24/07/2019 01:16
728 x 90

Azərbaycana turist axını bu il də əhəmiyyətli dərəcədə artır, lakın Avropa turistləri hələ də azlıq təşkil edir...

“Servis baxımından biz kifayət qədər irəliləyişə nail ola bilmişik, amma Avropa standartları səviyyəsinə hələ çatmamışıq”

img

Bu ilin birinci yarısında Azərbaycanı 6.5% çox xarici qonaq ziyarət edib. Dövlət Turizm Agentliyindən verilən məlumatda deyilir ki, 2019-cu ilin birinci yarısında Azərbaycanı ziyarət etmiş xarici qonaqların sayı 1.4 milyona çatıb ki, bu da ötən ilin eyni dövründə ölkəyə gəlmiş 1.3 milyon xarici ziyarətçi ilə müqayisədə 86 min və ya 6.5% çox qonaq deməkdir.

Gələnlərin böyük hissəsini 29.4%-lə Rusiya (414 min), digər böyük hissəsini isə 24.3%-lə Gürcüstan (342 min) vətəndaşları təşkil edib. Gürcüstan üzrə artım 22.8% və ya 64 min nəfər olub. Qeyd etmək lazımdır ki, bu iki ölkədən gələn qonaqların sayı ümumi gələnlərin 50%-dən çox hissəsini təşkil edib.

Türkiyədən gəlmiş qonaqların sayı 3.7% artaraq toplam 148 minə çatıb. Cənubi və Mərkəzi Asiya ölkələrindən gələnlərin sayında yenə də sürətli artım müşahidə olunur - artım ilin ilk yarısı üçün uyğun olaraq 37.8% və 50.2% olub. Azərbaycan üçün Cənubi Asiyanın əsas turizm bazarları Hindistan (27 min, 80.2% artım) və Pakistan (19 min, 24.4% artım), Mərkəzi Asiyada isə Qazaxıstan (20 min, 15.1% artım) və Türkmənistandır (21 min, 85% artım).

Görünən odur ki, Avropadan Azərbaycana turist axını aşağıdır. Rəsmi statistikaya görə, 2018-ci ildə Azərbaycana gələn turistlərin 63%-i 3 ölkənin- Rusiya, Gürcüstan və Türkiyənin payına düşüb. Öz növbəsində, 20%-ə qədər turist İrandan və ərəb ölkələrindən gələnlərin payına düşür. Yəni, faktiki olaraq, Azərbaycana inkişaf etmiş, ödəmə qabiliyyətliliyi yüksək olan Avropa ölkələrindən gələn turistlərin sayı çox azdır. Məsələn, Almaniya, Niderland, Fransa və İtaliyadan Azərbaycana 2018-ci ildə gələn turistlərin sayı birlikdə 40 min nəfər ətrafında olub. Bəlli olur ki, bu ilin birinci yarısında da bu sahədə ciddi irəliləyiş yoxdur.

Maraqlıdır, Avropadan Azərbaycana turist niyə az gəlir?

  • Çingiz İsmayılov: “Turistlər görəndə ki, Gürcüstanda Azərbaycanla müqayisədə qiymətlər aşağıdır...”

Məsələyə münasibət bildirən turizm sahəsi üzrə ekspert Çingiz İsmayılovun sözlərinə görə, bunun bir sıra obyektiv və subyektiv səbəbləri var: “Səbəblərdən biri onunla bağlıdır ki, Avropaya əsasən Afrika və müsəlman miqrant axınları var. Bu səbəbdən Avropanın ictimai fikrində müsəlman dünyasına münasibət bir o qədər yaxşı deyil. Bir amil bununla bağlıdır. İkinci amil Qafqazda qonşuluğumuzda xristian ölkələri var. Təbii ki, xristian dəyərlərinə söykənən Avropa insanları məhz xristian ölkələrinə daha çox can atır, önəm verirlər. Üçüncü amil qiymətlər və servislə bağlıdır. Servis baxımından biz kifayət qədər irəliləyişə nail ola bilmişik, amma Avropa standartları səviyyəsinə hələ çatmamışıq. Qiymətlər də bu məsələdə mühüm rola malikdir. Avropadan gələndə coğrafi baxımdan əsasən Gürcüstana üstünlük verirlər. Turistlər görəndə ki, Gürcüstanda Azərbaycanla müqayisədə qiymətlər aşağıdır, ölkəmizə gəlmək istəmirlər. Bundan başqa, oradakı çimərliklər bizim çimərliklərlə müqayisədə nisbətən təmizdir. Bütün bu amillər üzündən Avropadan Azərbaycana az turist gəlir. Başqa bir tərəfdən, gərək bizim turist şirkətləri turist sərgilərində daha fəal iştirak etsinlər. Təəssüflər olsun ki, bizim turist şirkətləri bu işdə o qədər də fəal deyillər. Əsasən nazirlik səviyyəsində beynəlxalq şəbəkədə işlər görülür. “Avranyus” kanalında turizmlə bağlı əsasən Mədəniyyət Nazirliyi reklam çarxları verir. Hansısa turist şirkəti bununla bağlı reklam vermir. Ona görə də bizim turist şirkətləri gərək reklam işində fəal olsunlar. Təbliğat işi aparıb öz üstünlüklərini qabartmalıdırlar”.

Vidadi ORDAHALLI

Son xəbərlər