstəyə taxıldığı sualdır. Çünki elə süni oynaqlar var ki, xəstəyə taxılan zaman gözlənilən effekti vermir.

A.Qeybullanın sözlərinə görə, bu gün ölkədə süni mayalanmaya böyük tələbat var. Övlad sahibi ola bilməyənlər çarəni süni mayalanmada görürlər. Lakin qeyd olunan əməliyyatın həyata keçirilməsi üçün tələb olunan vəsait baha olduğu üçün, hər kəs bu prosesi həyata keçirə bilmir. Nəticədə isə ailələr dağılır: “Bu səbəbdən də süni mayalanmanın icbari tibbi sığorta paketinə daxil olması müsbət qərar olar.”

Günel CƏLİLOVA

Son xəbərlər