17/07/2019 11:25
728 x 90

Pirşağı çimərliyində balıqları kütləvi qıran nədir…

img

Son zamanlar bir sıra çimərliklərdə balıqların kütləvi ölüm halı qeydə alınır. Bir neçə gün öncə Bakının Sabunçu rayonunda, Pirşağı qəsəbəsi ərazisində yerləşən Qızılqum çimərliyində balıqların kütləvi ölümü qeydə alınıb. Analoji hal ötən ay Novxanı çimərliyində də yaşanıb. Belə ki, həmin ərazidə də ölmüş balıqlar sahilə çıxıb.

Ekspertlərin fikrincə, balıqların kütləvi şəkildə ölməsinin səbəbi uzaq məsafədən gələn və birbaşa dənizə axıdılan kanalizasiya və çirkab sularıdır. İaşə obyektlərinin dənizə çirkab suları axıtması danılmaz faktdır. Son günlər Ekologiya və Təbii Sərvətlər Nazirliyi bir sıra qurumlarla birgə reyd keçirib. Keçirilən reydlər zamanı bəzi istirahət mərkəzlərinin dənizə çirkab su axıtması aşkar olunub. Elə bu səbəbdən də dənizdə  çirkab suların həcmi artdığı üçün canlılar məhv olur.

  • Anar Cəbrayıllı: “Pirşağıda çirkab suların dənizə axıdılmaması üçün ASC tərəfindən tədbirlər planı hazırlanıb”

Məsələ ilə bağlı açıqlama verən “Azərsu” ASC-nin mətbuat katibi Anar Cəbrayıllı bildirdi ki, Pirşağı çimərliyində balıqların kütləvi şəkildə məhv olmasından xəbərdardır. O qeyd etdi ki, problemin qarşısını almaq üçün ASC tərəfindən tədbirlər planı hazırlanıb. Planın əsas halqasını Pirşağıdakı bioloji təmizləyici qurğu təşkil edir və işlər gələn il yekunlaşacaq, qurğu istismara veriləcək.

  • Telman Zeynalov: “Balıqların ölməsinin başlıca səbəbi Xəzər dənizinə çirkab suların axıdılmasıdır”

Ekoloq Telman Zeynalovun sözlərinə görə, balıqların ölməsinə başlıca səbəb Xəzər dənizinin çirklənməsidir: “Məlumdur ki, Xəzər dənizinə son zamanlar çirkab sular ötən illərə nisbətən daha çox axıdılır. Dənizdə çirklənmə çox olanda oksigen qıtlığı yaranır. Belə olan halda, dənizdə olan canlılar oksigen çatışmazlığı səbəbindən ölməyə başlayırlar”.

Həmsöhbətimiz onu da bildirdi ki, son zamanlar atmosferdə baş verən hadisələr balıqların məhv olmasına səbəb olur. Təbii ki, atmosferdə baş verən hər hansı bir hadisə oksigen qıtlığına səbəb olur. Oksigenin çatışmaması isə balıqların məhv olmasına səbəb olur.

Günel CƏLİLOVA

Son xəbərlər