17/07/2019 11:25
728 x 90

Xaricdə insan haqları ilə bağlı treninqlərdə iştirak Azərbaycan polisinin fəaliyyət istiqamətlərindən biri kimi...

“Polislərin xarici ölkələrdə treninqlər keçməsi, seminarlarda iştirak etməsi həm polisin peşəkarlıq səviyyəsinin yüksəlməsinə xidmət edir, həm...”

img

Son illər Azərbaycan polisinin peşəkarlıq səviyyəsinin yüksəldilməsi istiqamətində mühüm addımlar atılır. Polis orqanı əməkdaşlarının peşəkarlıq səviyyəsinin artırılması, habelə onların insan hüquq və azadlığının müdafiəsi sahəsində müasir fəaliyyət üsullarına yiyələnməsi əsas hədəflərdən biridir. 

Məlum olduğu kimi, daxili işlər naziri, general-polkovnik Vilayət Eyvazov Azərbaycanda səfərdə olan Avropa Şurasının insan hüquqları üzrə komissarı Dunya Miyatoviçin rəhbərlik etdiyi nümayəndə heyəti ilə görüşü zamanı Azərbaycan polisinin fəaliyyəti müzakirə edilib.

Daxili İşlər Nazirliyinin (DİN) Mətbuat xidmətindən mətbuata verilən məlumata görə, nazir qeyd edib ki, Prezident İlham Əliyevin ölkəmizin hüquq-mühafizə orqanlarının qarşısında qoyduğu ən mühüm vəzifələrdən biri insan haqlarının qorunmasıdır. V.Eyvazov bu istiqamətdə Daxili İşlər Nazirliyi ilə Avropa Şurası arasında sıx və işgüzar əməkdaşlıq çərçivəsində həyata keçirilən tədbirlərin xüsusi əhəmiyyət daşıdığını, vətəndaşlarla kobud rəftarın və polisin nüfuzuna xələl gətirən digər neqativ halların qarşısının alınması sahəsində də davamlı iş aparıldığını deyib.

Peşəkarlığın, dünyagörüşün artırılması, beynəlxalq təcrübənin tətbiqi yönündə görülən işlərin məqsədyönlü və sistemli şəkildə həyata keçirildiyini qeyd edən nazir bildirib ki, daxili işlər orqanlarının əməkdaşları müxtəlif ölkələrə, o cümlədən, Amerika Birləşmiş Ştatlarına və Avropa dövlətlərinə təlimlər keçməyə göndərilir, təcrübəli beynəlxalq ekspertlərin iştirakı ilə ölkəmizdə seminarlar, treninqlər, kurslar təşkil olunur. Yalnız insan hüquqları üzrə ölkəmizdə və xarici dövlətlərdə keçirilən tədbirlərdə son 5 ildə DİN-in 3 minə yaxın əməkdaşı iştirak edib.

Son illər xarici ölkələrdə keçirilən müxtəlif treninq və seminarlarda iştirak etmək Azərbaycan polisinin peşəkarlıq səviyyəsinin artmasına, habelə onların insan hüquq və azadlıqlarının müdafiəsi istiqamətindəki fəaliyyətinə necə təsir göstərib?

  • Əliməmməd Nuriyev: “Bizim polisin fəaliyyəti insan hüquq və azadlıqlarının daha yüksək səviyyədə qorunmasına doğrudur, əlbəttə, burada polislərimizin xaricdə keçdiyi təcrübənin də rolu var”

Tanınmış hüquqşünas Əliməmməd Nuriyev “Bakı-Xəbər”ə bildirdi ki, Azərbaycan polisi son illər öz fəaliyyətini tamamilə müasir standartlara uyğun qurub. “Şübhəsiz ki, treninqlərin keçirilməsi bütün sahələrdə çox vacibdir. Bu, polis fəaliyyəti üçün olduqca lazımlıdır. Polis çoxşaxəli fəaliyyət göstərən, həm də təhlükəsizliyi təmin edən bir orqandır. Bu baxımdan, polislərin xarici ölkələrdə treninqlər keçməsi, seminarlarda iştirak etməsi həm peşəkarlıq səviyyəsinin yüksəlməsinə xidmət edir, həm onlar xarici təcrübəni öyrənir, həm də insan hüquq və azadlıqlarının müdafiəsi sahəsində funksiyaları ilə bağlı daha yeni məlumatlar əldə edirlər. Azərbaycanda da mütəmadi olaraq Daxili İşlər Nazirliyi tərəfindən polislərin peşəkarlıq fəaliyyətinin yüksəldilməsi üçün müxtəlif seminarlar, treninqlər həyata keçirilir. Bununla yanaşı, xarici təcrübənin öyrənilməsi və onun ölkəmizə gətirilməsi də çox vacib məsələdir. Çünki Azərbaycan Avropa Şurasının üzvüdür və bu gün bütün beynəlxalq konvensiyalara qoşulub. Bu da Azərbaycana istər insan hüquq və azadlıqlarının qorunması, istər cinayətkarlığa qarşı mübarizə sahəsində şübhəsiz ki, həm də o imkanı verir ki, bizim polislər də başqa ölkələrdə treninqlər keçsinlər. Polislərin xarici ölkələrdə treninqlərə cəlb edilməsi onların yeni davranışlarının formalaşmasına kömək edir. Açıq deyək ki, müasir Azərbaycan polisi dünənki Azərbaycan polisi deyil, bu sahədə çox ciddi irəliləyişlər var. Bir neçə il əvvəl mən polislərlə bağlı treninqlərdə iştirak edirdim, həm də həmin vaxt bizim polislər treninq keçmək üçün Hollandiyaya getmişdilər. Bu sahədə çoxillik təcrübəyə malik olan Hollandiyada polislərimizin təcrübə keçməsi onların fəaliyyətində müsbət şəkildə özünü göstərdi. İndi özünüz fikir verib görün ki, keçən əsrin 90-cı illərinin polisinin davranışı ilə 2019-cu illin polisinin davranışları arasında yerlə-göy qədər fərq var. Bu dəyişiklik müsbət istiqamətdə baş verib, polisin peşəkarlıq səviyyəsinin daha da yüksəlməsi ilə nəticələnib. Bizim polisin fəaliyyəti insan hüquq və azadlıqlarının daha yüksək səviyyədə qorunmasına doğrudur, əlbəttə, burada polislərimizin xaricdə keçdiyi təcrübənin də rolu var. Polisimiz bir sıra sahələrdə, eləcə də insan hüquq və azadlıqları, insan alveri və s. sahələrdə xeyli irəliləyiş əldə edib. Bilirsiniz ki, polisin üzərinə bir sıra funksiyalar düşür. Polislərin treninqlərdə iştirakı çox vacibdir”.

Polisin həm də əməliyyat-axtarış tədbirlərini həyata keçirdiyini və istintaq apardığını deyən Ə.Nuriyevin sözlərinə görə, istintaq aparılarkən insanların hüquq və azadlıqları ilə bağlı beynəlxalq təcrübənin öyrənilməsi çox lazımlıdır və buna polislərimiz yiyələnir. “Avropa Məhkəməsinin çoxsaylı qərarı var və qərarlarda insan hüquq və azadlıqları ilə bağlı çox mühüm presedentlər var. Bu presedentlərin öyrənilməsi də çox vacib məsələdir və polis bu proseslərdə iştirak edir. Eyni zamanada, “İnterpol” kimi böyük beynəlxalq bir qurum var. Xarici ölkələrlə əməkdaşlıq mübadiləsinin aparılması, təcrübənin öyrənilməsi, xaricdə əməliyyatların aparılması proseslərinin öyrənilməsi baxımından bu treninqlər mühüm rol oynayıb. Polislərin xarici ölkələrdə treninqlər keçməsi çox vacibdir, bunun müsbət nəticələri var və bu sahədə Azərbaycan polisi xeyli təcrübə toplayıb. Deyim ki, Azərbaycan polisi bu treninqlərə qatılarkən həm də öz təcrübəsini qarşılıqlı olaraq bölüşür. Yəni bu treninqlərdə yalnız bizim polislər öyrənmir, həm də öz təcrübəsini paylaşır. Xaricilər də bizim polislərin təcrübəsindən çox şey öyrənirlər. Elə məsələlər var ki, onlar Azərbaycanda daha yüksək səviyyədə inkişaf edib. Məsələn, cinayətlərin açılması bizdə yüksək faizdir. Bunu polis necə həyata keçirir, hansı üsullardan, yeni innovasiyalardan, texnologiyalardan istifadə edir? Ölkəmizdə cinayətlərin üstünün açılması hətta 90 faiz təşkil edir. Bu çox mühüm məsələdir. Başqa ölkələrdə cinayətlərin üstünün açılması faizi bu qədər yüksək deyil, amma Azərbaycan polisinin işində bu özünü çox yüksək səviyyədə göstərir. Təhlükəsiz şəhər məsələsi də bizim təcrübədə var. Xaricilər üçün maraqlı gələ bilər ki, Azərbaycan polisi təhlükəsiz şəhər məsələsini necə qurur? Bunlar mühüm amillərdir. Bundan başqa, cinayətkarların “isti izlər”lə tutulması da Azərbaycanda operativ şəkildə həyata keçirilir. Ən vacib məsələ, əlbəttə ki, insan hüquq və azadlıqları ilə bağlı bir sıra yeni vərdişlərin əldə edilməsində, eyni zamanda da insan alverinə, eləcə də narkotiklərə qarşı mübarizədə yeni innovasiyaların tətbiq edilməsi çox vacibdir. Dünyada çox sürətlə cinayətkarlıq inkişaf edir, buna qarşı mübarizə üçün isə yeni üsul və metodlar tapılır. Bu baxımdan, Azərbaycan polisinin treninqlərdə bu kimi yeni vərdişləri öyrənməsi və tətbiq etməsi çox vacibdir” - deyə bildirən Ə.Nuriyev qeyd etdi ki, polislərin bu cür treninqlərdə iştirakı həm də onların kibercinayətkarlıq sahəsində təcrübə qazanmasına səbəb olub.

Kibercinayətkarlıqla bağlı vərdişlərin öyrənilməsinin mühüm olduğunu deyən Ə.Nuriyevin sözlərinə görə, bu amil polisin bugünkü və gələcək fəaliyyəti üçün də yeni imkanlar yaradır. “Ona görə də bu prosesin daha da dərinləşdirilməsinin və genişləndirilməsinin tərəfdarıyam” - deyə Ə.Nuriyev vurğuladı.

İradə SARIYEVA

Son xəbərlər