17/07/2019 11:23
728 x 90

Əhali üçün işıq limitinin artırılması ictimai rəyə çevrilir...

“Elektrik enerjisi ilə bağlı limitə yenidən baxılmalı və bu ləğv edilməlidir”

img

İki ay əvvəl dövlət başçısının qərarı ilə təbii qazın pərakəndə satış tarifi əhali üzrə illik istehlak limiti 1700 kubmetrdən 2200 kubmetrə qaldırıldı. Əhalinin qış aylarında təbii qaza tələbatının yüksək olması və bu səbəbdən illik limitin keçilməsi ilə bağlı kommunal xərclərinin artmasını nəzərə alan hökumət bu addımı atdı.

Ölkədə təbii qazın istifadəsinə tətbiq olunan limitin artırılmasından sonra elektrik enerjisi ilə bağlı limitin artırılması məsələsi ictimai rəydə özünü göstərməyə başlayır. Hazırda yay fəslinin anormal istilərində insanların evdə və iş yerlərində kondisionerləri işə salması elektrik xərclərini hiss olunacaq dərəcədə artırıb. Bir çoxları isə aylıq elektrik xərclərini ödəməkdə çətinlik çəkdiyindən, evdə, ofisdə kondisioner yandırmaqdan imtina edir. Ona görə də ictimai rəydə qazla bağlı qərarın işıq barədə də verilməsi yönündə istəklər artır. Bunun zəruri olması ilə bağlı fikirlər var. Hesab olunur ki, bu həm əhalinin həyat şəraitinə, həm də büdcəsinə müsbət təsir edəcək. Son vaxtlar ictimaiyyət arasında bununla bağlı müraciətlər artır.

Məlumat üçün qeyd edək ki, hazırda əhali qrupu üzrə aylıq elektrik enerjisi istehlakı 300 kilovat-saatadək olan istehlakçılar üçün tarif  7 qəpik, aylıq istehlak həcminin 300 kilovat-saatdan çox olan hissəsi üçün isə 11 qəpik müəyyənləşdirilib.

Maraqlıdır, ekspertlər işıq limitinin artırılması ilə bağlı yaranan ictimai rəyi necə dəyərləndirirlər? Bütövlükdə, elektrik enerjisi ilə bağlı limitin artırılmasına necə yanaşırlar?

  • Əli Əlirzayev: “Limit üzündən eləsi var ki, kondisionerdən istifadə etmir”

Məsələyə münasibət bildirən iqtisadçı-alim Əli Əlirzayevin sözlərinə görə, işıqla bağlı nəinki limit artırılmalı, ümumiyyətlə ləğv edilməlidir: “Ümumiyyətlə, limitin əleyhinəyəm. Sayğac nə qədər yazırsa, onun müqabilində istehlakçı pul ödəməlidir. Yay ayında elektrik enerjisinə tələbat artır. Rayonlarda bəzən əhali elektrik enerjisini yanacağın yerində istifadə edir. Limitdən sonra bununla bağlı xərclər daha da artır. Rayon əhalisinin isə gəlirləri şəhərlə müqayisədə aşağıdır. Limit üzündən eləsi var ki, kondisionerdən istifadə etmir. Ona görə ki, işıq limiti həmin ailələrin büdcəsinə ciddi təsir edir. Başqa bir tərəfdən, Azərbaycan elektrik enerjisini ixrac edən ölkədir. Belə olan halda, ümumiyyətlə, bu sahədə limitin tətbiq edilməsinə ehtiyac yoxdur. Hesab edirəm ki, qiymət eyni olmalıdır. Azərbaycan elektirik enerjisinə olan tələbatı idxal hesabına təmin etsəydi, bunu hardasa başa düşmək olardı. Ancaq Azərbaycan elektrik enerjisinə olan tələbatı daxili istehsal hesabına təmin etdiyindən, limitə ehtiyac yoxdur. Azərbaycan enerji məhsulları ixrac edən ölkədir. Mən əvvəldən istər təbii qazla, istərsə də işıqla bağlı limitin tətbiq olunmasının əleyhinə olmuşam. Əmtəənin, malın bir qiyməti olar. Ona görə də elektrik enerjisi ilə bağlı limitə yenidən baxılmalı və bu ləğv edilməlidir. Yəni limit məhdudiyyəti ortadan götürülməlidir”.

Vidadi ORDAHALLI

Son xəbərlər