18/10/2019 23:37
728 x 90

Qazaxıstanın böyük vilayətlərindən biri Azərbaycanın modeli ilə “ABAD”laşacaq...

“Qazaxıstanın Türküstan vilayətinin “ABAD” modelinə maraq göstərməsi Azərbaycanın uğurudur”

img

Məlum olduğu kimi, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində fəaliyyət göstərən “ABAD” publik hüquqi şəxs və Qazaxıstan Respublikasının Türküstan vilayətinin icra hakimiyyəti arasında Niyyət Protokolu imzalanıb. Protokol “ABAD” publik hüquqi şəxsin direktoru Rüfət Elçiyev və Türküstan vilayətinin icra hakimiyyətinin müavini Meirjan Mirzaliyev arasında imzalanıb.

Sənəd Azərbaycanın “ABAD” modeli əsasında Qazaxıstan Respublikasının Türküstan vilayətində sənətkarlıq sahəsi üzrə mikro və kiçik sahibkarlığın daha da inkişaf etdirilməsi məqsədini nəzərdə tutur.

“ABAD” – Ailə Biznesinə ASAN Dəstək 2016-cı ildən, həmçinin, dekorativ-tətbiqi xalq sənətkarlığı ilə məşğul olan kiçik və orta sahibkarlara dəstək göstərir. Bu günədək "ABAD"çı-sənətkarların sayı artıq 300-ü ötüb. Sənətkarların əl işlərinin satışı üçün ölkənin fərqli coğrafi ərazilərində 9 etno-butik fəaliyyət göstərir. Burada Azərbaycanın milli ruhunu özündə daşıyan müxtəlif məmulatlar əldə etmək mümkündür. Dekorativ-tətbiqi xalq sənətkarlığı istiqamətində özünü təkmilləşdirmək istəyən şəxslər üçün isə respublika üzrə “ABAD” məktəbləri fəaliyyət göstərirlər.

Onu da qeyd edək ki, Turküstan Böyük İpək Yolu boyunca yerləşən tarixi ərazi olmaqla yanaşı, həmçinin, Türk dünyasının mənəvi paytaxtı hesab olunur. 2019-cu ilin sonunadək Türküstan vilayətində Böyük İpək Yolunun Ənənəvi Sənətkarlıq Mərkəzinin açılması nəzərdə tutulur. Layihəyə əsasən, mərkəzdə Türk dünyasını təmsil edən sənətkarlar orada yaşayaraq öz peşələri üzrə fəaliyyətlərini davam etdirəcəklər.

Niyyət Protokolu bu və digər layihələrdə “ABAD” və Türküstanın Böyük İpək Yolu Ənənəvi Sənətkarlıq Mərkəzi arasında təcrübə mübadiləsini nəzərdə tutur.

Görünən odur ki, Qazaxıstanın Türküstan vilayətində Azərbaycanın “ABAD” modeli tətbiq ediləcək. Bu, sözügedən modelin özünü doğrultmasının göstəricisidir ki, artıq digər ölkələr də buna maraq göstərirlər.

Maraqlıdır, bəs ekspertlər bunu necə dəyərləndirirlər?

  • Aydın Hüseynov: “Bunun sayəsində sənətkarlıq sahəsi üzrə mikro və orta sahibkarlığın daha da inkişafı üçün yeni imkanlar açılacaq”

Məsələyə münasibət bildirən millət vəkili Aydın Hüseynovun sözlərinə görə, Qazaxıstanın Türküstan vilayətinin “ABAD” modelinə maraq göstərməsi Azərbaycanın uğurudur: “Əvvəla “ASAN xidmət” bir Azərbaycan brendi olaraq bir çox ölkənin diqqətini cəlb edib. Bəzi ölkələr bu modelin öz ölkələrində tətbiqini nəzərdən keçirirlər. Bununla bağlı Azərbaycanda sözügedən modelin iş prinsiplərini öyrənirlər. Bu o deməkdir ki, artıq bu özünü doğrultmuş mütərəqqi bir modeldir. Çünki bu model müasir tələblərə cavab verdiyi üçün buna maraq artıb. Digər tərəfdən, bu model sayəsində əməliyyatlar operativ şəkildə həyata keçirilir. İnsanlar vaxta qənaət edirlər. Burada bir çox digər faktor da özünü göstərir. Qazaxıstanın məhz “ABAD” modelinə maraq göstərməsi bütün bunların nəticəsidir. Bunun sayəsində Qazaxıstanın Türküstan vilayətində sənətkarlıq sahəsi üzrə mikro və orta sahibkarlığın daha da inkişafı üçün yeni imkanlar açılacaq. Ailə biznesinin inkişafına stimul verəcək. Hesab edirəm ki, Türküstan vilayətində bu nümunənin tətbiqi sonrakı dövrlərdə Qazaxıstanın digər vilayətlərində də “ABAD” modelinin tətbiqinə şərait yaradacaq”.

Vidadi ORDAHALLI

Son xəbərlər